Read lango Yaa 19 Bible Online

Yaa 19 - lango bible

Yaa 19

¹I dwe me adekkere cakere kare ame jo Icrael oya kede Miciri, i nino-nono ikokome, gin otuno tim me Cinai.

²Gin onwoŋo oya i Repidim, ote bino i tim me Cinai, eka gin te guro kemagi i nyim kidi me Cinai.

³Muca te yito malo i wi kidi baŋ Obaŋa, Rwot te lwoŋe i wi kidi kun kobbe ni, “Wot ikobbi ot a Yakobo, ititti itino Icrael ni,

⁴‘Doŋ ineno wunu gin ame atimo pirwu i kom jo Miciri, kede kite ame atiŋowu kede i bwom cur ate kelowu baŋa.

⁵Doŋ ba, ka ibino winyo wunu koppa kun igwoko wunu cikerena, wun ibino bedo wunu jona ikoma i akina rok luŋ, pien lobo luŋ obedo mega.

⁶Wun doŋ ibino bedo wunu lwak ame an en aloo, kun ibedo wunu olamdog, dok ibino bedo wunu rok acil.’ Mannono en kop ame ibino ko bo baŋ jo Icrael.”

⁷Muca daŋ te timo amannono, olwoŋo odoŋe a loo lwak te kobbigi kop ame Rwot okobo-nono.

⁸Jo luŋ te gamo i dwon acel ni, “Ginnoro luŋ ame Rwot okobo, wan obino tiyo.” Muca te dwoko kop a lwak baŋ Rwot.

⁹Rwot te kobbi Muca ni, “Nen ba, an abino baŋi ipol oculle acula, me jo winy dwona i kare ame akop kedi, me oye yin doŋ atwal.” Muca te kobbi Rwot kop ame jo okobo.

¹⁰Rwot te ciko Muca ni, “Wot imi jo lonyere tin kede diki, me jo bed acil, dok daŋ olwok rukgi,

¹¹me nino me adekkere nwongi doŋ oyikere oko, pien i nino me adekkere, Rwot bino yitto bino piny i wi kidi me Cinai i nyim jo luŋ.

¹²Dok daŋ myero imi jo ŋe ka kwene a myero gin gik iye tuŋi i tuŋi, kun ikobbigi ni, ‘Gwokere wunu, kur iyit wunu i wi kidi, dok daŋ kur igud wunu kidi, ŋat ame bino gudo kidi, obino neko oko.

¹³Ciŋ ŋattoro mom bino gudo kome, obino nape i gweŋ; onyo celo kede atero, kadi dano onyo lee mom bino bedo kwo.’ Ka opel bino kok ame koŋ ri ri, jo bino yito malo i kor kidi.”

¹⁴Muca te yitto piny i wi kidi, te bino baŋ lwak, eka te miyo jo lonyere, ote daŋ lwoko rukgi,

¹⁵Te doŋ kobbi jo ni, “Nino me adekkere myero nwoŋ doŋ iyikere wunu oko, kur ibed wunu ceggi i mon.”

¹⁶ I nino me adekkere odiko, piny te bedo momora kun daŋ memenya atata, pol oculle acula te wumo wi kidi oko, opel te kok aloŋo meicel, omio jo luŋ te bedo i gonygi kun komgi amyel amyela.

¹⁷Icennere Muca te kelo jo oko me rwatte Obaŋa; jo te cuŋ piny i te kidi.

¹⁸Yito te wumo kom kidi me Cinai oko ipuk pien Rwot oyitto piny i mac; yito mere onwoŋo duny woto malo bala yito mac me waŋo gulu, kidi daŋ te yeŋere atek.

¹⁹Kare ame dwon opel omedde kok aloŋo, Muca te bedo kop kun Obaŋa gamo doge i mor kot.

²⁰Rwot te yito piny i wi kidi me Cinai, te lwoŋo Muca i wi kidi malo, eka Muca te wot baŋe kuno,

²¹Rwot te kobbi Muca ni, “Yit piny iwot ikwenyoro jo, me kur obed cerre acera pi mito neno Rwot, pien bino miyo jo apol to.

²²Dok anaka olamdog ame obino ceggi baŋ Rwot myero lonyere kengi obed acil, me akemo kur mak Rwot te mukere i komgi.”

²³Muca te gamo ni, “Jo mom bino yito malo i wi kidi Cinai, pien yin ikomi icikowa kun ikobo ni, ‘Myero imi jo ŋe ka kwene a myero gin gik iye i te kidi, eka ite lonyo bedo acil.’ ”

²⁴Rwot te kobbe ni, “Yit piny, me iwot idwog malo kan wun kede Aron; cite kur imi olamdog kede lwak cerre me bino baŋa, an a Rwot, naka mio cunya waŋ ate mukere i komgi.”

²⁵Muca daŋ te timo amannono, te yitto piny baŋ lwak wot tittigi kop a Rwot.