Read lango Yaa 17 Bible Online

Yaa 17 - lango bible

Yaa 17

¹Jo Icrael luŋ te ya oko i tim me Cinai, kun owoto oko koba kit a Rwot ocikogi kede. Gin te guro kemagi i Repidim, cite pii ame myero jo mat te bedo pe.

²Mannono te miyo yi jo waŋ i kom Muca, ote kobbe ni, “Miwa pii me amata, loni.” Muca te gamo doggi ni, “Piŋo kara yiwu awan ikoma? Piŋo itye wunu ka omo yi Rwot?”

³Cite oryo pii te ciro jo atek, jo te bedo ŋuŋura i kom Muca kun okobbe ni, “Piŋo kara rik ikwanyowa oko i Miciri me miyowa to pi oryo pii, karacel itinowa kede limwa?”

⁴Omio Muca te kok baŋ Rwot ni, “Abino kara ti mo jo-ni nadi? Nen, gin doŋ oyikere me nanapo an i gweŋ”

⁵Rwot te kobbi Muca ni, “Wot i nyim jo, yer odoŋe mogo a jo Icrael iwot kedgi; kwany daŋ abironi ame rik igoo kede kulo Nail, imak i ciŋi, me iwot kede.

⁶Nen ba, an abino cuŋ i nyimi, i kom kidi me Koreb; yin ibino goyo kor kidi, eka pii te mollo iye, me jo mali.” Muca daŋ te timo kittono i nyim odoŋe ma Icrael.

⁷Nyiŋ kabedo-nono ote cako ni Maca kede Meriba, pien jo Icrael yigi owaŋ ikome dok pien gin oomo yi Rwot kun okobo ni, “Rwot tye i akinawa onyo pe?”

⁸Jo Amalek te bino lweny i jo Icrael i Repidim.

⁹Muca te kobbi Yocwa ni, “Yer co mogo i akinawu, me iwot ilweny i jo Amalek; diki an abino cuŋ i wi kidi kun abiro Obaŋa tye i ciŋa.”

¹⁰Yocwa daŋ te timo kite ame Muca okobbe, olwenyo i jo Amalek; eka Muca kede Aron kede Kur te yito malo i wi kidi.

¹¹Ka Muca tye otiŋo ciŋe malo, jo Icrael loo lweny, cite ka en odwoko ciŋe piny, jo Amalek en a loo.

¹²A doŋ ciŋ Muca ojony oko, otino kidi, eka ote miyo Muca bedo i wie, Aron kede Kur te tiŋo ciŋe malo, kun ŋat acel tiŋo tuŋ cel, ŋat acel tino tuŋ cel; ciŋ Muca te bedo ame otiŋere kittono naka piny oyuto.

¹³Yocwa te jwero Amalek karacel i jo mere luŋ i pala romo.

¹⁴Rwot te kobbi Muca ni, “Co kop man i buk obed me poyo wic, eka ite wot kwano atek i yit Yocwa, ni, An abino miyo wi jo luŋ ame tye piny i te polo wil oko i kom jo Amalek.”

¹⁵Muca te cano keno me lam me miyo mot oŋolo me yalo Obaŋa, te lwoŋo ni, Rwot en benderana,

¹⁶kun kobo ni, “Ciŋwa omako bendera a Rwot! Rwot gire bino lweny i jo Amalek kare luŋ.”