Read lango Yaa 29 Bible Online

Yaa 29 - lango bible

Yaa 29

¹“I kare me kwerogi me tiyo tic me olamdog baŋa, ibino timo kit man. Ibino kwanyo atin twon acel kede nyogi romi aryo ame roccoro mom i komgi,

²kede ogati a tobi mom iye, kede capat daŋ a tobi mom iye kun orubo kede moo, kede dok capat areppere ame daŋ tobi mom iye kun oweweo moo iye. Magi-nono luŋ yin yikgi kede moko ŋano apwottere.

³Ketgi luŋ iyi dita acel, eka ite kela ditanono, kede atin twon kede nyogi romi aryo ca.

⁴Mi Aron kede awobe mere bin i nyim dog kema me rwatte, eka ite lwoko komgi oko kede pii.

⁵Kwany doŋ boŋi me rukogi, ite ruko Aron i kanyi, jor abor me epod, epod, kede icao kor, twe pyere kede lati me epod ame otoko kede diro.

⁶Dwal itambara i wie, ite keto tok kwogo acil ocuŋ i wi tambara me adwala.

⁷Kwany doŋ moo me wir iony i wie, me iwire kede.

⁸Kel dok awobe mere, irukgi kede kanyi,

⁹twe pyergi kede itambara, rwak tok atitino ca i wigi; tic me olamdog doŋ bino bedo ticgi. Man doŋ cik ame obino lubo nakanaka. Ibino keto Aron kede awobe mere i dog ticgi kittono.

¹⁰“Ibino dok kelo twon i nyim kema me rwatte, Aron kede awobe mere te keto ciŋgi i wi twonnono.

¹¹Nek doŋ twonnono i nyim Rwot, i doggola kema me rwatte.

¹²Gwel remo twonnono me itotono i tuŋ aŋwen me keno me lam kun itotono kede nyako ciŋ; remo ame adoŋŋere ony i te keno lam.

¹³Wawaro dwolo luŋ ame owuwumo amonten, okene, emany kede aŋalura aryo, kede dwolo luŋ i komgi, ite wanogi luŋ i wi keno me lam.

¹⁴Cite riŋo twonnono, kede pyennere, kede wee yie, myero iwaŋ i mac i ŋe gony oko. Mannono bino bedo mot oŋolo me yalo Obaŋa pi bal.

¹⁵“Ka man otum, kwany nyok romo acel, mi Aron kede awobe mere ket ciŋgi i wie,

¹⁶nek doŋ nyok romonono, jol remo mere ite cocoro rom kom keno lam luŋ.

¹⁷Popoko riŋo nyokkono dul i dul, eka ite lwoko jami me yie, tyene ducu; ketgi i kom man ame ipopokoni karacel kede wie.

¹⁸Waŋ oko luŋ iwi keno me lam aboŋo gito moro iye. Mannono obedo mot ame oŋolo ote waŋo alutu baŋ Rwot; en mot a ŋwece kur me kweyo cuny, mot ame oŋolo me yalo Obaŋa ote waŋo oko i mac i nyim Rwot.

¹⁹“Icennere ibino dok kwanyo nyok romo ocele, Aron kede awobe mere te keto ciŋgi i wie.

²⁰Nek dok nyok romo-nono oko, gwet remo romo-nono aduno ite cwicwinyo i alago yit me tuŋ cem Aron kede me awobe mere, kede i kom twon ciŋgi kede twon tyengi me luŋ cem; cor remo odoŋŋere rom keno me lam luŋ.

²¹Dok ikwany remo i kom keno me lammono aduno kede moo wir, eka ite kikiro i kom Aron kede i kom rukkere kede i kom awobe mere kede rukgi; mannono mio en kede rukkere bedo acil karacel kede awo be mere kede rukgi.

²²“Wawaro dwolo i kom nyok romo kede moo yibe kede en owuwumo amonten, okene, aŋaluru aryo karacel kede dwolo ame tye i komgi, kede me amuru mere me tuŋ cem, pien mannono obedo nyok romo me keto dano i dog tic aciŋ,

²³kede ogati acel kede capat daŋ acel ame gin luŋ orubogi kede moo, kede capat arep acel ame okwanyo luŋ i akina ogati a tobi mom iye ame tye i dita i nyim Rwot.

²⁴Ketgi luŋ i cuny ciŋ Aron kede i cuny ciŋ awobe mere, ote yoko me bed mot ayoka i nyim Rwot.

