Read lango Yaa 31 Bible Online

Yaa 31 - lango bible

Yaa 31

¹Rwot okobbi Muca ni,

²“Nen, atyeko yero Bejaleri wot a Uri, ame wot a Kur, me itekere a Juda.

³Atyeko doŋ miyo cuny Obaŋa opoŋ i yie, karacel kede ryeko me tic, kede niaŋ atut, kede ŋec, kede tic luŋ me diro,

⁴me roto callogo anyen me tic me diro ame kwongi papat, ame otio i jabu, ryal kede mola;

⁵karacel kede ŋoŋolo gweŋe alilia me amwona i kom jabu, kede ryeko me payo bao kede tiyo kit tic ocele luŋ me diro.

⁶Nen, atyeko daŋ keto Okoliab ame wot Akicamak, me itekere a Dan, me tic karacel kede. Atyeko daŋ miyo ryeko me tic baŋ jo ame kwiri, me gin ti jami luŋ ame aciki iyeni:

⁷kema me rwatte, kede canduk ame kop me caden bedo iye, kede kom-me-kica, ame bedo i wie, kede jami me yi kema luŋ;

⁸meja kede jami ticcere, gi-cibo tara me jabu olio aber karacel i jami ticcere luŋ, keno lam me odok akur,

⁹keno lam me waŋo mot oŋolo me yalo Obaŋa karacel i jami ticcere luŋ, tako lwok karacel kede akwak tere;

¹⁰boŋŋi aruka ame otio abeco, boŋŋi aruka acil pi Aron alamdog, karacel kede boŋŋi aruka pi awobe mere, pi ticgi me bedo olamdog;

¹¹moo wir kede odok a ŋwece kur pi kabedo acil. Gin obino tiyo i kite ame doŋ atyeko ciki kede.”

¹²Rwot okobbi Muca ni,

¹³“Kob baŋ jo Icrael ni, ‘Ibino wunu gwoko cabit mera, pien en gin ame nyuto, ame tye i akina an kede wun naka i kare ikwaewu luŋ, me gin ŋe ni an a Rwot, ame alonyowu ibedo wunu acil.

¹⁴Gwok wunu cabit, pien nino-nono cil baŋwu; ka ce ŋattoro obalo ninonono, myero nek oko, ŋat ame tio ticcoro iye, waŋe bino rwenyo oko i akina jo turgi.

¹⁵Ibino wunu tic pi nino abicel, cite nino me abiro obedo cabit me weo mot, nino acil baŋ Rwot. Ŋat ame tio ticcoro i cabit myero nek oko.

¹⁶Pi mannono, jo Icrael myero gwok cabit naka i kare ikwaegi luŋ, acalo cikere ame ri nakanaka,

¹⁷Mannono anyut ame bino ri atwal ame tye i akina an kede jo Icrael, ni, Rwot rik otio polo kede lobo nino abicel, owe mot i nino me abiro, kome te pye.’ ”

¹⁸Kare ame doŋ otyeko kop kede Muca i wi kidi me Cinai, omie kidi apada aryo me kop me caden, kidi apada aryo ame Obaŋa en ocoo i ciŋe.