Read lango Yaa 2 Bible Online

Yaa 2 - lango bible

Yaa 2

¹Lo moro me ot a Levi rik te nyomo nyaka Levi.

²Nyako-nono oyac, te nywalo atin ico. Ka en oneno ni atinnono ber meicel, okano oko pi dwete adek.

³A doŋ oneno ni mom romo kanne, en okwanyo ijaŋa ame ocweo alado, te puyo kome odok lam kede odok yat. Otiŋo atin te pyelo i yie, te tero wot royo i dye alugaluga i dog kulo Nail.

⁴Aminnere te cuŋ i teŋe me neno ŋo ame bino timere i kom atin.

⁵Kare ame nyaka a Parao obino lwok i kulo Nail, anyira ame konye te bedo koŋ loloŋo ŋet kulo. En oneno ijaŋa tye i akina alugaluga, te cwayo aŋeca mere acel omo.

⁶En oyabo te nwoŋo atin tye i yie; atin te kok. Kica omake i kom atin, te kobo ni, “Man atin a dano moro me Eburania.”

⁷Amin a Muca te penyo nyaka a Parao ni, “Imito awot alwoŋŋi dako moro me Eburania me wot pitti atin man?”

⁸Nyaka a Parao te gamo ni, “Apee woti.” Nyannono te wot kelo totta atin ikome,

⁹Nyaka Parao te kobbe ni, “Ter atinni iwot ipitta. An abino culi pire.” Dako-nono te tero atin wot gwoko.

¹⁰Kare ame atin doŋ odoŋo, en otero baŋ nyaka Parao, te game acalo wode. Nyannono te cako nyiŋe ni Muca, kun kobo ni, “Pien alabe gira i pii.”

¹¹ Kare a Muca doŋ odoŋo, i nino moro acel en owoto baŋ jo mere, te neno peko a gin tye kede. En oneno lo moro me Miciri tye anomonomo dano me Eburania ame dano acel i akina rokkere.

¹²Kare a en onoloro kabedo luŋ mom oneno dano moro, oneko dano me Miciri oko eka te yiko i kwoyo.

¹³Odiko ocele en dok owoto, te neno jo Eburania aryo tye aromo kengi, te kobbi lo ame abal ni, “Kara icipocipo ominni adoŋ piŋo?”

¹⁴En ogamo doge ni, “Ŋa kara oketi me bedo aloc kede aŋolkopwa? Imito neka bala dano me Miciri ame ineko?” Lworo omako Muca, te tamo i cunye ni, “Jo kara doŋ oŋeo gin otimere oko ba!”

¹⁵Ka Parao owinyo kop man, omito ni enek Muca oko. Cite Muca gire te lwi oko i baŋ Parao te wot i lobo Midian. En owoto obedo piny i dog akon.

¹⁶Alamdoggoro me Midian onwoŋo rik tye kede anyira mere kany wie aryo. Anyira-nono obino te twomo pii; a doŋ gin otwomo pii opoŋ weer oko me miyo lim a papagi mato.

¹⁷Okwat ocele te bino ryemogi oko, Muca te ya konygi, te miyo dokgi mato pii,

¹⁸Kare a gin odwogo paco, papagi Reuel openyogi ni, “Kara tin idwogo wunu con piŋo?”

¹⁹Gin ogamo ni, “Lo moro me Miciri en olarowa i ciŋ okwat, en a daŋ otwommiwa pii te daŋ miyo limwa mato.”

²⁰Reuel te penyo anyira mere ni, “Aman en tye kwene? Piŋo kara iweke wunu kuno? Lwoŋe wunu ebin ecem.”

²¹Muca rik te ye bedo tuŋ a dano-nono, en te miyo Muca nyomo nyare Jipola.

²²Nyannono te nywalo awobi, Muca te cako nyiŋe Gerecom kun kobo ni, “Pien an doŋ abedo welo i lobo a mom megwa.”

²³Kare te kato alalac, abaka me Miciri te daŋ to oko i kine-nono. Jo Icrael onwoŋo pwod tye ka cur kun okok pi bedogi opii opii; kokoginono te winyere baŋ Obaŋa.

²⁴Kare ame Obaŋa owinyo cucuragi, opo pi cikere mere baŋ Iburaim, kaka kede Yakobo.

²⁵Obaŋa te neno jo Icrael i waŋ me kica, te daŋ ŋeyo kit ame gin bedo kede.