²⁵Kwany dokoko i ciŋgi, ite waŋo i kom keno me lam me ameda i kom mol yalo Obaŋa ame oŋolo ote wano alutu, me bed gin a ŋwece kur ame yomoro cuny Rwot. Mannono en mol ame owaŋo i mac baŋ Rwot.

²⁶“Kwany ogok a nyok romo me kwero Aron pi ticcere ite yoko me bed mol ayoka i nyim Rwot; mannono en ame bino bedo iner a dok baŋi.

²⁷Ibino daŋ kwero mot ayoka me ogok, kede amuru ame omio me mot pi olamdog, ame doŋ oyoko oko, kun okwanyo i nyok romo me keto jo i dog tic, ote miyo acalo mot ayo ka, pien inerrono me Aron kede awobe mere.

²⁸Mannono bino bedo iner Aron kede awobe mere ame myero jo Icrael mi baŋgi kare ducu; pien mannono obedo iner ame myero jo Icrael mi baŋ olamdog i kom motgi me kweyo cuny, en motgi baŋ Rwot.

²⁹“Boŋŋi Aron luŋ acillege bino bedo me ikwae ame bino lube. Gin bino ruko i kare ame owirogi kede moo me ketogi i dog tic.

³⁰Atin awobi ame bino leyo tyene i tic me alamdog, bino ruko boŋŋi-nono nino kany wie aryo, i kare ame en donyo i kema me rwatte, me tic i kabedo acil.

³¹“Wot ited riŋo romo me ketogi i dog tic i kakannoro acil.

³²Aron kede awobe mere myero cam riŋo romo-nono kede ogati ame tye i dita; gin myero cam i doggola kema me rwatte.

³³Gin bino camo gin ame otio kede me kwanyo bal, ame oketogi kede i dog tic i kare me kwerogi; cite ŋattoro ata mom bino camo, pien jami-nono obedo jami acil.

³⁴Ka ce riŋo moro ame otio kede me ketogi i dog tic Odoŋ, onyo ogati odoŋ te tuno naka odiko, en odoŋŋere myero doŋ waŋ oko i mac. Mom dok reyero cam, pien cil.

³⁵“Man ibino limo i kom Aron kede i kom awobe mere daŋ amannono, kite ame aciki kede luŋ; ibino tiyo tic me ketogi i dog ticgi nino kany wie aryo.

³⁶Nino acel acel ibino ŋolo twon acel me yalo Obaŋa pi kwanyo bal. Ibino daŋ miyo mot oŋolo me bal pi keno me lam i kare ame itio tic me lam i kare ame itio tic me kwanyo bal i kome, eka ite wiro kede moo me kwero.

³⁷Ibino tiyo tic me kwanyo bal i kom keno me lam, ite kwero nino kany wie aryo; man bino miyo keno lam doko acil meicel, eka ginnoro keken ame bino gudo kom keno lam bino doko acil.

³⁸“Gin ame ibino miyo me mot i wi keno lam ene: nyogi rommi aryo me mwaka acel acel en ame ibino miyo nino ducu.

³⁹Nyok romo acel ibino miyo odiko, eka acel ite bino miyo otyeno.

⁴⁰Ibino miyo daŋ moko kwon apwottere karacel kede romo ame ibino geyo miyo; moko kwon apwottono myero bed a romo gwata acel ame orubo kede moo jeituni ame oodo aoda cupa aryo kede nucu, karacel kede koŋo yino ame romo cupa aryo kede nucu, magi-nono bino bedo me mot amala,

⁴¹Nyok romo ocele ibino miyo otyeno kun imio karacel kede mot me moko kwon, kede mot amala acalo bala me odiko, me bedo gin a ŋwece kur ame yomoro cuny, mot owaŋo i mac baŋ Rwot.

⁴²Mannono bino bedo mot yalo Obaŋa ame owaŋo i kare ducu, naka i kare ikwaewu luŋ, i dog ke ma me rwatte i nyim Rwot. Abino rwatte kedwu kuno me kop kedwu.

⁴³Abino rwatte i jo Icrael kuno, eka kwogona te lonyo bedo acil.

⁴⁴Abino lonyo kema me rwatte kede keno me lam bedo acil, eka dok ate kwero Aron kede awobe mere pi ticgi me bedo olamdog mera.

⁴⁵Dok abino bedo i akina jo Icrael, abino bedo Obaŋagi.

⁴⁶Gin bino ŋeyo ni an a Rwot Obaŋagi, a rik akwanyogi oko i lobo me Miciri, wek abed i akinagi, an a Rwot Obaŋagi.