Read lango Yaa 22 Bible Online

Yaa 22 - lango bible

Yaa 22

¹“Ka ce ŋattoro akwalo twonnoro onyo romo moro, ce oneko oko onyo ocato oko, dano-nono bino culo twoni abic pi twon acel, romi aŋwen pi romo acel. En bino culo waŋe. Aco ka gire moro mom, obino cate en ikome oko, me ote culo kede lim ame okwalo.

²Aco ka lim ame okwalo-ni onwoŋo kun kwo baŋ ŋat okwalo, kadi obedo twon onyo kana, onyo romo, en bino culo iryo. “Ka ce onwoŋo akwo moro tye aturo ot, eka ote goyo neko oko, mom obino culo kworrere; cite ka onwoŋo ceŋ doŋ odonyo oko, obino culo kworrere.

⁵“Ka dok onyo dyegi onyo kit limmoro luŋ akwo ocamo poto a ŋattoro, onyo olokkere, onyo wonnere ogonyo te wot camo poto a ŋattoro, won lim bino culo kede mere abeco ame tye i poto mere kede iyi poto olokkere.

⁶“Ka ce maccoro owaŋ eka te ŋamo okuto, te waŋo kai ame onwoŋo ocoko karacel, onyo en ame mom ru okao, onyo owaŋo kai i poto luŋ, ŋat ocwinyo mac bino culo ducu.

⁷“Ka ce ŋattoro omio limmere baŋ awottere ni kanne onyo gwokke, eka ote kwalo oko i ot a dano-naca, dok daŋ ote nwoŋo ŋat ekwalo oko, obino culo ginnoro a rom kede tyen aryo.

⁸Aco ka mom onwoŋo akwo, won ot bino wot i nyim Obaŋa, pi nyuto ni en gire ciŋe mom ogudo jami awottere.

⁹“Ka ce jo moro tye alaro ginnoro i akinagi kadi ginnono obedo twon, onyo kana, onyo romo, onyo boŋo, onyo ginnoro keken ame orwenyo, eka ŋattoro i akinagi te kobo oko ni, ‘Neno wunu en ene,’ kop ame onwoŋo tye i akina jonnono obino tero i nyim Obaŋa. Ŋat ame Obaŋa oŋolo kop oloo bino culo awottere a doko ginnaca tyen aryo.

¹⁰“Ka ce ŋattoro onwoŋo ojoko kana baŋ awottere, onyo twon, onyo romo, nyo kit lee moro ocele, eka te to oko, onyo ogoo agoa onyo oryemo te rwenyo atwal, kun ŋattoro gire mom oneno,

¹¹ŋat ojokke bino kwoŋ i nyiŋ Rwot me nen ka en ikome ciŋe mom ogudo jami awottere. Ka ce en okwoŋo, won jami myero ye kwonnere-nono, en mom bino culo.

¹²Cite ka ekwalo akwala i baŋe, en bino culo won jami.

¹³Ka ce lee tim en omwodo, ka en okelo ginnoro ame nyuto, en mom bino culo gin ame lee tim omwodo.

¹⁴“Ka ce ŋattoro onwoŋo oomo dyaŋ, dyel onyo kit limmoro akwo i baŋ awottere, eka te wanne onyo to oko kun wonnere mom tye, dano-nono myero culi.

¹⁵Ka ce onwoŋo wonnere daŋ tye, mom obino culo waŋe; ka rik onwoŋo okelo pi tic me awak cul me awak bino romo.

¹⁶“Ka ce lo moro obedo bibito nyannoro a pwod tidi a mom ru oneye ico, a mom ru daŋ ocako nyomo, eka te buto kede, en myero doŋ cul lim me nyomo obed cege.

¹⁷Aco ka papa a nyako okwero oko i nyare, en bino culo lim ame romo nyomo nyako a mom ru oŋeye i co.

¹⁸“Myero kur wek dako ame ajok bed kwo.

¹⁹“Ŋattoro obu to i lee daŋ myero nek oko.

²⁰“Ŋat ame oyalo obaŋa moro ocele a mom Rwot, myero nek oko bala gin me kwer.

²¹“Kur itim arokkoro ame bedo i akinawu arac, kur daŋ iwune, pien wun daŋ rik ibedo wunu wele i lobo me Miciri.

²²Kur iwun wunu dako moro a cware oto onyo atin kiccoro.

²³Ka ce iwuno wunugi, eka gin te kok baŋa, an gira abino winyo kokogi.

²⁴Akemo bino maka atek ate nekowu oko i pala lweny, eka monwu daŋ le doko mon a coggi oto, itinowu daŋ te doko itino kice.

²⁵“Ka ce imio acannoro i akina jona ame bedo baŋi okoporo ginnoro i baŋi, mom ibino tere kite ame omi-banya tero kede jo, mom daŋ ibino mito magoba moro i baŋe.

²⁶Ka ce awotti ojeŋo boŋo mere baŋi, myero idwokke oko ame ceŋ mom ru opoto;

²⁷pien mannono gin ame en wum kede eno keken, boŋo ame wumo kome, en bino buto kara i gin aŋo? Ka ce dano moro bino kok baŋa, an abino winyo koko mere, pien an gira akica.

²⁸“Kur iyet Obaŋa, kadi ceno nattoroame loo lwak.

²⁹“Kur ibed gal i gin ame ikaa opoŋ deroni karacel i kono olok kede moo ame opon guluni. Mi moro oko oyot me mot baŋa. “Itinoni me kao awobe ibino miyogi baŋa.

³⁰Twonni kede romini daŋ ibino timo kittono. Gin bino bedo baŋ totogi pi nino kany wie aryo, cite i nino me aboro ibino miyogi baŋa.

³¹“Ibino wunu bedo jo acil ame okwero pira; pi mannono kur icam wunu riŋo ame lee tim omwodo; myero ibolli wunu gwogi.