Read lango Yaa 11 Bible Online

Yaa 11 - lango bible

Yaa 11

¹Rwot okobbi Muca ni, “Pwod odoŋ can acel ame dok abino pwodo kede Parao kede jo Miciri; icennere doŋ bino wekowu iya wunu oko i kan. Kare ame en bino wekowu me wot, en bino ryemowu aryema.

²Aman yin doŋ myero ikobbi jo ni, ico acel acel myero kwa ico wadgi ame ceggi kede, dako daŋ kwa dako wadgi ame ceggi kede me gin miwu wel me ryal kede me jabu.”

³Rwot te miyo cuny jo Miciri bedo ayom i komgi. Dok daŋ dano-nono Muca rikobedo twon lo moro adit meicel i nyim omiro a Parao, kede i nyim jo luŋ.

⁴Muca te kobo ni, “Rwot okobo ni mano, Tin dyewor ka idiŋ, abino beo i dye Miciri;

⁵eka itino kao luŋ ame tye i Miciri te to oko, geye i kom atin kao a Parao ame bedo i wi kommere me loc, tuno kede i kom atin kao aŋeca ame bedo i ŋet kidi rego, anaka itino kao a limgi luŋ.

⁶Koko bino bedo dwoŋ meicel i lobo Miciri luŋ i kite a yam mom ru otimere, dok daŋ mom bino timere wannoro.

⁷Cite i kom jo Icrael, akadi dano onyo lee, gwokkoro mom bino ŋweyo, me ine wunu ni Rwot kara poko akina a jo Miciri kede jo Icrael.

⁸Omironi luŋ bino bino baŋa, obino ryebere i nyima kun okobba ni, ‘Wot giri karacel i jo luŋ a lubi.’ Icennere an doŋ abino wot.” Muca te ya oko i nyim Parao i twon akemo adwoŋ meicel.

⁹Rwot dok te kobbi Muca ni, “Parao gire mom bino winyo koppi, me taŋona medde rom lobo Miciri luŋ.”

¹⁰Muca kede Aron te tiyo taŋo-nono luŋ i nyim Parao; ento Rwot omio gire cuny Parao obedo nwaŋ, mom oye jo Icrael oya i lobo mere.