Read lango Yaa 14 Bible Online

Yaa 14 - lango bible

Yaa 14

¹Rwot dok te kobbi Muca ni,

²“Kobbi jo Icrael dok ceŋ i ŋegi me owot ogur kemagi i nyim Pikakirotiakina Migdol kede nam, i nyim Baal-jepon, iwot igur kemawu tikere kede, i dog nam,

³Pien Parao bino kobo kop i kom jo Icrael ni, ‘Neno doŋ otye owiwira atata; tim daŋ tye ocegere oko i nyimgi.’

⁴Abino dok miyo cuny Parao bedo nwaŋ, en bino ryemo yorwu; mano bino miyo anwoŋo kwogo i kom Parao karacel i monnyere luŋ, te miyo jo Miciri ŋeyo ni an a Rwot.” Gin daŋ te timo kittono.

⁵Kare ame otitti abaka me Miciri ni jo Icrael doŋ olwi, oriŋo oko, Parao abaka me Miciri kede omiro mere te dok loko cunygi oko i kom jo Icrael, te kobo ni, “Gin aŋo ame wan otimonie, me weko jo Icrael ya oko i dog ticwa, ote wot oko?”

⁶Tammono omio en oyiko gadigadi mere me lweny, te telo monnyere.

⁷Owoto i gadigadi ame oyero mia abicel, kede dok gadigadi ocele me a jo Miciri kun woto daŋ odoŋe a telogi luŋ.

⁸Obaŋa te miyo cuny Parao abaka me Miciri bedo nwaŋ, te ryemo yo jo Icrael ame onwoŋo owoto oko apala apala.

⁹Jo Miciri oryemo yorgi kun Parao woto aguragura mere luŋ, kede gadigadi ecipan, karacel i wegi aguragura kede monnyere ducu; gin te mako jo Icrael kan ame gin oguro kemagi iye i ŋet nam, ame ceggi i Pi-kakirot, a tye i nyim Baal-jepon.

¹⁰A doŋ Parao ceggi kedgi, jo Icrael otiŋo waŋgi malo, ote neno jo Miciri tye aciro i ŋegi. Lworo te makogi atek meicel; ote kok atek baŋ Rwot,

¹¹eka ote kobbi Muca ni, “Pien lyelle me yiko jo onwoŋo mom i Miciri bo, omio yin ikelowa me bino to i tim kan? Kara itimowa aman piŋo ba, me miyowa ya oko i Miciri?

¹²Mom rik okobbi i Miciri ni, ‘Wekwa obedi, otiyi jo Miciri’? Tikatika rik oti giwa baŋ jo Miciri, kato ame oto nono i tim ata kan.”

¹³Muca te kobbi lwak ni, “Kur ilwor wunu, cuŋ wunu atek, me inen wunu kit ame Rwot bino larowu kede tin; pien jo Miciri ame tin ineno wununi, mom dok ibino neno wunu atwal.

¹⁴Rwot bino lweny pirwu, wun bedu ka mot.”

¹⁵Rwot te penyo Muca ni, “Ikok kara baŋa piŋo? Kobbi jo Icrael wot anyim.

¹⁶Tiŋ abironi malo, ite ryeyo ciŋi i wi nam, me pokere aryo wek jo Icrael be i dye nam otwo.

¹⁷An abino miyo cuny Parao bedo nwaŋ, gin daŋ ote lubo yorwu; man bino miyo anwoŋo kwogo i kom Parao karacel i monnyere, kede gadigadi mere kede wegi aguragura mere.

¹⁸Ka doŋ atyeko nwoŋo kwogo i kom Parao kede gadigadi mere kede wegi aguragura mere, jo Miciri bino ŋeyo ni an a Rwot.”

¹⁹Icennere amalaika a Rwot ame onwoŋo rik telo nyim mony a jo Icrael te ya oko i nyimgi dok i ŋegi karacel i pagi me pol daŋ te dwogo i ŋegi,

²⁰gin luŋ ote cuŋ i akina mony a jo Miciri kede mea jo Icrael. Pol kede piny acol icuc daŋ te bedo tye. Dyeworrono luŋ monnyoro i akinagi mom onoko wadgi i ceggi naka piny oru.

²¹Muca te ryeyo ciŋe i wi nam, Rwot te miyo yamo okodo atek dyewor benebene kun oya i tuŋ kide coro dye nam; te miyo pii i nam dokoko ceŋ, te loko nam doko kan otwo, kun pii opokere tuŋi i tuŋi.

²²Jo Icrael te wot beo gigi kan otwo, kun pii ocuŋ bala cel i ciŋgi tuŋ cem kede tuŋ cam.

²³Jo Miciri daŋ te luba yorgi, ote donyo daŋ i dye nam, karacel aguragura a Parao luŋ, kede gadigadi mere kede wegi aguragura mere.

²⁴Kare ame onwoŋo gin tye akuro rupiny, Rwot onwoŋo gire tye i pagi me mac kede me pol kun neno mony a jo Miciri. En obabaŋo mony a jo Miciri oko,

²⁵kun mako tyen gadigadigi, te miyogi doŋ ŋwec nyudunyudu. Jo Miciri te koko ni, “Oriŋ wunu oko i nyim mony a jo Icrael; pien Rwot tye alweny pirgi i kom jo Miciri.”

²⁶Rwot dok te kobbi Muca ni, “Rye ciŋi i wi nam me pii dwog corre i kom jo Miciri kede i kom gadigadigi, kede wegi aguraguragi.”

²⁷Muca daŋ te tiŋo ciŋe i wi nam, pii daŋ te cako dokoko kakare ka ibayi-ni. Jo Miciri onwoŋo tye ka ŋwec, Rwot te loro wigi luŋ i dye nam.

²⁸Pii odwogo te mwonyo gadigadi, wegi aguragura, kede mony a Parao luŋ a rik olubo jo Icrael i nam; ŋattoro acel i akinagi mom gire obwot.

²⁹Ento jo Icrael owoto gigi kan otwo i dye nam, kun pii odoko celgi ame ocuŋ i ciŋgi tuŋ cem kede tuŋ cam.

³⁰Rwot rik olaro jo Icrael i ciŋ jo Miciri kittono, i nino-nono, eka jo Icrael te neno kom jo Miciri ame oto oradde i dog nam.

³¹Kare ame jo Icrael oneno tic atek ame Rwot otio i kom jo Miciri, gin olworo Rwot; ote daŋ geno Rwot karacel kede amiro mere Muca.