Read lango Yaa 18 Bible Online

Yaa 18 - lango bible

Yaa 18

¹Yecero, alamdog a jo Midian, papa a dako a Muca, rik te winyo jami luŋ ame Obaŋa obedo tiyo pi Muca kede jo mere Icrael, kit ame Rwot okwanyo kede jo Icrael i Miciri.

²Yecero, papa a dako a Muca, onwoŋo ogamo Jipola dako a Muca i kare ame en koŋ onwoŋo ocwae paco,

³karacel awobe mere aryo. Nyiŋ awobi acel Gerecom, pien onwoŋo rik en okobo ni, “Pien an doŋ abedo welo i lobo a mom megwa.”

⁴Nyiŋ awobi ocele Eliejer, pien onwoŋo rik en okobo ni, “Obaŋa a pappa gira en okonya, olara i pala lweny a Parao.”

⁵Kare ame Yecero papa a dako a Muca obino baŋ Muca i tim i kidi Obaŋa kan ame onwoŋo gin oguro kemagi iye, kun en onwoŋo obino karacel awobe a Muca aryo kede dako mere,

⁶dano moro te wot kobbi Muca ni, “Nen, Yecero papa a cegi kede cegi kede awobeni tye abino baŋi.”

⁷Muca te ya wot jolo papa a cege, te ryebere piny i nyime, eka te noto leme; gin doŋ te cako mote kun opepenyo kite a gin obedo bedo kede, ote donyo kede i kema.

⁸Muca te titti papa a dako mere jami duc ame Rwot otimo i kom Parao kede jo Miciri pi jo Icrael kede peko ame gin orwatte kede iyo, karacel kede kit a rik Rwot olarogi kede.

⁹Cuny Yecero te bedo yom pi jami ducu ame Rwot otimo baŋ jo Icrael, ame olarogi kede i ciŋ jo Miciri.

¹⁰Yecero te kobo ni, “Rwot ame olarowu iciŋ jo Miciri kede iciŋ Parao, myero mi pwoc.

¹¹Aman doŋ aŋeo ni Rwot dwoŋ atek kato kit obaŋa ocele luŋ, pien olaro jo mere i ciŋ jo Miciri ame yam obedo tic kedgi agwa meicel.”

¹²Yecero papa a dako a Muca te miyo mot awaŋa kede kit mot ocele me yalo Obaŋa. Aron kede odoŋe a jo Icrael luŋ te bino cam i nyim Obaŋa karacel i papa a dako a Muca.

¹³Orwo mere Muca te bedo ŋolo kop a jo, jo te bedo cuŋ guro Muca cakere odiko naka ceŋ iyul.

¹⁴Ka papa a dako a Muca oneno jami luŋame en obedo timo pi jo, okobo ni, “Yin it ye ka tero jo man niŋo? Piŋo yin ibedo keni kun jo ocuŋ oguri cakere odiko naka ceŋ iyul?”

¹⁵Muca te dokki papa a cege ni, “Pien jo bino baŋa me penyo koppogo baŋ Obaŋa.

¹⁶Ka ce gin tye i kopporo ame olaro, gin bino kede baŋa, an ate ŋolo kop i akinagi kun amiogi oŋeo cik Obaŋa kede gin a en oŋolo.”

¹⁷Papa a cege te kobbe ni, “Gin ame yin itiyo mom kakare.

¹⁸Nen yin kede jo luŋ iol wunu oko pien ticcere onwoŋo pek atekateka ame yin keni mom iromo tyeko.

¹⁹Doŋ akwai me winyo koppa, me amii ryeko, dok Obaŋa bed kedi! Yin ibino bedo akwe na a jo i nyim Obaŋa kede me tero kopgi baŋ Obaŋa.

²⁰Yin myero ipwonygi cik kede kite me ŋolo kop, kun imiogi oŋeo kite a myero gin ogwokere kede, kede kite a myero gin oti kede.

²¹Ento yin yer jo aryek i akina jo, jo ame lworo Obaŋa, ame genne dok ame mom mito lim me wil; wek iket jonono loo lwak, me gin bed jo ame loo jo tutumia kede jo mia, kede jo pyerabic kede jo apar.

²²Wek jo-nono ŋol kop a jo kare luŋ; kun okelo baŋi kop atekkege keken, cite en atitino mere gin myero tyek gigi oko i kuno. Mannono bino miyo gin mii kare me weo dok bino miyo inywako kedgi tic man apekki.

²³Ka ce ibino timo kit man, dok Obaŋa daŋ ociki amannono, bino miyo ikanyo ite miyo jo man tuno i kabedogi i kuc.”

²⁴Muca te winyo kop a papa a cege, te timo ginnoro luŋ ame en okobbe.

²⁵Muca te yero jo aryek i akina jo Icrael luŋ, te ketogi me bedo otel a lwak, oketo jo ame loo jo tutumia, kede mia, kede pyerabic kede mea jo apar.

²⁶Jonnono te bedo ŋolo kop i kare luŋ, kono ka pido mogo atek en ame otero baŋ Muca, aco en atitino mege, gin tyeko oko i kuno.

²⁷Muca te lwoko papa a cege weko iyo, en doŋ te medde i wot anyim naka paco.