Read lango Yaa 25 Bible Online

Yaa 25 - lango bible

Yaa 25

¹Rwot te kobbi Muca ni,

²“Kobbi jo Icrael raya mot; ibino rayo wunu gin ame dano acel acel bino ye miyo i cuny aber.

³Mot ame ibino wunu rayo i baŋ jo ene: jabu, ryal, mola,

⁴uci ame obedo bululu kede amaramar, kede are ma, kede boŋo me camanini aber; yer dyegi,

⁵lao nyogi romi ame onyoŋo kede me dyegi; bao me yat okuto alwi;

⁶moo me mac tara, gin a ŋwece kur me yiko moo wir kede me odok akur me awaŋa,

⁷gweŋe alilia me onik kede en ocele mere me amwona i kom jabu, pi epod kede pi icao kor.

⁸Jo myero yikka kabedo acil me abed i akinagi.

⁹Ibino yiko wunu kema kede jami luŋ ame bino bedo iye kite ame abino nyuto baŋi.

¹⁰“Obino payo canduk bao okuto alwi; borrere myero bed futi aŋwen, laccere futi aryo, kede borrere me malo futi aryo.

¹¹Mwon kome oko i jabu ame olio aber, mwon yie kede ŋec; eka ite dolo doge oko i jabu.

¹²Ti atem me jabu aŋwen, ite keto i tyene aŋwen luŋ; atem aryo tuŋ cel kede aryo tuŋ ocele.

¹³Yik daŋ ludi aryo me yat okuto alwi, ite mwono komgi oko i jabu.

¹⁴Rwak ludi iyi atem luŋ ame tye i ŋet canduk, me tiŋo canduk.

¹⁵Ludinono bino bedo i kom atem ame tye i kom caduknono nakanaka, mom myero kwany kadi acel.

¹⁶Kiddi apada ame ocoo kop me caden i komgi, ame amii-ni, ibino keto iyi canduk ame kop me caden bedo iye.

¹⁷Ibino daŋ dok tiyo kom-me-kica i jabu ame olio aber: borrere myero bed futi aŋwen kede laccere futi aryo.

¹⁸Ti daŋ okerubi me jabu aryo i kom agikki kom-me-kica aryo ducu, kun iteto kede anyul.

¹⁹Ti okerubi acel i agikki mere tuŋ cel kede acel tuŋ cel; mi okeru bi ku bere i kom-me-kica, i agikki mere aryo ducu.

²⁰Ibino miyo okerubi yaro bwomgi malo kun wumo kom-me-kica; kun waŋ acel acel neno me awottere, ame gin aryo luŋ oneno kom-me-kica.

²¹Ibino cibo kom-mekica cuŋ i wi canduk, eka ite keto kop me caden ame abino miyi-ni iyi canduk.

²²An abino rwatte kedi kuno, ate kop kedi malo i wi kcm-me-kica, kede i akina okerubi ame tye malo i wi canduk ame kop me caden bedo iye kun akobo kedi i kom cik luŋ ame abino miyo jo Icrael.

²³“Ti daŋ meja kede bao okuto alwi; borrere myero bed futi adek kede laccere futi acel kede nucu, eka borrere me malo te bedo futi aryo.

²⁴Mwon kome oko i jabu ame olio aber, dok idol daŋ laŋete luŋ kun imwono oko i jabu,

²⁵Ket arii mere ame laccere rom aroma i cuny ciŋ; dol daŋ lak arii luŋ i jabu.

²⁶Ti daŋ atem me jabu aŋwen pire, eka ite mwono atemmono i twoke aŋwen luŋ, i tyene aŋwen.

²⁷Atem bino buto i kom arii, eka ite rwako iye lut me tino meja.

²⁸Ludi me tino meja daŋ ti kede bao okuto alwi, ite daŋ mwono komgi oko i jabu; ludi-nono obino tiŋo kede meja.

²⁹Ti daŋ cani mere kede bakuli mere me keto odok akur; ti daŋ cupa kede tabbi me liyo mot amata ame omio me yalo Obaŋa; ti kede jabu ame olio aber.

³⁰Ogati me aketa i nyim Rwot ibino cano i wi meja didik.

³¹“Ibino daŋ tiyo gi-cibo tara me jabu kun itio i jabu ame olio aber. Tere kede bollere myero tet kede anyul; ikopo mere, ame en wene kede ature, bino kubere kede karacel.

³²Jaŋe bino bedo abicel ame oryeye i ŋete luŋ kun adek tye tuŋ cel kede adek tuŋ cel.

³³Ikopo adek ame otio bala tur yao bino bedo i jane tuŋ cel, kun ikopo acel acel tye kede wene kede ture, tuŋ ocele daŋ bino bedo iye ikopo adek ame otio bala tur yao, kun acel acel tye i wene kede ature. Jane abicel luŋ ame oryeye i ŋet gi-cibo tara gin luŋ bino bedo kittono.

³⁴I kom gi-cibo tara ikome bino bedo iye ikopo aŋwen, ame daŋ otio bala tur yao, kun otye i wengi kede turgi.

³⁵I te jaŋe abicel ame oryeye ryoryo bino bedo iye wene ame okubere i kom gi-cibo tara.

³⁶Wengi kede jaŋgi myero bed okubere karacel kun kome luŋ obedo jabu ame olio aber ote teto kede anyul.

³⁷Icennere ite doŋ tiyo tara kany wie aryo pire; ibino cibo tara-nono iye, me meny kabedo luŋ i nyime.

³⁸Makaccere kede cani mere myero bed me jabu ame olio aber.

³⁹Gi-cibo tara kede jami ticcere luŋ myero ti i jabu ame olio aber, ame pekkere romo ratili mia acel.

⁴⁰Nen aber ni itio luŋ kun ilubo kit ame anyutti kede i wi kidi ca.