Read lango Yaa 21 Bible Online

Yaa 21 - lango bible

Yaa 21

¹“Cik ame myero iket wunu i nyim lwak ene:

²Ka ce iwilo opiini ame obedo dano me Eburania, en bino tic baŋi pi mwakki abicel, i mwaka me abiro mere ibino gonyo woto aboŋo culo limmoro me lakoro en.

³Ka ce onwoŋo rikobino en kene, en daŋ bino wot kene, aco ka onwoŋo obino ame onyomo, en bino wot i dako mere.

⁴Aco ka adwoŋŋere en ame omie dako, eka en te nywalo awobe kede anyira, dako kede itino mere bino doŋ baŋ adwoŋŋere, en bino wot gire kene.

⁵Cite ka opii-nono bino kobo kannaler ni, ‘An gira amaro adwoŋŋa, kede dakona, kede itinona; mom daŋ amito ni gonya,’

⁶adwoŋŋere bino tere baŋ Obaŋa, te tere naka i ŋet kika, onyo i kom yat me doggola; eka adwoŋŋere te tuco yite kede atero, en doŋ te tic baŋe nakanaka.

⁷“Ka ce dano moro ocato nyare oko acalo aŋeca, nyannono mom obino gonyo bala opii.

⁸Ka ce en mom oyomoro cuny adwoŋŋere a rik onwoŋo oyere me bedo mere ikome, en myero ye ŋattoro lakoro kede lim; cite danonono mom bino bedo i twerroro me cate baŋ arokkoro ocele, pien obwole nono.

⁹Ka ce onwoŋo en rik oyero nyannono pi wode, en myero gwok nyannono a rom aroma i kite ame en gwoko kede nyare.

¹⁰Ka ce en onyomo dako mere ocele, myero mom jwik cam a nyannono, onyo rukkere, onyo kare ame en bedo kede baŋe.

¹¹Ka mom bino cobo jami adek-ki, obino gonyo dako-nono aboŋo culo limmoro me lakoro.

¹²“Ka ŋattoro ogoo dano, ce oto oko, en daŋ obino neke oko,

¹³Cite ka onwoŋo mom obedo kiye akia, ento Obaŋa omio dano-nono opoto i ciŋe, abino yero kabedo moro a myero en riŋ lar,

¹⁴Aco ka dano moro oero lweny me akaka i kom ŋattoro ocele kun tye i cuny me neko oko i ryeko, obino kwanyo dano-nono oko i kom keno me lam ma, ote neko oko.

¹⁵“Ka ŋattoro ogoo pappere onyo tottere, obino neko oko.

¹⁶“Ka ŋattoro okwalo dano, te cato oko baŋ dano ocele onyo onwoŋo gire baŋe, obino neko dano-nono oko.

¹⁷“Ka ce ŋattoro oceno pappere onyo tottere, dano-nono obino neko oko.

¹⁸“Ka ce jo moro obedo da, ce ŋattoro onapo awottere i kidi onyo odoŋo adoŋa i ciŋe mom te to, ento obedo twoye i kabuto,

¹⁹icennere ka dano-nono oya malo ame woto kun komo akoma kede abiro, kop mom bino loyo ŋat ame ogoo-nono ento en bino culo kare mere ame obalo me tic, dok bino miyo dano-nono can aber.

²⁰“Ka ce ŋattoro ogoo opii mere onyo aŋeca mere kede abiro, ka oto oko i caa-nono, obino keto can i kome.

²¹Aco ka opii-nono koŋ dok ori pi nino acel onyo aryo te to, mom obino keto cannoro i kome; pien opii-nono obedo limmere gire.

²²“Ka ce co onwoŋo tye alweny, eka ŋat acel ciŋe te cer i kom dako ame yie doŋ otego oko, ce yie-nono oony oko, kun cannoro ocele mom onen iye, dano ame ogoo dannono bino culo kwor i wel lim ame won dako bino ŋolo, kun culo kit ame aŋolkop omoko.

²³Aco ka ce cannoro onen iye, obino culo kwo kede kwo,

²⁴waŋ kede waŋ, lak kede lak, ciŋ kede ciŋ, tyen kede tyen,

²⁵mac kede mac, awano kede awano, apwoda kede apwoda.

²⁶“Ka ce ŋattoro ogoo waŋ opii mere onyo mea aŋeca mere, ce oloo toŋ waŋe oko, en doŋ bino gonyo opii-nono onyo aŋeca-nono woto oko pi waŋe-nono.

²⁷Aco ka otwomo lak opii onyo mea aŋeca te muko oko, en bino gonyo opii-nono onyo aŋeca-nono weko woto pi lake-nono.

²⁸“Ka ce twonnoro ocobo dano moro i tuŋe, onyo dako, ce oneko oko, twonnono obino napo oko i gweŋ, dok riŋo mere mom obino camo ento kop pe bino loyo wonnere.

²⁹Cite ka twonnono onwoŋo yam maro cobo jo i tuŋe con, dok yam doŋ ociko wonnere oko pire, cite wonnere gire mom te gwoko, ka ce twonnono oneko dano, onyo oneko dako moro, twonnono obino napo oko i gweŋ, wonnere daŋ obino neko oko,

³⁰Aco ka oŋolle cul, en bino culo lim luŋ ame oŋolle pi lakoro kwo mere,

³¹Aco ka ocobo awobi onyo nyaka a lo moro, obino daŋ tic i cik acellono,

³²Aco ka ocobo opii onyo aŋeca moro, wonnere bino miyo cekel me ryal pyreradek baŋ won opii-nono, kun twon onapo oko i gweŋ.

³³“Ka ce ŋattoro oweko wi bur twolo kun mom owumo, onyo ka ŋattoro okunyo bur eka pe te wumo wie oko, ka ce twon onyo kana moro opoto iye,

³⁴won bur bino culo. En bino culo lim baŋ wonnere, en te tero riŋo lee opoto i bur.

³⁵“Ka ce twonnoro otwomo twon ocele te neko oko, obino cato twon akwo-ni oko ote poko limmere. Riŋo twon oto daŋ obino poko apoka.

³⁶Aco ka twonnono onwoŋo yam oŋeo ni en maro twomo twoni wadgi, kun wonnere daŋ mom ogwoko, en bino culo twon kede twon wadgi kun en oto-ni bedo mege.