Read lango Yaa 26 Bible Online

Yaa 26 - lango bible

Yaa 26

¹“Dok daŋ ibino tiyo kema, kun itio i cuka tomon me camanini ame owio uci mere abeco, kede uci bululu bululu kede en obedo amaramar kede arema, ibino kwoyo kun ideo i cal okerubi ame oyiko i twon diro.

²Cuka acel acel borrere myero obed yadi apar wie aŋwen, laccere obed yadi aryo. Gin cuka-nono luŋ bino bedo arorom.

³Cuka abic obino ribo karacel, kede cuka abic ocele daŋ obino ribo karacel.

⁴Ibino kwoyo waŋ jarara kede uci ame obedo bululu bululu i agikki cuka me dul me acel ame ikubo karacel, eka daŋ ite dok kwoyo waŋ jarara i agikki cuka me dul me aryo ame rom aroma i maca ocele ca.

⁵Dok ikwo waŋ jarara pyerabic i dog cuka acel a tye i dul me acel, eka ite daŋ dok kwoyo waŋ jarara pyerabic i dog cuka acel ame tye i dul me aryo, kun waŋ jarara acel acel tikere awottere.

⁶Ibino tiyo agod jarara pyerabic kun itio i jabu; ibino tiyo mannono me ribo dog cuka acel acel i kom awottere kun agod en a nonotogi, me kema doŋ te bedo ame okubere oko karacel.

⁷“Ibino daŋ tiyo cuka me yer dyegi me wumo wi kema; ibino tiyo cuka me yer dyegi apar wie acel.

⁸Cuka acel acel borrere bino bedo yadi apar wie abic, kun lacgi tye yadi aryo aryo. Cuka apar wie acel-li luŋ myero bed ame rorom.

⁹Ibino noto cuka abic kengi karacel, eka cuka abicel daŋ ite noto kengi pat, kun cuka me abicellere idolo yie aryo i tuŋ nyim kema.

¹⁰Kwo waŋ jarara pyerabic i agikki me dul me acel ame inoto karacel, eka ite daŋ kwoyo en ocele pyerabic i agikki me dul ocele me aryo.

¹¹“Ibino daŋ dok tiyo agod jarara me mola me arwaka i waŋ jarara me noto kema karacel.

¹²Lak cuka ke ma ame odoŋŋere, bino pyelle wumo ke ma i tuŋ ŋec.

¹³Lak cuka kema ame odonuono, borrere tuŋ cel futi acel i nucu kede tuŋ cel daŋ acel i nucu, mannono bino pyelle wumo kema ryoryo.

¹⁴Kwo daŋ dok lao romo ame onyoŋo kede lao dyegi, me wumo wi kema.

¹⁵“Ibino tiyo bayi me okuto alwi ame ocuŋ atira, me kema.

¹⁶Bor a bao acel acel myero obed futi apar wie abic, eka lacerre te bedo futi aryo.

¹⁷I kom bao acel acel mi tyene bed tye aryo me kubogi karacel. Bayi me kema ocuŋ atira-nono ibino tiyogi ducu kittono.

¹⁸Ibino tiyo bayi me ke ma pyeraryo me tuŋ anyarolum;

¹⁹dok iti acib tergi me ryal pyreraŋwen pi bao ke ma pyeraryo-nono, kun bao acelacel tye kede acib tere aryo aryo me rwako tyene.

²⁰Ti daŋ me kema tuŋ ocele, tuŋ anyarodi, bao ocuŋ atira pyeraryo,

²¹kede acib tergi me ryal ame romo pyeraŋwen, acib tergi aryo aryo pi bao acel acel.

²²Ti daŋ dok mene kema ame tye tuŋ to, ti me mannono bao abicel.

²³Ti bao aryo me twoke ame tye tuŋ ŋec.

²⁴Akinagi i tuŋ piny ibino poko oko ento i tuŋ malo ibino ribo doggi i kom atem me agege, gin aryo luŋ bino bedo kittono, twoke bino bedo aryo.

²⁵Bao ke ma ocuŋ atira bino bedo aboro, kede acib tergi apar wie abicel ame otio kede ryal, kun acib tere aryo aryo tye pi bao atira acel acel.

²⁶“Dok ibino daŋ tiyo arii me bao kun itio okuto alwi, ibino tiyo abic pi bao me kema tuŋ cel,

²⁷kede dok arii ocele abic me tuŋ ocele, kede dok abic mene kema i tuŋ to.

²⁸Arii me dyere, ame ŋolle i kor bayi ame ocuŋ atira, mannono bino ya i kom lake tuŋ cel tuno i lake tuŋ cel.

²⁹Ibino mwono kom bao kema oko kede jabu. Ibino daŋ tiyo atem me rwako arii, ibino daŋ mwono komgi oko i jabu.

³⁰Myero igur kema kun ilubo kite a rik onyutti kede i wi kidi.

³¹“Ibino kwoyo boŋo icika kede uci bululu bululu, amaramar, kede en arema. Ibino kwoyo i boŋo camanini ame uci mere owio abeco kun odeo i cal okerubi ame oyiko i twon diro.

³²Ibino nabo boŋo icika-nono kede agod me jabu i kom pagi aŋwen me okuto alwi ame omwono komgi oko i jabu, ame ocuŋ i kom acib tergi aŋwen me ryal.

³³Ŋab boŋo icikanono kede agod jarara, eka ite kela canduk ame kop me caden bedo iye keto iyi boŋo icika, eka boŋo me icika te poko akina kabedo acil kede Kabedo Acil Meicel.

³⁴Eka ite doŋ keto kom-me-kica i wi canduk ame kop me caden bedo iye i Kabedo Acil Meicel.

³⁵Ket meja oko i ŋe boŋo me icika kun iketo gi-cibo tara tuŋ anyarolum me kema, mi tikere kede meja. Ket meja tuŋ anyarodi.

³⁶“Kwo cuka me wumo doggola me kema; kwo kede uci obedo bululu bululu, amaramar, kede arema; kwo kede boŋo camanini ame owio uci mere abeco, dok daŋ odeo aber.

³⁷Ti pagi abic me boŋo me wumo doggola, kede yat okuto alwi, eka ite mwono komgi oko kede jabu. Agodgi bino bedo me jabu kun acib tergi tye abic me mola ame olio alia.