Read lango Yaa 27 Bible Online

Yaa 27 - lango bible

Yaa 27

¹“Ibino tiyo keno me lam kun itio i bao me okuto alwi. Borrere myero obed futi abiro kede nucu, eka laccere te bedo daŋ futi abiro kede nucu. Borra keno-nono kede laccere bino bedo arorom, aco borrere me malo myero bed futi aŋwen kede nucu.

²Ibino tiyo tuŋ i twoke aŋwen luŋ kun tuŋ aŋwennono luŋ kubere kede karacel, kome daŋ ibino mwono oko kede mola.

³Ibino yiko tako me jobo buru, kede atok buru, becan, gi-cobo riŋo, kede weer; jami ticcono luŋ ibino tiyogi kede mola.

⁴Yik daŋ keikei me mola, ket atem aŋwen ame otio i mola i twoke aŋwen luŋ.

⁵Ket keikei mola-nono i te arii me keno lam, me wek keikei but i kor keno lam.

⁶Ti daŋ ludi me keno lam kun itio i okuto alwi eka ite mwono komgi oko kede mola.

⁷Ibino rwako lut iyi atem luŋ me lut riye i kor keno me lam tuŋi kede tuŋi me tiŋo.

⁸Keno me lammono ibino tiyo ame yie twolo kun itio kede bao. Ti kite a rik anyutti kede i wi kidi.

⁹“Ibino daŋ yiko dyekal me kema. Ibino nabo cuka me camanini ame owio uci mere abeco i dyekal tuŋ cem; borrere tuŋ anyarolum myero bed yadi pyerabic.

¹⁰Pagigi bino bedo pyeraryo, kede acib tergi daŋ pyeraryo, gin ducu myero bed me mola, cite agod pagi kede otacgi luŋ myero bed me ryal.

¹¹Borrere tuŋ anyarodi myero daŋ bed amannono; ibino daŋ nabo cuka ame borrere romo yadi pyerabic tunnaca. Pagigi daŋ bino bedo pyeraryo kede acib tergi pyeraryo, gin ducu daŋ myero bed me mola, cite agod pagi kede otacgi luŋ myero bed me ryal.

¹²Eka i ŋete ame tye tuŋ to, obino daŋ nabo iye cuka ame borrere romo yadi pyeraryo wie abic; pagigi bino bedo tomon kede acib tergi daŋ apar.

¹³Aco tuŋ nyime ame tye tuŋ kide, laccere bino bedo yadi pyeraryo wie abic.

¹⁴Ibino daŋ nabo cuka ame borrere romo yadi abiro kede nucu i ŋet dog dyekal tuŋ cel; pagigi bino bedo adek kede acib tergi adek.

¹⁵Tuŋ ocele daŋ ibino nabo iye cuka ame tye yadi abiro kede nucu; pagigi bino bedo adek kede acib tergi daŋ adek.

¹⁶Yo ame donyo i dyekal obino wumo oko kede cuka ame borrere romo yadi apar, boŋo-nono myero bed me camanini ame owio uci mere abeco, dok daŋ odeo aber; pagi mere bino bedo aŋwen kede acib tergi daŋ aŋwen.

¹⁷Pagi luŋ ame oguro i dyekal bino bedo iye otac ame otio kede ryal; agodgi daŋ myero bed me ryal, eka acib tergi te bedo me mola.

¹⁸Bora dyekal bino bedo yadi pyerabic kun laccere tye yadi pyeraryo wie abic, borrere malo futi abiro kede nucu. Obino nabo iye cuka me camanini ame uci mere owio abeco. Acib te pagi bino bedo me mola.

¹⁹Jami me tic luŋ ame tye i kema me konyo tic apapat, karacel kede te ke me guro kema, kede teke ame amano dyekal luŋ, bino bedo me mola.

²⁰“Ibino ciko jo Icrael luŋ me ke lo moo me jeituni ame oodo, ote liyo acil, me menyo piny, me ony i tara ote weko bedo lyel nino ducu kun mom to.

²¹Aron kede awobe mere myero can mac me lyel i nyim Rwot cakere otyeno naka odiko i kema me rwatte, oko i ŋe boŋo icika ame tye i nyim canduk me kop me caden. Man en cik ame jo Icrael bino gwoko nakanaka, naka i kare ikwaegi luŋ.