Read lango Yaa 3 Bible Online

Yaa 3 - lango bible

Yaa 3

¹Kare moro ame onwoŋo Muca rik tye akwayo romi a ore, Yecero papa a cege, alamdog me Midian, en otero romi i tim kan abobor tuŋ to, te wot tuno naka i Koreb, ame obedo kidi Obaŋa,

²Amalaika a Rwot rik te nen baŋe i leb mac alyel i yat obunere; Muca ociko waŋe iye, pien kadi bed mac rik tye alyel i yat obuŋere-nono, ento ginnoro iye onwoŋo mom awan,

³Muca te kop i cunye ni, “Mito koŋ aŋi twon ginnoro-ni i ceggi, me aniaŋ gin omono yat obuŋere-ni waŋ.”

⁴Ka Rwot oneno ni Muca abino neno, Obaŋa olwoŋe i yat obunere-nono ni, “Muca, Muca.” Muca ogamo ni, “An ene.”

⁵Obaŋa te kobbe ni, “Kur ibin aceggi kan. Gony amuk oko i tyeni, pien kan icuŋ iye-nono obedo lobo acil.”

⁶Dok te medo ni, “An Obaŋa a kwaroni, Obaŋa Iburaim, Obaŋa Icaka kede, Obaŋa Yakobo.” Muca te wumo waŋe oko, pien onwoŋo alworo neno kom Obaŋa.

⁷Rwot te kobo ni, “Atyeko doŋ neno can a jona i Miciri, awinyo kokogi i kom odoŋe a loogi tic; aŋeo canginono, daŋ atye aparo pire,

⁸An doŋ abino piny me larogi oko i ciŋ jo Miciri, abino kwanyogi oko i lobo Miciri, ate terogi i lobo aber, alac ata, dok opoŋ i cak kede moo kic. Lobo-nono obedo lobo a jo Kanaan, jo Kitti, jo Amor, jo Periji, jo Kivi kede jo Jebuc,

⁹Nen, koko a jo Icrael doŋ owinyere baŋa, atyeko daŋ neno kit a jo Miciri wunogi kede,

¹⁰Aman yin doŋ yikere ibin acwai baŋ Parao. Amito iwot ikwany jona, jo Icrael, ya oko i lobo Miciri.”

¹¹Muca okobbi Obaŋa ni, “An ana ame atwero wot i nyim Parao, onyo ame aromo kwanyo jo Icrael me ya oko i Miciri?”

¹²Obaŋa ogamo ni, “An abino bedo kedi, gin abino nyuto ni an aori ene: kare a doŋ ikwanyo jona oya oko i Miciri, ibino woro Obaŋa i wi kidi man.”

¹³Muca te penyo Obaŋa ni, “Kara ka an abino wot baŋ jo Icrael ate kobbigi ni Obaŋa a kwariwu ocwaa baŋwu an abino kobbigi ŋo ka ce gin dok openya ni, ‘Nyiŋe kara ŋa?’ ”

¹⁴Obaŋa te dokki Muca ni, “Atye Gira Acalo Atye. Kobbi jo Icrael ni ‘Atye ocwaa baŋwu.’

¹⁵Obaŋa dok te kobbi Muca ni, ‘Myero ikobbi jo Icrael ni, “Rwot[1]”, ame en Obaŋa a kwariwu, Obaŋa Iburaim, Obaŋa Icaka kede Obaŋa Yakobo, ocwaa baŋwu.’ Mannono bino bedo nyiŋa atwal; ibino lwoŋa wunu amannono i ka re ducu, naka ikwaewu daŋ luŋ.

¹⁶Wot icok odoŋe a jo Icrael ite tittigi ni, ‘Rwot ame Obaŋa a kwariwu, Obaŋa Iburaim, Obaŋa Icaka kede Obaŋa Yakobo, onyutte kene baŋa kun kobba ni, An ikoma doŋ atyeko neno gin a jo Miciri tye atimo i komwu,

¹⁷doŋ atyeko moko me kwanyowu oko i lobo me Miciri, kan ame otye ka wunowu iye. Abino terowu i lobo a jo Kanaan, jo Kitti, jo Amor, jo Periji, jo Kivi, kede jo Jebuc, lobo ame opoŋ i cak kede moo kic.’

¹⁸Odoŋe me Icrael bino gire ye koppi. Yin myero doŋ iwot karacel kedgi baŋ abaka me Miciri ite wot kobbe ni, ‘Wan orwatte kede Rwot, ame obedo Obaŋa a jo Eburania. Tim ber iyewa owot wot me nino adek i tim, me owot omi motwa ame oŋolo me yalo Rwot Obaŋawa.’

¹⁹Aŋeo ni abaka me Miciri mom bino ye iwoto wunu ka mom odio adia i ciŋ atek,

²⁰pi mannono, an abino ryeyo ciŋa, abino pwodo jo Miciri i kite kwone taŋo luŋ ame abino tiyo i komgi. Icennere gin bino ye iwoto wunu.

²¹Dok abino miyo cuny jo Miciri bedo yom i kom jowu. Mom obino miyo iwoto wunu ciŋwu nono i kare me yawu i Miciri.

²²Dako acel acel bino kwayo dako wadgi, kede dako ame bedo i ode, wel me ryal kede me jabu kede boŋŋi abeco a myero irukki itinowu awobe kede anyira. Man bino miyo iyako wunujami ajo Miciri.”