Read lango Ecita 8 Bible Online

Ecita 8 - lango bible

Ecita 8

¹I nino-nono abaka te miyo ot Aman baŋ agoŋŋere Ecita. Mordekai te doŋ bino i nyim abaka, pien Ecita onwoŋo otitte wat ame tye i akinagi kede Mordekai.

²Abaka te kwanyo atem ame onwoŋo okwanyo i ciŋ Aman te miyo baŋ Mordekai, Ecita te miyo Mordekai dit me loyo ot Aman.

³Ecita dok te medde kop kede abaka; en oryebere piny i nyim abaka, te cako bako doge kun kok i pig waŋe, ni myero juk yik Aman dano me Agag oko, me neko Ojudaya.

⁴Abaka te tiŋo abiro me loccere me jabu tutuŋ baŋ Ecita.

⁵Ecita te doŋ ya malo cuŋ acuŋa i nyim abaka. Ecita te kobo ni, “Ka ce abaka ye, dok ka ayomoro cuny abaka, kono ico waraga ijuko waraga Aman dano me Agag, wot Amedata oko, pien en onwoŋo oyiko kop me neko Ojudaya luŋ ame tye i te locci, yin abaka.

⁶Kara atwero diyo cuny niŋo me neno can ame abino i kom rokka kede i kom jo me doggolana?”

⁷Abaka te kobbi Ecita gin kede Mordekai ame obedo Ajudaya ni, “Nen doŋ atyeko miyo ot Aman oko baŋ Ecita, dok daŋ atyeko doŋ deyo Aman oko kun oŋabo i yat ame deyo jo, pien onwoŋo mito neko Ojudaya.

⁸Doŋ kop ame dok i kom Ojudaya, wun itwero wunu coyo waraga kite ame imito wunu, kun icoo wunu kede nyiŋa, ite diyo wunu atem abaka i kom odok ame omwono kede, pien cik ame ocoo i nyiŋ abaka dok odio atem abaka i kom odok ame omwono kede mom otwero loko.”

⁹Rik ote lwoŋo orani abaka i caanono, i dwe me adek, ame obedo dwe ame olwoŋo ni Civan, i nino dwe pyeraryo wie adek, rik ote coyo cik a mako Ojudaya kun ocoo kop ducu ame Mordekai ociko ni coo. Ocoo baŋ odoŋe ame loo lwak, oloc me dul lobo apapat, karacel kede baŋ oloc ame loo i dul lobo apapat cakere India tuno kede Eciopia, kun ocoo i dul lobo apapat ame romo mia acel kede pyeraryo wie abiro, kun ocoo baŋ dul lobo acel acel i nukuta ame gin ŋeo, dok i lebgi ikome.

¹⁰Waraga man rik ocoo i nyiŋ abaka Akacuwera ote mwono atem abaka i kom odok ame omwono kede. Oter-waraga ame riŋo aguragura en otero waraga, kun oriŋo aguragura adwir meicel, ame otio kedgi i tic abaka, ame onywalo i ot pito aguragura me loc.

¹¹Waraga man omio twer baŋ Ojudaya ame tye i boma acel acel me cokere karacel pi gwoko kwogi i baŋ okworgi, dok daŋ otwero nekogi, otwero tyeko onyo jwero monnyoro keken, onyo dul lobo moro keken ame obino me lweny i komgi, kede itinogi kede mongi, kun daŋ omito yako jamigi.

¹²I nino acel keken, nino dwe apar wie adek, me dwe me apar wie aryo, ame obedo dwe ame olwoŋo ni Adar, i dul lobo apapat ame tye i te loc abaka Akacuwera.

¹³Waraga me cikkono ame ocoo-nono myero pok i dullobo acel acel acalo cik, me wek rab koppere rom jo duc, me wek Ojudaya bed ame otere oko me culo kwor i kom okworgi ame bino mito nekogi.

¹⁴Okwena te yito i wi aguraguragi adwir wok-ca, ame rik otio kedgi ka i tic abaka, ote ru riŋo oko oyotoyot me cobo cik abaka. Cikkono daŋ rik ote poko i boma adit i Cuca.

¹⁵Mordekai te ya oko i nyim abaka kun oruko ruk me loc obedo bululu bululu kede en atar, kun oruko daŋ tok kwogo me jabu i wie, kede jor ame okwoo i boŋo camanini aber meicel, kede en obedo amaramar, kun jo luŋ i boma adwoŋ tye awoo i yomcuny adwoŋ meicel.

¹⁶Ojudaya te bedo ilelo, yomcuny, pwoc kede woro.

¹⁷I dullobo acel acel kede i boma acel acel ka cik abaka kede koppere otuno iye, Ojudaya bedo i yomcuny kede lelo adwoŋ okato kare, otedo arama, ote daŋ bedo i weo. Man omio jo apol i akina rok ocele omiye kengi ni gin daŋ obedo Ojudaya, pien lworo Ojudaya onwoŋo ocirogi oko.