Read lango Yaa 28 Bible Online

Yaa 28 - lango bible

Yaa 28

¹“Kel ominni Aron karacel kede awobe mere ceggi baŋi, gin ya oko i akina jo Icrael, me wek gin oti tic me olamdog baŋa. Jo-nono ene: Aron kede awobe mere Nadab, Abiku, Eleajar kede Itamar.

²Ibino kwoyo bomji acil pi ominni Aron, boŋi me kwogo dok abeco meicel.

³Dok ibino kobbi jo luŋ ame akitti, ame amiogi ryeko adwoŋ, ni myero gin kwo boŋo me aruka Aron, ame obino kwere kede i tic me bedo alamdog mera.

⁴Boŋi me aruka ame ibino kwoyo gin ene: icao kor, epod, jor abor ilul, kanyi ame oŋweŋweko kome, kede itambara adwala i wie, kede itambara me tweyo pyer; myero kwo boŋi magi me aruka acil pi ominwu Aron kede awobe mere, pi ticgi me bedo olamdogga.

⁵“Gin bino gamo jabu, uci obedo bululu bululu, amaramar kede arema, kede boŋo camanini ame owio uci mere abeco.

⁶Gin bino kwoyo epod kede jabu kede uci obedo bululu bululu, amaramar kede arema kede boŋo camanini ame owio uci mere abeco, dok daŋ ame okwoo kede twon diro.

⁷Gin me wi gwoke bino bedo aryo ame okubo i doge ryoryo, me kubere karacel.

⁸Lati me tweyo ame tye i ko me ame otoko i diro, obino tiyo i kite tic acellono kun daŋ otio i kite jami acellono: jabu, uci bululu bululu, amaramar kede arema, kede boŋo camanini ame owio uci mere abeco.

⁹Ibino kwanyo gweŋe alilia me onik aryo ite goro iye nyiŋ awobe Icrael,

¹⁰nyiŋ awobe abicel i kom kidi acel, kede mea awobe abicel odoŋŋere i kom ocele mere-ni, kun imiogi lubere i ditogi me anywalli.

¹¹Ibino goro nyiŋ awobe Icrael i kom kidi aryo-nu, i kite adiro goro kede coc i kom kidi. Ibino mwonogi i kom jabu ame oŋweŋweko kede diro me kwako tere.

¹²Eka ite doŋ keto itino kiddi aryonono i kom gin me wi gwok epod, me gin bed kiddi me poyo awobe Icrael. Aron bino tiŋo nyingi-nono i wi gwoke ryoryo me poyo pirgi i nyim Rwot.

¹³Ti gin me kwako tere i jabu ame oŋweŋweko kome i diro.

¹⁴Ti daŋ nyor aryo me jabu ame omino calo tol, ti kede jabu olio aber; mwon nyorrono i kom gi-kwako tere.

¹⁵“Ibino daŋ kwoyo icao kor me ŋolo kop, kwo daŋ i diro. Ticcere bino bedo bala me kom epod; ibino tiyo i jabu, kede uci obedo bululu bululu, amaramar, kede arema karacel kede boŋo camanini ame owio uci mere abeco.

¹⁶Ibino dolo yie aryo kun borrere kede laccere rorom kede yi ciŋ.

¹⁷Ibino mwono gweŋe alilia i kom icao-nono kun iryeogi i yore aŋwen. I yore me agege, ibino keto iye cadiuc, tobaj kede kabankel.

¹⁸I yore me aryo, ibino keto iye emeradi, capir kede dayaman.

¹⁹Eka i yore me adekkere, te keto iye jatcint, agat kede ameticito.

²⁰I yore me aŋwennere, ket iye berul, onik kede jacipa. Ibino mwonogi luŋ i jabu ame oŋweŋweko i diro.

²¹Gweŋe alilia-nono luŋ bino bedo gin apar wie aryo kun ogogoro nyiŋ awobe Icrael i komgi, dok gin luŋ bino bedo bala kidi ame ogogoro me atem ciŋ, kun kidi acel acel tye kede nyiŋ ame ogoro i kome ame oporo atekere apar wie aryo.

²²Ti daŋ dok nyor aryo ame omino calo tol, kun itio kede jabu ame olio aber, me tweyo icao kor.

