Read lango Yaa 23 Bible Online

Yaa 23 - lango bible

Yaa 23

¹“Kur ibed lalo kop anike. Kur iribere i dano arac ame maro kobo goba pi timo jo rac.

²Kur ilub lwak jo a wot timo gin arac. Kur daŋ iletjere baŋ lwak jo ame apido goba pi balo ŋolo kop kakare.

³Kur daŋ idwor acan i pido mere.

⁴“Ka ce icop i kom twon onyo kana akworri ame orwenyo, myero idwok baŋe.

⁵Ka ce ineno kana a lon adagi obuto piny ame yec obwoo kur iweke amannono, myero ikonye me ya malo.

⁶“Kur igen acan loyo koppere.

⁷Kur ilutte i kopporo me goba. Kur daŋ imi nek ŋattoro aber a mompe i bal, pien an mom abino ye obalo loo kopgi.

⁸Kur igam ginnoro me wili, pien kodi willono wumo anaka wan jo ame neno aber, eka te balo pido a jo ame atira.

⁹“Kur iwun arokkoro ame bedo i akinawu; yin iŋeo aber kite me bedo arok, pien yin daŋ rik kon ibedo arok i Miciri.

¹⁰“Ibino puro potoni pi mwakki abicel kun ikaa gin ocek iye,

¹¹cite i mwaka me abiro mere, ibino weko potoni we kun mom opuro. Ginnoro luŋ ame bino cek i potoni i mwaka-nono bino bedo me ocan ame tye i akina joni, eka en adoŋŋere te bedo mea leyi me tim. Cik acellono en ame daŋ ibino lubo pi poto olokki kede poto jeituni meri.

¹²“Ibino tiyo tic meri pi nino abicel, ento i nino me abiro mere, ibino weo; me twoni kede kanani daŋ nwon weo, wot aŋecani kede arokkoro ame bedo baŋi daŋ nwon dok teko me komgi.

¹³Mak wunu kop luŋ ame atyeko doŋ kobbiwu. Kur ilwon wunu nyiŋ obaŋa moro ocele; kodikoppono myero kur winyere i dogwu kadi acelloro.

¹⁴“Ibino kwero wunu ecuban adoŋo adek i mwaka acel.

¹⁵Ibino kwero wunu ecuban me Ogati a Tobi Mom iye kite a rik acikowu kede. Ibino wunu camo ogati a mom orubo i tobi pi nino kany wie aryo, i kare a rik aciko, i dwe me Abic, pien mannono en kare a rik iya wunu kede i Miciri. Ŋattoro myero kur bin i nyima i ciŋe nono.

¹⁶Ibino daŋ kwero wunu ecuban me wi mwaka kun imio wunu motwu me cam ocek pi ticwu i kom gin onwoŋo icoo wunu i pottiwu. Dok daŋ ibino kwero wunu ecuban me nyono cam i dero i agikki mwaka ame nwoŋo doŋ icoko kit cammoro luŋ ame ipuro i mwakanono.

¹⁷Co luŋ a tye baŋi bino bino i nyim Rwot Obaŋa tyen adek i mwaka acel.

¹⁸“Kur imi remo me gin oŋolo me yala karacel ogati a tobi mom tiye. Dwol leyi ame oŋolo me yala i kare me ecuban, myero kur wek moro ri tuno naka odiko ocele.

¹⁹“Cam me wi mwaka ogeo cek abeco i potoni, myero ikel i ot a Rwot Obaŋani. Kur ited riŋo atin dyel kede cak a tottere.

²⁰“Nen, abino cwalo amalaika i nyimi me gwoki iyo, dok me teli teri naka i kabedo ame rik ayiko piri.

²¹Myero iwore, iwinye, kur daŋ ipyem kede, pien mom bino timmi kica ka ijem. Twerra luŋ tye i ciŋe.

²²“Cite ka ibino winye kede cunyi luŋ, kun itio gin ame en okobbi luŋ, abino bedo akwor okworri dok abino dago jo a dagi.

²³Amalaika bino telo nyimi kun teri baŋ jo Amor, jo Kitti, jo Periji, jo Kanaan, jo Kivi, kede jo Jebuc; eka ate jwerogi oko.

²⁴Kur iryebere wunu piny i nyim obaŋegi, kur iworgi wunu, kur iti wunu bala gin, ento ibino wunu turo wunugi oko kun imumuko wunu gweŋegi ame ocucuna me awora.

²⁵Ibino woro wunu Rwot Obaŋawu, cite en bino miyowu winyo, ite nwoŋo wunu cam abup kede pii. Abino miyo two moro bedo mom i akinawu.

²⁶Lee moro mom bino bwogo dok dako moro daŋ mom bino bedo oraŋa i lobowu. Abino miyo kwo meri cobere aber kakare.

²⁷Abino miyo jo i nyimi luŋ bedo lwor, dok daŋ abino babano jo luŋ ame bino rwatte kedi. Abino miyo okworri luŋ riŋo oko i nyimi.

²⁸Abino miyo pipino ager corre i nyimi te ryemo jo Kitti, jo Kanaan, jo Kivi oko i nyimi.

²⁹Mom abino ryemogi luŋ i nyimi i mwaka acel keken, mio lobo doŋ oko nono, eka leyi me tim tte nya, medde, te yelowu.

³⁰Abino ryemogi momot, tuno wan ame yin inya iromo lobo.

³¹Wan loboni bino ya i Nam Arema tuno naka i Nam a jo Piriciti, cakere i tim naka i kulo Efurate. Abino daŋ miyo wegi lobonono i ciŋwu, yin ibino ryemogi oko i nyimi.

³²Myero kur icikere kedgi, kadi baŋ obaŋegi.

³³Dok gin myero kur bed i loboni, bino miyo yin itimo bal baŋa. Pien woro obaŋagi bino doko kumma me cikowu.”