Read lango Ecita 7 Bible Online

Ecita 7 - lango bible

Ecita 7

¹I nino-nono abaka kede Aman te wot iyi arama ame Ecita oyiko.

²I nino me aryo mere, i kare ame gin onwoŋo otye omato koŋo, abaka dok te penyo Ecita ni, “Agoŋŋa Ecita, ŋo ame imito ni atim piri? Obino miyi. Ikwayo ŋo? Akadi nucu me locca, bino gire cobbere.”

³Ecita te gamo ni, “Ka ce ayomoro cuny abaka, dok ka ce abaka ye, myero tim ber kur neka, dok myero kur nek daŋ rokka.

⁴Pien wan doŋ ocatowa oko, an kede jona, ni myero nekwa oko, myero tyekwa ducu ni weŋ. Kono onwoŋo ocatowa acata me bedo opii, co kede mon, kono mom kopporo, pien can ame onwoŋo oneno, onwoŋo mom aromo poro kede rwenyo a lim abaka twal.”

⁵Abaka Akacuwera te kobbi Ecita ni, “Mannono ŋannono, en tye kwene, en dano ame timo kittono?”

⁶Ecita te gamo ni, “Akworwa ame dagowa-nono obedo lo-ni aracci, Aman.” Lworo te mako Aman arac meicel i nyim abaka kede agoŋŋere.

⁷Abaka te ya i dog camo arama kede akemo adwoŋ meicel, te wot oko i dyekal ame tye i ŋet ot abaka, cite Aman odoŋ cen me kwayo Ecita ni myero time kica kur neke, pien en onwoŋo oneno ni abaka doŋ oyikere me timo gin arac i kome.

⁸Kare ame abaka odwogo, eka te donyo i ot kan ame onwoŋo gin tye acamo arama iye, en onwoŋo Aman orumo aruma i ŋet twon kommoro adwoŋ kan ame Ecita obedo iye. Abaka te kobo ni, “En mito timo tim me anywar i kom agoŋŋa me awora kun aŋa aneno, kun daŋ timo i oda-gu?” Kare ame abaka okobo koppere-nono, ote ru tweyo waŋ Aman oko oyotoyot.

⁹Amiro abaka acel ame oroo, ame nyiŋe Karbona, ame onwoŋo gwoko abaka, i caa-nono te kobo ni, “Medo i kom mannono, yat adea ame Aman onwoŋo oyiko pi Mordekai ame koppere en a rik omio abaka obwot-ti tye i paco Aman, yat ame borrere tye futi pyerabiro wie abic twal.”

¹⁰Abaka te kobo ni, “Ŋabe i kom yattere-nono.” Mannono omio ote ŋabo Aman i kom yat deyo jo ame en rik oyiko me deyo Mordekai, Akemo abaka te doŋ kwe.