Read lango Yaa 15 Bible Online

Yaa 15 - lango bible

Yaa 15

¹Muca karacel i jo Icrael te doŋ wero wer man baŋ Rwot kun okobo ni, “Abino wer baŋ Rwot, pien doŋ otiŋeree malo i kwogo; oonyo aguragura kede wegigi i nam.

²Rwot en ka ŋwecca kede akonnya, en doŋ Lalar mera Man en Obaŋana ame abino pako, en Obaŋa a kwarona ame abino dworo nyiŋe.

³Rwot en twon a romo atek meicel, ame nyiŋe Rwot.”

⁴“En oonyo gadigadi a Parao karacel i monnyere i nam, twoni ame oyero luŋ omwonyere oko i Nam Arema.

⁵Pii atut omwonyogi oko; gin luŋ olwiny oko i te kut bala gweŋ.”

⁶“Ciŋi me tuŋ cem tek meicel, ama Rwot, ciŋi me tuŋ cem ŋinyo okwor oko, ama Rwot.

⁷Pi dit me kwogoni, omio ireto okwor oko piny; icwao akemoni owawaŋogi oko bala yugi.

⁸Ewura me wumi omio pii otiŋere malo, pii amol oyenyo te cuŋ igun; pii atut omakere ocuŋ karacel ikiŋ i cuny nam.

⁹Okwor rik onwoŋo kobo ni, ‘Abino ryemo yorgi, amakogi, abino poko lim ayako, te yomoro cunya, abino woto pala romona, ate tyekogi kede oko.’

¹⁰Yin rik imio yamoni okodo, nam te mwonyogi oko; gin omwonyere i te twon pii adwoŋ bala atyeŋ kidi.

¹¹Ŋa i akina obaŋa ocele luŋ ame rom kedi, ama Rwot? Ŋa ocele ame tye i kwogo dok daŋ cil bala yin? Gin itio obedo me kwogo kede me awura ame kela myelkom.

¹²Rik iryeo ciŋi me tuŋ cem, lobo te mwonyogi oko,

¹³Pi marri a mom lokere itelo rok a yam ilaro, pi tekoni igwoko, ite kelogi i kabedoni acil.

¹⁴Jo owinyo pire komgi te myel; rem me lworo doŋ ociro jo Piriciti oko,

¹⁵Kare-nono cuny rwode me Edom oŋabere aŋaba, lworo oonyo koyo oko i kom odoŋe me Moab, jo Kanaan onwoŋo doŋ onyobere luŋ aluŋa.

¹⁶Myelkom me lworo onwoŋo doŋ ocirogi oko, teko me ciŋi omio gin ocuŋ mot bala kidi, tuno ka joni okato oko i ŋetgi, ama Rwot, tuno ka jo ame iwilo doŋ okato.

¹⁷Ibino iterogi ite wot pitogi i wi kidini acalo yat, kan ame iyiko me kabedoni, ama Rwot, kabedo acil ame yam ciŋi omoko.

¹⁸Rwot gire bino bedo abaka nakanaka.”

¹⁹Pien kare ame aguragura a Parao kede gadigadi mere kede wegigi ocako donyo i nam. Rwot oweko pii nam odwogo i komgi; aco jo Icrael obeo kan otwo i dye nam.

²⁰Eka Miriam am in Aron ame obedo adwarpiny a dako te kwanyo ajaa i ciŋe; mon ocele luŋ te daŋ kwanyo ajaagi joye kede i yore kun omyelo.

²¹Miriam te cakkigi wer ni, “Wer wunu baŋ Rwot, pien doŋ otiŋere malo i kwogo; obolo aguragura kede wegigi i nam.”

²²Muca dok otelo jo Icrael kun ya kedgi i Nam Arema, woto kedgi i nyim, eka gin te wot naka i tim me Cur. Gin owoto i timmono wot me nino adek, mom ote nwoŋo pii.

²³Kare ame gin otuno i Mara, mato pi i kuno te loyogi oko, pien pii mere onwoŋo kec akeca; en omio olwoŋo ni Mara.

²⁴Jo te bedo ŋuŋura i kom Muca, kun okobo ni, “Wan obino mato ŋo?”

²⁵Muca te kok baŋ Rwot, eka Rwot te nyutte yattoro, en te bolo yatono i pii, eka pii te doko amit. Rwot te miyogi icwil kede cik kuno, eka daŋ te omo yigi kuno,

²⁶kun kobo ni, “Ka ce ibino wunu winyo kop a Rwot Obaŋawu i cunywu luŋ, kun itio wunu gin a tye atira i nyime, dok daŋ igwoko wunu gin a en ociko kun imako wunu cikkere kede icwillere luŋ, two moro mom bino makowu bala en a rik ami mak jo Miciri; pien an a Rwot, an acaŋo twowu.”

²⁷Kare ame gin dok otuno Elim, kan ame rik tye iye akoŋ apar wie aryo, kede otit pyerabiro, gin oguro kemagi i ŋet pii-nono.