Read lango Yaa 1 Bible Online

Yaa 1 - lango bible

Yaa 1

¹Nyiŋ awobe Icrael ame obino i Miciri karacel i Yakobo, kun ŋat acel acel bino i jo ode, gin ene:

²Reuben, Cimeon, Levi, Juda,

³Icakar, Jabulon, kede Benjamin,

⁴Dan kede Naputali, Gad kede Acer.

⁵Itino a Yakobo kede ikwae ikokome luŋ rik romo pyerabiro, kun Yucepu a rik doŋ tye i Miciri day tye iye.

⁶Icennere Yucepu kede omego mere luŋ te to oko, karacel kede olwakkigi luŋ.

⁷Cite ikwae Icrael onya, omedde atek meicel, ote poŋo lobo oko.

⁸Icennere abaka anyen a mom ŋeo Yucepu te cako loyo Miciri.

⁹En te kobbi jo mere ni, “Jo-nie, koŋ inenu ba jo Icrael, aman opol dok daŋ otek meicel, oloowa oko.

¹⁰Biye oŋol wunu ryeko moro me tic kedgi, ogeŋ wunu nyagi oko. Pien joni ka monnyoro bino cobowa, gin bino notte okworwa ote romo kedwa, eka gin gigi te ŋwec oko i lobowa.”

¹¹Mannono omio jo Miciri oketo odoŋe a loo tic, me ronogi i tic atek kun omiogi oyeo yee apek. Gin te gerri Parao boma me Pitom kede Ramecec, me kano cam.

¹²Cite ka oketo can i komgi, gin gigi dok omedde ameda inya, me poŋo lobo. Mannono omio jo Miciri omedde dago jo Icrael kede lworogi.

¹³Gin ote lido jo Icrael i tic agwa meicel,

¹⁴kun omiogi otio tic apek okato kare, me nyono lobo kede goyo matafali, kede kit tic ocele atek luŋ me poto. I ticcoro luŋ a rik gin tio, rik otio kedgi agwa meicel.

¹⁵Abaka me Miciri dok te ciko ocolmon a jo Eburania aryo, Cipira kede Pua, ni,

¹⁶“Ka it ye wunu ka colo mon a jo Eburania, ŋi wunu kit atin ame onywalo. Ka ce atin awo bi, nek wunu oko, ento ka nyako, wek wunu bed kwo.”

¹⁷Ocolmonnaca onwoŋo rikobedo mon a lworo Obaŋa; gin mom ote tiyo gin ame abaka me Miciri ocikogi iye. Gin gigi mom ote neko itino awobe.

¹⁸Abaka me Miciri te lwoŋo ocolmon, penyogi ni, “Kara piŋo itimo wunu kit man? Nen, wun mom ineko wunu itino a co!”

¹⁹Ocolmon te kobbi Parao ni, “Mon a jo Eburania pat meicel i mon a jo Miciri. Gin cunygi tek meicel, onywal ame ŋat a cologi mom ru otuno.”

²⁰Obaŋa rik te timo ocol-monnono ber, jo te medde ameda inya bedo apol.

²¹Pien ocolmon rik olworo Obaŋa, Obaŋa omiogi gin daŋ onwoŋo jo me pacogi ikokomgi.

²²Parao dok te ciko jo mere luŋ ni, “Atin awobi moro keken ame jo Eburania bino nywalo, myero ibol wunu oko i kulo Nail, cite anyira myero iwek wunu bed kwo.”