Read lango Yaa 10 Bible Online

Yaa 10 - lango bible

Yaa 10

¹Rwot dok te kobbi Muca ni, “Wot baŋ Parao, pien amio cunye dok odoko nwaŋ oko, karacel kede cuny omiro mere daŋ, me wek anyut anyutta magi i akinagi;

²me yin ibin ititti itinoni kede ikwai kite ame aloko kede jo Miciri obedo gi-tukona kede anyuttogo ame abedo tiyo i akinagi, me ine wunu ni an a Rwot.”

³Muca kede Aron daŋ ote wot donyo baŋ Parao, ote kobbe ni, “Rwot Obaŋa a jo Eburania okobo ni mano, ‘Yin ibino kwero mwolle i nyima pi kare arom mene? Wek jona woti me owot oti pira.

⁴Pien ka ce ikwero ni gin kur woti, nen ba, diki abino miyo lwak bonyo apipim wukere i loboni,

⁵te wumo lobo oko ipuk, ŋattoro mom tye ame bino neno lobo; bonyo bino camo ginnoro luŋ ame pee oweko, dok daŋ bino camo yenwu adoŋo i potti.

⁶Bonyonono bino daŋ poŋ i udiwu kede me omironi luŋ, naka i me a jo Miciri ducu: mannono bino bedo gin a welo meicel a yam papawu kede kwariwu mom oneno, cakere i nino ame onywalogi iye tuno naka atot tin.’ ” Eka en te lokere ya gire oko i nyim Parao.

⁷Cite amiro a Parao te kobbe ni, “Lo-ni kara bino bedo wunowa aman naka awene? Wek jo-ni woti, me owot oti baŋ Rwot Obaŋagi; yin mom ru iŋeo ni Miciri doŋ oballe oko?”

⁸Omio ote dwoko Muca kede Aron baŋ Parao, Parao te kobbigi ni, “Wot wunu doŋ, iwot iti wunu baŋ Rwot Obaŋawu, ento kara jo mene ame imito wunu ni woti?”

⁹Muca te gamo ni, “Wan luŋ obino wot, karacel itinowa kede odoŋewa, awobe kede anyirawa; obino tero daŋ limwa luŋ, dok kede dyegi kede kit lim ocele luŋ pien myero okwer nino adwoŋ baŋ Rwot.”

¹⁰Parao te gamo ni, “Rwot bed kedwu ka ce abino ye iwoto wunu karacel itinowu! Cite nen ba, wun itye wunu i tammoro arac i yiwu.

¹¹Pe twere, co keken ame tye i akinawu en abino wot woro Rwot pien mano en ame cunywu tye ka myel iye wok.” Ote ryemogi oko i nyim Parao.

¹²Rwot dok te kobbi Muca ni, “Rye ciŋi i wi lobo me bonyo wukere i lobo Miciri, cam ginnoro duc otu i lobo Miciri ame rik pee oweko.”

¹³Muca daŋ te tiŋo abiro mere malo i wi lobo me Miciri, Rwot te cwayo yamo pello i tuŋ kide te kodo i lobo dyeceŋnono kede dyeworrere benebene; kare ame piny oru, yamo me tuŋ kidenono onwoŋo okelo bonyo apipim.

¹⁴Bonyo te corre i lobo Miciri luŋ, lwak bonyo owukere apipim ame mom ru onen, dok mom daŋ bino nen.

¹⁵Pien bonyo mere owukere te wumo lobo oko ipuk ame piny te doko acol icuc, gin te camo ginnoro luŋ ame otu i lobo kede nyig yen luŋ ame pee yam oweko; ginnoro adyaka mom te doŋ kadi acel, kadi yat onyo ginnoro keken ame otu i poto moro i lobo me Miciri luŋ.

¹⁶Parao dok te ru lwoŋo Muca kede Aron, te kobbigi ni, “An doŋ abalo gira oko baŋ Rwot Obaŋawu, kede baŋwu.

¹⁷En omio tin akwaowu me tima kica; tima wunu doŋ ber icel-li keken, ikwa wunu Rwot Obaŋawu me kwany to man oko i koma.”

¹⁸Muca te ya oko i nyim Parao, to wot kwayo Rwot.

¹⁹Rwot te miyo yamo kodo atek kun opello i tuŋ to, te joyo bonyo coro i Nam Arema, bonyo moro mom odoŋ i lobo Miciri kadi acel.

²⁰Cite Rwot dok omio cuny Parao obedo nwaŋ, mom oye jo Icrael owoto.

²¹Rwot dok te kobbi Muca kede Aron ni, “Rye ciŋi malo i polo, me piny dok acol oko icuc i lobo me Miciri luŋ, colpiny ame dano twero winyo naka i kome.”

²²Muca te ryeyo bade malo i polo, piny daŋ te doko acol icuc atek ateka pi nino adek kun oromo lobo Miciri luŋ.

²³I kare-nono ŋattoro onwoŋo mom romo neno awottere, dok ŋattoro daŋ mom oya i kakare pi nino adekkono. Ento kan ame jo Icrael bedo iye piny gire onwoŋo tye aler.

²⁴Parao dok te lwoŋo Muca, te kobbe ni, “Wot iti wunu baŋ Rwot, itinowu daŋ myero wot karacel kedwu; cite limu luŋ, dok, dyegi kede kit lim ocele luŋ myero doŋ,”

²⁵Muca te gamo ni, “Yin doŋ myero imiwa mot me aŋola kede me awaŋa me yalo Obaŋa, me wan owot oyalli Rwot Obaŋawa.

²⁶Limwa luŋ myero owot kede, moro acel mom bino doŋ iŋewa, pien myero owot okwany mogo i akinagi me woro Rwot Obaŋawa; pien wan mom oŋeo gin a myero owot oti kede baŋ Rwot, tuno ka doŋ otuno kuno.”

²⁷Cite Rwot dok te miyo cuny Parao bedo nwaŋ, mom te yegi wot.

²⁸Parao te gamo ni “Ya oko i nyima, cite myero igwokere ba; kur dok imedde neno waŋa, pien nino ame ibino neno iye waŋa, nino-nono en ame ibino to iye.”

²⁹Muca te kobo ni, “Ka amannono, an gira mom dok abino neno waŋi.”