²³Ti daŋ atem me jabu aryo pi icao kor, eka ite keto atem aryo-nono i dog icao kor aryo.

²⁴Rwak nyor me jabu aryo-nu me dony iyi atem aryo ame tye i kom icao kor.

²⁵Dog nyor aryo-nono ibino mwono oko i kom gi-kwako tere aryo ame otio i jabu kun oŋweŋweko kede diro-ca, me tweyo icao kor i gin me wi gwok epod tuŋ nyime.

²⁶Ti dok atem me jabu aryo, ite ketogi i twok icao kor aryo ducu i kom doge ame tye i yie ame ceggi kede epod.

²⁷Ti dok atem ocele me jabu, eka ite kubogi i gin me wi gwok epod aryo ame tye i nyim i tuŋ tere piny kan ame okubere tuŋ malo i wi lati me epod ame otoko i diro.

²⁸Icao kor kede atemmere obino tweyo i kom atem me epod kede tol ame bululu bululu, me wek twe pyelle i wi lati me epod ame otoko i diro, me icao kor gonnyere oko i kom epod.

²⁹Aron otiŋ nyiŋ awobe Icrael iyi cao me ŋolo kop i dog cunye i kare luŋ ame en donyo i kabedo acil, wek bed me po i komgi kare luŋ i nyim Rwot.

³⁰Ibino keto Urim kede Tumim iyi cao me ŋolo kop, mannono daŋ bino bedo i dog cuny Aron i kare luŋ ame en donyo i nyim Rwot; mannono bino miyo Aron tino nolo kop a jo Icrael i dog cunye i nyim Rwot nino ducu.

³¹“Dok daŋ ibino tiyo jor abor ilul me epod ame kome luŋ obedo bululu bululu.

³²Myero mi doge bed tye me rwako wic; ibino cweyo kun idolo doge bala dog boŋo aruka ame odolo doge luŋ, me kur yeci.

³³Ibino luŋo ginnoro a rom okwer anyak i lak boŋo, ibino kwoyo ginnono kede uci obedo bululu bululu, amaramar kede arema. Kwo ginnono i lak jor luŋ kun icuculo i akinagi olan me jabu.

³⁴Olaŋ jabu kede gin acalli okwer myero rom lak jor ducu irit kun oculle acula.

³⁵Mannono daŋ Aron bino ruko i dog ticcere cite olaŋŋono bino kok winyere i kare ame en adonyo i nyim Rwot i kabedo acil kede i kare ame en dwogo oko, me en kur to.

³⁶“Ibino daŋ tiyo ginnoro acalo akwaa kede jabu ame olio aber, eka ite goro akwaa-nono kite ame ogoro kede atem ciŋ, ni, ‘Okwero obedo acil pi Rwot.’

³⁷Twe akwaa-nono irid i kom itambara me adwala i wic, kede tol obedo bululu bululu; ket i nyim itambara adwala me wic.

³⁸Ket cuŋ i tur nyim Aron, mannono bino miyo Aron uno bal me jami acil ame jo Icrael otero me miyo acalo motgi acil; bino cuŋ i tur nyime didik, me Rwot gamgi.

³⁹“Ibino daŋ dok tiyo kanyi, kun itio i boŋo camanini aber ame oŋweŋweko kome, i te tiyo daŋ itambara me adwala i wic i boŋo camanini aber, kede atambara me tweyo pyer ame odeo aber.

⁴⁰“Aco pi awobe Aron ibino kwoyo kanyi kede itambara me tweyo pyer, kede tok atitino. Ibino tiyogi wek gin bed me kwogo dok abeco meicel.

⁴¹Yin ibino ruko ominwu Aron kede awobe mere luŋ kede rukkono; ibino wirogi kede moo eka ite kwerogi, ite ketogi i dog tic acil, me wek gin ti tic me olamdog baŋa.

⁴²Ibino daŋ dok kwoyigi pale me wumo komgi cakere i pyergi naka iyi amurugi, kun ikwoo kede boŋo camanini,

⁴³Aron kede awobe mere bino ruko i kare ame gin adonyo i kema me rwatte, i kare ame gin awot ceggi i keno me lam me tic i kabedo acil, me bal kur bed i komgi, te miyogi to oko. Man doŋ bino bedo cik ame en kede ikwae bino gwoko nakanaka.