Read lango Ecita 9 Bible Online

Ecita 9 - lango bible

Ecita 9

¹Doŋ i dwe me apar wie aryo, ame obedo dwe ame olwoŋo ni Adar, i nino dwe apar wie adek me dwe-nono, i kare ame kop abaka kede cikkere doŋ oceggi keto i tic, ame en nino acellono en obedo nino ame okwor Ojudaya rik tye kede gen me cako loyo Ojudaya, ento ame dok obin olokere odoko nino ame Ojudaya myero cak loyo iye okworgi.

²Ojudaya obedo cokere karacel i bomagi i dullobo acel acel ame onwoŋo tye i te loc abaka Akacuwera me neko jo ame onwoŋo oyikere me timogi rac. Ŋattoro mom onwoŋo romo cuŋ i nyimgi, pien lworo onwoŋo omako rok apapat ducu i komgi.

³Oloc luŋ me dul lobo apapat kede odoŋe a lwak kede oloc ame loo dul lobo apapat kede odoŋe ocele ame loo tic abaka, gin daŋ obedo konyo Ojudaya, pien i ot abaka rik onwoŋo olworo Mordekai atek meicel,

⁴dok nyiŋe te rwo atek romo dul lobo luŋ ame tye i te loc Akacuwera; twer ame Mordekai tye kede te medde ameda i bedo atek meicel.

⁵Mannono te miyo Ojudaya neko okworgi luŋ aluŋa, kun onekogi kede pala romo; obedo ŋolo ŋutgi calo dyaŋ, kun otimogi kite ame yigi omito.

⁶I boma adwoŋ me Cuca. Ojudaya oneko dok otyeko jo ame romo mia abic twal,

⁷dok oneko daŋ Pareandata, Dalpon, kede Acapata,

⁸Porata, Adalia, kede Aridata,

⁹Parmacata, Aricai kede Yaicata,

¹⁰ame gin luŋ oromo apar, dok gin luŋ obedo awobe Aman wot Amedata, ame obedo akwor Ojudaya. Cite gin mom oyako gigi moro.

¹¹Wel jo ame oneko i nino-nono. Ikome i boma adwoŋ me Cuca rik onyuto baŋ abaka.

¹²Abaka te kobbi agoŋŋere me awora Ecita ni, “I boma adwoŋ me Cuca Ojudaya oneko co ame romo mia abic, dok daŋ oneko awobe Aman apar oko. Kara doŋ ŋo ame ŋit ca otimo i dul lobo ocele mere ame tye i te locca! Kara gin aŋo doki ame myero atim piri? obino giri miyi. Ŋo ame dok ikwayo? Obino gire cobo piri.”

¹³Ecita te gamo ni, “Ka ce adwoŋŋa abaka, ye ni ber, myero yeyi Ojudaya ame tye i Cuca medde timo kite ame otimo kede tin-ni. Awobe Aman apar-ca myero ŋab komgi i kom yat me deyo jo.”

¹⁴Abaka daŋ te ciko ni myero man timere kittono; cik man rik ote miyo i boma me Cuca, omio ote ŋabo kom awobe Aman apar i kom yat me deyo jo.

¹⁵Ojudaya ame tye i boma me Cuca dok te medo cokere karacel i nino dwe apar wie aŋwen me dwe me Adar, ote dok medo neko co ocele ame romo mia adek i boma me Cuca. Cite mom oye yako gigi mogo.

¹⁶Ojudaya ame onwoŋo tye i boma ocele mege daŋ te cokere karacel me gwoko kwogi i dul lobo apapat. Gin rik ote neko okworgi oko a co ame romo tutumia pyerabiro wie abic; mannono te miyogi dok nwoŋo weo i kom okworgi ame onwoŋo dagogi. Cite gin mom oyako gigi moro.

¹⁷Man gin ame gin otimo i nino dwe apar wie adek me dwe me Adar, gin rik te weo i nino dwe apar wie aŋwen, ote miyo nino-nono bedo nino me kwero ecuban kede me yomcuny.

