Read lango Ecita 6 Bible Online

Ecita 6 - lango bible

Ecita 6

¹I dyeworrono abaka mom onino, en te ciko ni myero kel buke me po gigi mogo abeco ame jo mogo obedo timo, ote kelo buk me Tekwaro bino kwano i nyim abaka.

²Rik ote cop kannoro ame ocoo iye kite ame rik Mordekai otuco kede kop i kom jo aryo ame oroo, Bigitana kede Terec, ame rik obedo ogwok doggola abaka, ame rik oyenyo yo me neko abaka Akacuwera oko.

³Abaka te penyo ni, “Woro aŋo onyo dit aŋo ame obin omio Mordekai pi gin ame en otimo-ni?” Omiro abaka te gamo ni, “Mom gire rik omie ginnoro.”

⁴Abaka te penyo ni, “Tye dano moro i ot?” I caa-nono onwoŋo Aman pwod adonyo adonya i dyekal i oko mere ame tye i paco abaka, me bino kobbi abaka pi deyo Mordekai i yat deyo jo ame doŋ etyeko yiko pire.

⁵Mannono te miyo omiro abaka kobbe ni, “Aman tye ocuŋ kuno.” Abaka te kobbigi ni, “Kobbe wunu ekato.”

⁶Aman te bino baŋ abaka, abaka te kobbe ni, “Ŋo ame myero otim baŋ dano ame abaka oyikere me woro?” Aman te kobo i cunye kene kene ni, “Man ka ŋa ame abaka amito woro ame kata oko-ni?”

⁷Aman te kobbi abaka ni, “Dano ame abaka mito woro,

⁸myero kel ruk me kwogo ame abaka i kome ruko, kede aguragura ame abaka riŋo kede, dok rwakke daŋ tok kwogo.

⁹Ruk me kwogo kede aguragura myero mi i ciŋ aloc abaka me awora a kato oloc ocele luŋ, me en ruki, dano ame abaka mito woro te wot kede i dye boma kannalac, kun dano-nono nwoŋo obedo i wi aguragura, en te bedo nyute baŋ lwak kun kobo ni, ‘Man en gin ame obino timo i kom dano ame abaka mito keto kwogo i kome.’ ”

¹⁰Abaka te kobbi Aman ni, “Ru cunyo wot, ter boŋo me kwogo kede aguragura kite ame ikobo kede, ite wot timo kittono i kom Mordekai ame obedo Ajudaya ame bedo i dogcel abaka. Ti jami luŋ ame ikobo, kur wek moro iye kadi acel.”

¹¹Aman te tero ruk me kwogo kede aguragura, te wot timo kittono i kom Mordekai ame obedo Ajudaya ame bedo i dogcel abaka. En orukki Mordekai rukkere te miye riŋo kede aguragura i dye boma kannalac, kun en rabo kop i kome ni, “Man en gin ame obino timo i kom ŋat ame abaka mito keto kwogo i kome.”

¹²Mordekai te dok i dogcel abaka. Aman te ru wot oko i paco mere, kun akumo ame owumo wie oko.

¹³Aman te titti dako mere Jerec kede owote mere luŋ ginnoro luŋ ame otimere i kome. Oryeko mere ame mie tam kede dako mere te kobo ni, “Ka ce Mordekai ame aman doŋ rwommere malo kato megi-ni obedo Ajudaya, mom doŋ itwero pyem kadi acel, yin doŋ ibino dok adoka piny.”

¹⁴I kare ame gin onwoŋo pwod tye akop, akwena abaka te ru bino oko, ame kobo ni amito ni eru tero Aman oyotoyot iyi arama ame Ecita oyiko.