Read lango Yaa 12 Bible Online

Yaa 12 - lango bible

Yaa 12

¹Rwot okobo i Muca kede Aron i lobo Miciri ni,

²“Dwe man bino bedo dwe me agege a geo mwaka.

³Titti wunu jo Icrael luŋ ni nino dwe apar me dwe man, dano acel acel bino kwanyo atin romo, kit ame doggola a kwarigi tye kede, atin romo acel acel pi ot acel acel.

⁴Ka ce ottoroni tidi, ame mom romo tyeko riŋo atin romo luŋ, won ottono kede aŋete, ame ode ceggi i mege, gin bino kwanyo romo ame romo wel jo ame tye baŋgi. Ibino kwanyo wunu atin romo ame romo kit a dano acel acel twero camo kede.

⁵Atin romo ame akwanyo myero bed aber, ame roccoro mom i kome, nyok me mwaka acel. Ibino kwanyo wunu i akina romi onyo i akina dyegi.

⁶Gwok wunu naka i nino dwe apar wie aŋwen me dwe man, icennere lwak jo Icrael luŋ bino neko romi megi oko otyeno.

⁷Dok myero jol remo moro ote kiro i yen doggola ryoryo kede i kom yen aria i malo mere, i udi ame bino camogi iye.

⁸Riŋo myero cam oko i dyeworrono kun abula abula; myero cam ogati a tobi mompe iye kede pot dekkogo akec.

⁹Kur mwod riŋo moro anumu onyo ame otedo i pii, ento myero butl ducu abula, anaka wie, tyene kede jami yie luŋ.

¹⁰Kur wek ginnoro doŋ tuno idiko; ka ce ginnoro odoŋ ame otuno naka odiko, myero waŋ oko.

¹¹Ibino camo wunu kit man: ibino wunu tweyo pyerwu, kun iruko wunu amuk i tyenwu, kun abiro daŋ tye i ciŋwu; ibino camo wunu abunyebunye. Mannonoen Kato a Rwot.

¹²Pienabino bea i dye lobo Miciri dyeworrono, ate neko itino kao luŋ ame tye i lobo Miciri, mea dano kede mea leyi, kun acobo kop luŋ ame doŋ aŋolo i kom kit obaŋa ocele luŋ me Miciri; an a Rwot.

¹³Remo bino bedo gin a nyuto udi ame wun itye wunu iye; ce aneno remo, abino kato gira akata i wiwu malo. Cannoro mom bino poto i komwu ame twero nekowu, i kare ame abino pwodo kede lobo Miciri.

¹⁴“Nino man bino bedo nino me poyo wiwu, ame ibino gwoko wunu bedo nino adwoŋ baŋ Rwot; ibino kwero wunu karacel kede ikwaewu luŋ, me bed cik ame ibino gwoko wunu nakanaka.”

¹⁵Ibino wunu camo ogati a tobi mompe iye pi nino kany wie aryo; i nino me agege, myero ikwany wunu tobi luŋ i ot, iony wunu oko. Ka ce ŋattoro bino camo ogati a tobi tye iye, cakere i nino me agege-nono tuno kede i nino me abiro, dano-nono waŋe bino rwenyo oko i akina jo Icrael.

¹⁶I nino me agege ibino bedo wunu kede cokere acil; i nino me abiro daŋ ibino bedo wunu i cokere acil. I nino-nono luŋ mom ibino wunu tiyo ticcoro; kono ka gin ame jo luŋ camo, en ame itwero wunu yiko.

¹⁷Ibino wunu kwero ecuban me ogati a tobi pe iye, pien nino-nono ikome en a rik akwanyo iye atekerewu luŋ i lobo Miciri; pi mannono, myero ikwer wunu nino-nono obed cik ame ibino gwoko wunu nakanaka, wun karacel kede ikwaewu.

¹⁸I dwe me agege, i nino dwe apar wie aŋwen otyeno, ibino wunu camo ogati a mompe orubu i tobi naka i nino dwe pyeraryo wie acel otyeno.

¹⁹I nino kany wie aryo-nono myero tobi moro kur nwoŋere i udiwu; pien ŋat ame bino camo ginnoro ame tobi tye iye, dano-nono waŋe bino rewnyo oko i akina jo Icrael, kadi en welo onyo dano ame onywalo i lobowu.

²⁰Mompe ibino wunu camo cemmoro a tobi tye iye; kan ame ibino wunu bedo iye luŋ, ibino wunu camo ogati a tobi mom iye.

²¹Muca te lwoŋo odoŋe me Icrael ducu, te kobbigi ni, “Apee wot iyer wunu itino romi acalo doggolawu tye kede, me inek wunu atin romo me Kato.

²²Tur wunu jaŋ ogudo, ite luto wunu i remo ame tye i gwata; kir wunu i kom yen aria i malo mere kede i yen doggola ryoryo. Ŋattoro i akinawu kur donnyo oko i ode tuno ka piny oru.

²³Pien Rwot bino bebea kato pi neko jo Miciri; ka Rwot bino neno remo i kom yen aria me doggola kede i kom yen aryo me doggola, Rwot bino kato i wi doggola malo, mom bino ye anek donyo i udiwu me nekowu.