¹⁸Cite Ojudaya ame onwoŋo tye i boma me Cuca ocokere karacel i nino dwe apar wie adek kede i nino dwe apar wie anwen, omio gin doŋ te weo i nino dwe apar wie abic, kun omio nino-nono bedo ni no me kwero ecuban kede yomcuny.

¹⁹Mannono omio Ojudaya luŋ ame tye i akina pacci, ame tye i boma apapat, gwoko nino dwe apar wie abic me dwe me Adar acalo nino me bedo i yomcuny, nino me kwero ecuban kede nino me weo, dok obedo nino ame gin ocwao iye kit mot apapat ame cunygi okwanyo i akinagi kengi kengi.

²⁰Mordekai te coyo jami magi luŋ piny, te cwayo waraga baŋ Ojudaya luŋ ame onwoŋo tye i dul lobo apapat ame tye i te loc abaka Akacuwera, jo ame tye kannabor kede en ame tye kan aceggi,

²¹kun cikogi ni myero gin ogwok nino dwe apar wie aŋwen kede nino dwe apar wie abic me dwe me Adar mwaka i mwaka,

²²acalo nino ame Ojudaya onwoŋo iye weo iciŋ okworgi, dok acalo dwe ame obin oloko cangi odoko yomcuny, kumo olokere odoko weo. Ocikogi ni myero gin olok nino-nono obed nino me kwero ecuban kede nino me yomcuny, dok obed nino me cwayo mot apapat ame cunygi okwanyo luŋ i akinagi kengi kengi kede mot baŋ ocan.

²³Ojudaya te ye timo kite ame onwoŋo ocako kede, kun oye lubo kite ame Mordekai ocoyigi kede.

²⁴Pien Aman dano me Agag, wot Amedata, ame obedo akwor Ojudaya luŋ onwoŋo oyenyo yo me jwero Ojudaya oko, dok daŋ onwoŋo doŋ otyeko bolo kwir ame olwoŋo ni Pur me jejebo kede jwero Ojudaya odoco.

²⁵Cite i kare ame Ecati owoto i nyim abaka, abaka omio ocoo waraga ame kobo ni tim araccono i kom Ojudaya myero lokere dok i wie gire, dok daŋ ni en kede awobe mere myero ŋabgi i kom yat me deyo jo.

²⁶Mannono omio gin olwoŋo nino man ni Purim, kun oya i kom kwir ame olwoŋo ni Pur. Doŋ pi kop luŋ ame rik ocoo i waraga, kede pi can ame gin oneno pi kop man, kede gin ame obin otimere i komgi,

²⁷Ojudaya oye kop man kun omoko ni gin ikomgi kede ikwaegi kede jo luŋ ame bino ye notte kedgi, gin obino gwoko nino aryo-ni kite ame ocoo kede, kun ogwoko i kare ame rik ociko-nono ikome mwaka i mwaka aboŋo keŋ.

²⁸Nino aryo-ni gin obino poyo kun ogwoko naka i kare a lwagi jo me kare luŋ, obino gwoko i doggola ducu i dul lobo apapat kede i boma luŋ, dok Ojudaya myero kur wek kwero nino magi me Purim, kwero nino magi myero kur gik naka i kare ikwaegi luŋ.

²⁹Ecita agoŋ abaka me awora, nyaka Abikail, kede Mordekai ame obedo Ajudaya, te coyo waraga, kun omoko waraga me aryo i kom Purim.

³⁰Waraga-nono rik ocwao baŋ Ojudaya luŋ, ocoo i dul lobo apapat ame romo mia acel kede pyeraryo wie abiro ame tye i te loc abaka Akacuwera, kun ocoo i kop me kuc kede ateni,

³¹ni mannono nino me Purim myero gwok i kare ame ociko i kome, kite ame Mordekai ame obedo Ajudaya kede Ecita agoŋ me awora ociko kede Ojudaya, dok kite ame gin onwoŋo ociko kede pirgi kengi kede pi ikwaegi ame mako kop i kom kanyo kecgi kede kumogi.

³²Cik ame Ecita agoŋ abaka me awora ociko omoko cik man me Purim ote coyo me agwoka i buk.