Read lango Yaa 30 Bible Online

Yaa 30 - lango bible

Yaa 30

¹“Ibino tiyo keno lam me waŋo odok akur; ibino tiyo i bao okuto alwi.

²Borrere myero bed futi acel kede nucu, laccere daŋ futi acel kede nucu; borrere kede laccere myero bed a rorom. Borrere me malo myero bed futi adek; kun tye i tuŋ aŋwen ame okubere kede karacel.

³Mwon kome oko kede jabu ame olio aber; mwon wie kede laŋete luŋ kede tuŋ aŋwen luŋ; eka ite dolo doge oko i jabu.

⁴Ti atem me jabu aryo pire. Ket atemmono piny i te doge ame idolo-ni, kun atem acel acel otikere awottere ame tye tuŋ ocele; gin bino bedo me rwako ludi me tiŋo.

⁵Ti ludi kede yat okuto alwi, mwon komgi oko kede jabu.

⁶Ket i nyim boŋo me icika ame owumo canduk ame kop me caden bedo iye, i nyim kom-me-kica, kan ame abino rwatte kedi iye.

⁷Aron bino waŋo odok a ŋwece kur kuno. Nino luŋ ka en ayiko mac tara odiko, en bino waŋo;

⁸dok ka Aron keto tara malo otyeno, daŋ bino waŋo. Obino waŋo odok akur kittono nino ducu i nyim Rwot, naka i kare ikwaewu luŋ,

⁹Mom obino miyo iye mottoro me kit odokkoro ocele, kadi mot awaŋa, kadi mot me moko kwon; dok daŋ kur iony iye mot amata.

¹⁰Aron myero ti gin me kwanyo bal i kome i tuŋ aŋwen luŋ i mwaka acel tyen acel. En bino tiyo tic me kwanyo bal i kome kede remo me mot oŋolo me kwanyo bal i mwaka acel tyen acel naka i kare ikwaewu luŋ. Mannono en gin acil meicel baŋ Rwot.”

¹¹Rwot okobbi Muca ni

¹²“Ka icako kwano wet jo Icrael, ŋat acel acel bino miyo ginnoro baŋ Rwot me lakoro kwo mere i kare ame ikwanogi, me cannoro arac kur pot i komgi i kare ame ikwanogi.

¹³Ŋat acel acel ame okwano bino miyo jami-ni: nucu cekel me kabedo acil (cekel acel rom kede gera pyeraryo); nucu cekellono bino bedo me mot baŋ Rwot.

¹⁴Jo luŋ aluŋa ame doŋ okwano welgi, cakere i kom jo ame mwaka me ditogi doŋ oromo pyeraryo wot kede malo, gin luŋ bino miyo mot baŋ Rwot.

¹⁵Ŋat olony mom bino miyo adwoŋ akato nucu cekel, acan daŋ mom bino miyo an ok i te nucu cekel, i kare me miyo mot baŋ Rwot me kwanyo bal i komwu.

¹⁶Ibino gamo lim me kwanyo bal i kom jo Icrael; limmono luŋ bino bedo me konyo tic me kema me rwatte, me bed me po pi jo Icrael i nyim Rwot pi kwanyo bal i komgi.”

¹⁷Rwot okobbi Muca ni,

¹⁸“Ibino daŋ tiyo tako me mola, kede akwak tere daŋ me mola, me bed me lwokere. Cib cuŋ i akina kema me rwatte kede keno me lam; ony doŋ iye pii.

¹⁹Kannono en ame Aron kede awobe mere bino lwoko iye ciŋgi kede tyengi.

²⁰I kare ame gin woto i kema me rwatte, onyo owoto ceggi i keno me lam me tic iye, me waŋo mot ame owaŋo i nyim Rwot, gin koŋ bino geyo lwok kede pii, me pe oto.

²¹Gin bino lwoko ciŋgi kede tyengi me mom oto. Man bino bedo cik baŋwu nakanaka, baŋ Aron kede baŋ ikwae naka i kare ikwaegi luŋ.”

²²Rwot dok te medde kobo baŋ Muca ni,

²³“Kwany gin a ŋwece kur meicel: murra ame olio acil ame pekkere romo cekel mia abic, cinamon ame ŋwece ŋweye amit, a romo cekel mia aryo kede pyerabic, ame mannono en nucu mere, lum ame ŋwece kur ame romo cekel mia aryo kede pyerabic,

²⁴kacia cinamon cekel mia abic, ame opimo i cekel me kabedo acil, kede moo jeituni ame romo cupa apar.

²⁵Jami magi en ame ibino yiko kede moo acil me wir ame orubo kite ame orubo kede moo a ŋwece kur; moonono bino bedo moo wir acil.

²⁶Ibino wiro kede kema me rwatte kede canduk ame kop me caden bedo iye,

²⁷kede meja, kede jami me ticcere luŋ, kede gicibo tara kede jami ticcere luŋ, kede keno lam me odok akur,

²⁸kede keno lam me waŋo mot me yalo Obaŋa, kede jami ticcere luŋ, kede tako lwok kede akwak tere.

²⁹Ibino kwerogi me obed jami acil meicel, ame ginnoro luŋ ame bino gudo kome doko oko acil.

³⁰Ibino daŋ wiro Aron kede awobe mere, me kwerogi me gin oti baŋa tic me olamdog.

³¹Dok ibino kobbi jo Icrael ni, ‘Man bino bedo moona acil me wir, naka i kare ikwaewu luŋ.

³²Mom obino onyo i kom dano moro atata, mom daŋ ibino wunu rubo moro a rom kede; en moo acil, bino bedo acil baŋwu daŋ,

³³Ŋat ame bino rubo moro kittono onyo ŋat ame bino wiro dano moro atata, waŋe bino rwenyo oko i akina jo turgi.’ ”

³⁴Rwot okobbi Muca ni, “Kwany gin a ŋwece kur, citakte kede onika kede galbani, gin a ŋwece kur kede odok me luban ame olio aber (mi pekgi luŋ bed arorom)

³⁵eka i te yiko kede odok akur acil ame olio aber, kun orubo kit ame orubo kede gin a ŋwece kur, pwor daŋ iye kado aduno.

³⁶Cacanyo mogo ilur oko atitino, i te keto mogo i nyim canduk me kop me caden ame tye i kema me rwatte kan ame abino rwatte iye kedi. Mannono bino bedo gin acil meicel baŋwu,

³⁷Mom dok ibino timo wunu odok akurroro ame orubo kittono pirwu kenwu. I tuŋ baŋwu odokkono bino bedo gin ame okwero obedo acil pi Rwot.

³⁸Ŋat ame bino rubo ginnoro me anwea kittono, waŋe bino rwenyo oko i akina jo turgi.”