²⁴Gwok wunu kop man bed cik ame ibino wunu gwoko karacel kede ikwaewu nakanaka.

²⁵Ka ibino tuno wunu i lobo ame Rwot bino miyowu kit a rik ociko, myero ibed wunu tiyo tic man pira.

²⁶Ka ce itinowu bino penyowu ni, ‘Kodi timmi kara te koppere ŋo?’

²⁷Wun ibino wunu dokkigi iye ni, ‘Man mot ame oŋolo me yalo Obaŋa pi Kato mere, pien Rwot rik okato akata i malo i wi udi a jo Icrael i lobo Miciri i kare ame nek kede jo Miciri, eka te weko gire udiwa.’ ” Jo te kulo wigi piny woro Obaŋa.

²⁸Jo Icrael te wot daŋ timo kittono; otimo kite acalo Rwot ociko i Muca kede Aron.

²⁹I dye idiŋ, Rwot oneko itino kao luŋ me Miciri; ogeo i kom atin kao a Parao ame yam bedo i kommere me loc, tuno kede i kom atin kao opii ame tye i buc, karacel itino kao a leyigu.

³⁰Parao te ya malo iwor karacel omiro mere luŋ kede jo Miciri luŋ. Koko rik te wo atata i lobo Miciri luŋ pien mom tye ottoro a rik odoŋ a mom dano oto iye.

³¹Parao te lwoŋo Muca kede Aron i dyeworrono, te kobbigi ni, “Ya iwot wunu oko i akina jona, wun karacel i jo Icrael luŋ; wot iti wunu baŋ Rwot, acalo rik ikwao wunu.

³²Wotu i limwu luŋ: dok kede dyegi kede kit lim ocele luŋ, kit a rik ikobo wunu kede; wotu, lamma wunu daŋ gum!”

³³Jo Miciri te bedo bunyo jo Icrael abunya, kun omito ni gin ru ya oko i lobogi. Gin obedo kobo ni, “Nen, wan ducu doŋ oto oko.”

³⁴Pi mannono, omio jo Icrael te kwanyo moko a mom orubo i tobi, kede tako me rubo moko ogati ame onwoŋo gin oboo i gi-wumgi, ote ryoŋo i wi gwokgi.

³⁵Jo Icrael te tiyo kite a rik Muca ocikogi kede; ote kwayo wei me ryal kede me jabu, kede boŋŋi i baŋ jo Miciri.

³⁶Rwot te miyo cuny jo Miciri bedo ayom i kom jo Icrael, jo-nono te mimiogi jami ame gin okwao. Gin te yako jo Miciri kittono.

³⁷Jo Icrael te cako wotgi i Ramecec naka i Cukot; co ame owoto i tyengi romo tutumia mia abicel kun mon kede itino mom okwano iye.

³⁸Jo ocele apipim ame rokgi papat daŋ owoto kedgi, karacel i lim daŋ ecipan, dyegi kede dok, kede kit lim ocele luŋ.

³⁹Gin te tedo capat i moko ame ojebo aboŋo tobi i tako me rubo moko ogati, pien obedo bunyogi abunya me ya oko i lobo Miciri, omio gin mom oyiko ginnoro me dwoko lao doggi iyo.

⁴⁰Kare ame jo Icrael obedo kede i Miciri oromo mwaka mia aŋwen kede pyeradek.

⁴¹A doŋ mwaka mia aŋwen kede pyeradek otum, i nino me agikki mere ikome, en ame mony a Rwot oya kede i lobo Miciri.

⁴²Dyeworrono en ame Rwot obedo kuro iye kare me kwanyogi oko i lobo me Miciri. Dyewor acellono daŋ en ame jo Icrael kede ikwaegi pwod kwero pi kuro Rwot.

⁴³Rwot te kobbi Muca kede Aron ni, “Man en cikkogo ame mako Kato: arokkoro mom bino camo;

⁴⁴ento opii luŋ ame yam owilo i lim, gin bino camo ka ce onwoŋo doŋ olirogi.

⁴⁵Welo moro onyo apakaca moro mom bino camo.

⁴⁶Obino camo i ot acel keken; mom daŋ ibino wunu donnyo i riŋo moro oko kun iya kede i ot, dok mom daŋ obino turo cogo moro iye.

⁴⁷Jo Icrael luŋ bino kwero nino man.

⁴⁸Ka ce arokkoro ame bedo i akinawu mito kwero Kato baŋ Rwot, myero kon ge liro co luŋ ame tye baŋe, en amio en daŋ doŋ te nyiggo cako kwero; en doŋ bino bedo arom i dano onywalo i lobowu. Cite ŋat a mom oliro, myero mom cam.

⁴⁹Cik bino bedo acel keken pi anywalli kede orok ame bedo i akinawu.”

⁵⁰Jo Icrael luŋ te daŋ timo kittono; kite acalo Rwot yam ociko i Muca kede Aron, gin otimo kittono.

⁵¹I kom nino-nono ikokome en ame Rwot rik okwanyo iye jo Icrael oko i lobo Miciri, kun owoto olubere atekere atekere.