Read lango Yaa 13 Bible Online

Yaa 13 - lango bible

Yaa 13

¹Rwot okobbi Muca ni,

²“Kwer itino kao luŋ bed mega; dano moro onyo lee moro keken iyi Icrael ame ogeo yabo ot nyodo, ginnono luŋ mega.”

³Muca okobbi jo ni, “Myero ipo wunu nino man ame iya wunu iye i Miciri, i ot me opii, pien Rwot okwanyowu i kan pi teko me ciŋe. Mom ibino wunu camo ogati ame orubo i tobi.

⁴I dweni, ame en dwe me Abic, wun doŋ ibino wot wunu oko,

⁵Doŋ ka Rwot bino terowu i lobo a jo Kanaan, jo Kitti, jo Amor, jo Kivi kede jo Jebuc, ame en yam ocikere pire baŋ kwariwu ni ebino miyowu, lobo ame opoŋ i cak kede moo kic, ibino tiyo wunu tic man pira i dwe-ni.

⁶Ibino wunu camo ogati a tobi mompe iye pi nino kany wie aryo; eka i nino me abiro mere ite kwero wunu nino adwoŋ baŋ Rwot.

⁷Ogati a tobi mompe iye en ame ibino camo wunu pi nino kany wie aryo. Ogati ame orubo itobi, anaka tobi daŋ, mom bino nen baŋwu i lobowu luŋ.

⁸I nino-nono ibino kobo wunu baŋ itinowu ni, ‘Man otimere pi gin a rik Rwot otimo pira i kare acon ame aya i lobo me Miciri.’

⁹Doŋ me poyo wiwu i gin otimere-nono, kop man obino coyo te bino bedo acalo anyut i ciŋwu, dok daŋ ibino tweyo wunu i tur nyimwu me ibed wunu kobo cik a Rwot; pien Rwot okwanyowu i Miciri pi ciŋe atek.

¹⁰Pi mannono, gwok wunu cik man mwaka i mwaka i kare ame ociko ikome.

¹¹“Ka Rwot bino terowu i lobo a jo Kanaan, acalo rik okwoŋo baŋwu kede baŋ kwariwu, te miyowu,

¹²ibino miyo wunu itino luŋ ogeo yabo ot nyodo baŋ Rwot. Itino kao a limwu daŋ luŋ ame twoni, bino bedo mea Rwot.

¹³Atin kana me kao obino lakoro i nyok romo, onyo ka ce mom olakoro, obino mojoro ŋute oko. Atin awobi me kao acel acel ame tye i akina itinoni, ibino daŋ lakoro.

¹⁴Doŋ ka waŋŋoro anyim atinni bino penyi ni, ‘Man kono kara te koppere ŋo?’ ibino kobbe ni, ‘Rwot rik okwanyowa oko i lobo Miciri i ot me opii i ciŋe atek.

¹⁵Pien i kare a rik Parao okwero oko atek ateka ni wan kur owoti, Rwot oneko itino kao luŋ me Miciri, itino kao mea dano kede mea leyi. Mannono en omio amio baŋ Rwot twoni luŋ ame ogeo yabo ot nyodo; ento awobena me kao luŋ alakoro oko,’

¹⁶Bino bedo acalo anen i ŋut ciŋi onyo gin ame otweo i tur nyimi; pien Rwot yam okwanyowa oko i Miciri kede ciŋe atek.”

¹⁷Kare a doŋ Parao oweko jo owoto, Obaŋa mom otelogi i yo a dok tutuŋ lobo a jo Piriciti, kadi bed rik yo mere onwoŋo ceggi; pien Obaŋa okobo ni, “Ka jo-ni bino rwatte i mony, cunygi bino bale oko, ote lokere dokoko ceŋ i Miciri.”

¹⁸Ento Rwot otelogi kun mano kedgi piny i yo a dok tutuŋ tim ame otikere i Nam Arema. Jo Icrael rik te ya oko i lobo Miciri kun daŋ oyikere i jami lweny.

¹⁹Muca te kwanyo cogo kom Yucepu te wot kede; pien rik onwoŋo Yucepu omio jo Icrael okwoŋo kwoŋ atek, kun okobo ni, “Obaŋa bino limowu; myero itiŋ wunu cogona oko i kan, iwot wunu kede.”

²⁰Gin oya i Cukot ote wot guro kemagi i Etam i dog tim.

²¹Rwot otelo nyimgi i pagi me pol dyeceŋ ame ocuŋ malo kun nyuttigi yo, eka dyewor te telo nyimgi i mac ame ocuŋ malo me menyo piny; me gin bed wot dyeceŋ kede dyewor;

²²kun pagi me pol telogi icen kede me mac dyewor, ame mom oya i nyim lwak.