Read lango Yaa 16 Bible Online

Yaa 16 - lango bible

Yaa 16

¹Gin te ya oko i Elim, jo Icrael luŋ te donyo i tim me Cin, ame tye i akina Elim kede Cinai; gin odonyo iye i nino dwe apar wie abic me dwe me aryo mere ame gin oya kede i Miciri.

²Jo Icrael luŋ te ŋuŋura i kom Muca kede Aron i tim,

³kun okobbigi ni, “Kono rik Rwot onekowa i Miciri, kan ame rikobedo iye i ŋet weer rinowa, dok daŋ ocamo giwa kwon oyen; ento yin ikelowa kan i tim mene ko wan lwak joni luŋ i kec.”

⁴Rwot dok te kobbi Muca ni, “Nen ba, abino cwayiwu kwon i polo kun cwer bino baŋwu bala kot. Jo bino wot coko nino luŋ ame romo me nino acel acel, me koŋ anengi kede kace gin bino gwoko cikka onyo pe.

⁵Cite i ceŋ me abicel ka gin bino yiko gin ame ocoko, gin bino coko adwoŋ ame kato me nino ducu tyen aryo.”

⁶Muca kede Aron daŋ te kobbi jo kittono, kun okobo ni, “Tin otyeno ibino wunu ŋeyo ni Rwot kara en a yam okelowu iya i Miciri,

⁷kede odiko daŋ ibino wunu neno kwogo a Rwot, pien en otyeko winyo ŋuŋurawu ikome. Kara wan odoko na ba, ame iŋuŋura wunu i komwa-ni?”

⁸Muca te kobo ni, “Ka Rwot tin bino miyowu riŋo me acama otyeno, dok daŋ bino miyowu kwon ame romo yeŋowu odiko, mano nwoŋo otimere pien Rwot nwoŋo owinyo ŋuŋurawu ame iŋur wunu kede i kome. Wan kara odoko na ba, ame iŋuŋura wunu i komwa-ni? Ŋuŋurawu mom tye i komwa ento i kom Rwot gire.”

⁹Muca te kobbi Aron ni, “Kob baŋ lwak jo Icrael luŋ ni, ‘Biye wunu ceggi i nyim Rwot, pien otyeko winyo ŋuŋurawu.’ ”

¹⁰I kare ame rik Aron onwoŋo tye akop i jo Icrael luŋ, gin rik te neno tuŋ tim, cite nen, kwogo a Rwot te nen i pol.

¹¹Rwot te kobbi Muca ni,

¹²“Doŋ atyeko winyo ŋuŋura a jo Icrael. Kobbigi ni, ‘Tin otyeno gin bino camo riŋo, kede diki odiko gin bino camo kwon ote yeŋ, ame bino miyo gin oŋeo ni an a Rwot Obaŋagi.’ ”

¹³Wi otyeno aluru te bino ame omwono ka gonygi oko, eka odiko daŋ toyo te luk guro ŋet gonygi oko.

¹⁴Kare ame toyo doŋ oony oko, ginnoro te doŋ piny ame oŋiŋida atitino bala pok rec, kun tye atitino bala bwoo pee ame odoŋ i lobo.

¹⁵Ka jo Icrael oneno, gin okobo kengi kengi ni, “Man kara gin aŋo?” Pien onwoŋo gin rik mom ru oniaŋ kittere. Muca te kobbigi ni, “Man en kwon ame Rwot omiowu me acama.

¹⁶Gin ame Rwot ociko ene: ‘Dano acel acel myero cok mege a romo acama mere; myero job i gwata omer acel pi dano acel acel, ame romo wel jo ame dano acel acel tye kede i kema mere.’ ”

¹⁷Jo Icrael daŋ te timo kittono; jo mogo te coko anonok, jo mogo ocoko adwoŋ adwoŋa.

¹⁸Cite i kare ame oporo iyi omer, ŋat ame ocoko mege abup, moro mom odoŋŋe, ŋat ocoko aduno, moro mom orem, pien ŋat acel acel onwoŋo ocoko ame eromo camo.

¹⁹Muca te kobo baŋgi ni, “Ŋattoro kur wek moro doŋ tuno naka odiko.”

²⁰Cite gin mom te winyo kop a Muca; jo mogo te weko doŋ tuno naka odiko, eka ote nwoŋo ocako nywalo kudi oko, kun okwok aŋwe meicel; akemo te mako Muca atek i komgi.

²¹Gin te bedo coko amannono nino luŋ odiko, kun ŋat acel coko oromo acama mere; cite ka ceŋ odoko alyet, meye gire oko.

²²I nino me abicellere, gin ocoko kwon adwoŋ ame kato me nino luŋ tyen aryo, ame romo gwata omer aryo aryo. Kare ame otelgi luŋ obino otito koppere baŋ Muca.

²³Muca okobbigi ni, Rwot rik onwoŋo ociko ni mano, “Nino a diki-ni, obedo nino me weo mot, en cabit acil a Rwot. Bul wunu gin ame imito wunu bu lo oko, ted wunu daŋ gin ame ibino mito wunu tedo oko; en ame odoŋŋere ite kano wunu, me igwok wunu naka diki odiko.”

²⁴Gin daŋ te timo amannono; ote kano, gwoko tuno naka odiko kite a Muca ocikogi kede, cite mom gire te kwok aŋwe kun kudi onywal iye.

²⁵Muca te kobo ni, “Cam wunu tin mannono, pien tin obedo cabit a Rwot; mom tin ibino nwoŋo wunu moro ocele i bar.

²⁶Ibino wunu coko pi nino abicel keken, ento i nino me abiro, mom bino bedo tye; nino-nono obedo cabit.”

²⁷I nino me abiro jo ocele owoto ni owot coko, ento mom ote nwoŋo.

²⁸Rwot te kobbi Muca ni, “Ibino kwero wunu gwoko koppa kede cikka naka awene?

²⁹Nen ba! Rwot doŋ omiowu ceŋ me cabit; en gin omio i nino me abicel en miowu kwon ame romo acama nino aryo. I nino me abiro, myero dano acel acel bed mot i kabedo mere, ŋattoro kur ya i kabedo mere te wot kan ocele i nino me abiro.”

³⁰Pi mannono, jo luŋ owe mot i nino me abiro.

³¹I kare-nono, jo me ot Icrael te cako nyiŋ kwonnono ni manna; rik onwoŋo cal i ocere atar, kun mit dok lim bala moo kic onwano i nino.

³²Muca dok te kobo ni, “Rwot ociko ni ba, ‘Myero gwok moro ame romo gwata omer acel tuno naka i kare ikwaewu, me gin daŋ bin nen kit kwon ame rik apitowu kede i tim, i kare ame rik akwanyowu oko i lobo Miciri.’ ”

³³Muca te kobbi Aron ni, “Kwany gulu, ite onyo iye manna ame romo gwata omer acel, me iket i nyim Rwot, wek bed me agwoka naka i kare ikwaewu.”

³⁴Aron daŋ te tiyo kit a Rwot ociko kede Muca, te keto i nyim canduk kop me caden, me bed me agwoka.

³⁵Jo Icrael te camo manna mwakki pyeraŋwen twal, naka ka gin otuno i lobo ame oromo bedo iye; gin ocamo manna naka i waŋ apokki me lobo Kanaan.

³⁶(Omer rommi acel me apar me epa.)