Read lango Yaa 32 Bible Online

Yaa 32 - lango bible

Yaa 32

¹Kare ame jo oneno ni Muca ori, kun mom dwogo piny i wi kidi, gin ocokere kengi baŋ Aron, ote kobbe ni, “Ya malo itiyiwa obaŋa, ame bino telo nyimwa; pien Muca moro-ni, ame yam okwanyowa i Miciri, wan mom doŋ oŋeo gin ame otimo.”

²Aron te kobbigi ni, “Gwegweto wunu atem me jabu ame tye i yit monwu kede awobewu kede i mea anyirawu, me ikelgi wunu baŋa.”

³Jo luŋ daŋ te timo amannono, ogwegweto atem i yitgi oko ote kelo baŋ Aron.

⁴En te gamo jabu i baŋgi, te luto kome anyul me tet, eka te tiyo atin twon ame otwako atwaka. Gin te kobo ni, “Jo Icrael we, obaŋawu ennu ame okwanyowu i lobo Miciri!”

⁵Ka Aron oneno amannono, ocano keno me lam i nyime; eka te cako rabo kannaler ni, “Dik i obino kwero ecuban a Rwot.”

⁶Gin rik ote dilo odiko con, ote miyo mot awaŋa apol atata, eka gin te kelo motgi me kweyo cuny; jo doŋ te bedo piny cam kede mat, ote ya malo me tuko.

⁷Rwot okobbi Muca ni, “Wot piny, pien joni a rik ikwanyo i lobo me Miciri oballe doŋ oko.

⁸Gin oweko cik a rik acikogi kede oko oyotoyot, olunyo tiyo atin twon ame otwako atwaka pirgi kengi, ocako daŋ doŋ woro oko kun daŋ oyalo gigi, dok daŋ okobo ni, ‘Jo Icrael, neno obaŋawu ame rik okwanyowu i lobo me Miciri!’ ”

⁹Rwot te kobo baŋ Muca ni, “An doŋ aneno joni, gin obedo jo ame ŋutgi nwaŋ;

¹⁰pi mannono, koŋ doŋ iweka gira kena, me akemona koŋ yeny i komgi, me ami wigi two oko; cite yin abino miyi idoko rok adit.”

¹¹Cite Muca te bako doge baŋ Rwot Obaŋa mere kun kobo ni, “Ama Rwot, piŋo akemo omaki atek ateka i kom joni ame yin en ikwanyogi i lobo me Miciri kede te ko adwoŋ i twero me ciŋi.

¹²Piŋo omio jo Miciri kobo ni, ‘Oterogi kara pi rac me wot tyekogi oko i akina kiddi kuca, kede miyo wigi two oko i wi lobo.’ Tim ber ilok cunyi i akemoni ager-ri oko, me kur dok itim joni arac.

¹³Po i kom Iburaim, Icaka kede Icrael omironi, ame rik yin ikomi ikwonere kede nyiŋi keni keni baŋgi. Rik yin ikobo baŋgi ni, ‘Abino miyo ikwaewu nya apol bala acer me polo, dok daŋ lobo-ni luŋ ame rik acikere pire, abino miyo baŋ ikwaewu, gin bino leyo me bedo megi atwal.’ ”

¹⁴Rwot te jwayo tammere oko me timo gin arac i kom jo mere.

¹⁵Muca te ya i wi kidi dok piny kun omako kiddi apada aryo me kop me caden i ciŋe; kiddi magi onwoŋo ocoo tuŋi kede tuŋi, yigi kede ŋegi,

¹⁶Kiddinono Obaŋa gire en onwoŋo otio, coc iye daŋ Obaŋa en onwoŋo ocoo kun ogoro i kom kiddi.

¹⁷Kare ame Yocwa owinyo dwon lwak ame awo, okobbi Muca ni, “Woo tye adwoŋ meicel i gony bala me lweny.”

¹⁸Cite Muca te gamo ni, “Mannono gire mom woo me loyo lweny, dok daŋ mom koko a jo oloo, ento an awinyo dwon jo a wer awera.”

¹⁹Kare ame en doŋ ceggi i gony, eka te neno atin twon kede myel, akemo alyet te mako Muca atekateka, omio en te reto kiddi apada aryo piny ame onwoŋo en omako i ciŋe, eka te ŋiŋida oko i te kidi me Cinai.

²⁰Te kwanyo atin twon ame onwoŋo lwak otio-ni, te wot waŋo oko i mac, te rerego oko ayom, onyo i pii, te miyo jo Icrael luŋ mato oko.

²¹Muca te penyo Aron ni, “Jo-ni kara otimi niŋo ba, omio yin ikelo bal adwoŋ rom man i komgi-nie?”

²²Aron te gamo ni, “Kur twon akemo alyet nui oko, adwoŋŋa; yin giri iŋeo ni jo-ni cunygi gire mito ka timo gin arac.

²³Pien gin okobba ni, ‘Tiyiwa obaŋa ame bino telo nyimwa; pien Muca moro-ni, ame yam okwanyowa i lobo Miciri, wan mom doŋ oŋeo gin ame otime.’

²⁴An ate kobbigi ni, ‘Dano acel acel ame tye kede jabu myero gwet oko.’ Gin te miya, ate onyo i mac, doŋ atin twon-ni oya iye.”

²⁵Kare ame Muca oneno ni jo doŋ ogak oko, pien Aron en omiogi ogak, kun omio lewic omakogi i akina okworgi,

²⁶Muca ocuŋ i dog gony, te penyo lwak ni, “Ŋa ame pwod tye tuŋ baŋ Rwot? Dano-nono bin baŋa.” Awobe a Levi te cokere karacel bino baŋe.

²⁷Muca te kobo baŋgi ni, “Rwot Obaŋa a jo Icrael okobo ni, ‘Dano acel acel myero ket pala romo mere i laŋete, eka te donyo kede i gony kun wiwira kede i dog gony tuŋi kede tuŋi kun mano yie luŋ ame ŋat acel acel neko ominnere, neko awottere, dok neko a laŋete.’ ”

²⁸Awobe a Levi te tiyo kite a Muca ocikogi kede. Gin te neko jo i nino-nono ame romo tutmia adek.

²⁹Muca te kobo ni, “Tin wun doŋ ikwerre wunu kenwu me tiyo tic a Rwot, kun ŋat acel acel lokere neko wode kede ominnere, me Rwot tin miwu winyo.”

³⁰Orwo mere Muca te kobbi jo ni, “Wun itimo wunu bal adwoŋ meicel, aman an awot malo baŋ Rwot, gwok onyo abino timo ginnoro me kwanyo bal i komwu.”

³¹Muca daŋ te dok baŋ Rwot, te kobo ni, “Oi do! jo man otimo twon bal adwoŋ meicel, otio obaŋa me jabu pirgi kengi.

³²Cite ka ibino timogi kica i kom balgi amanni, timgi kica; aco ka mom, akwai ni kono doŋ iweo nyiŋa oko ame icoo i bukki.”

³³Cite Rwot te kobbi Muca ni, “Dano ame otimo balloro i nyimna en ame awee nyiŋe oko i bukka,

³⁴Ento yin wot giri itel jo Icrael, itergi kan ame yam akobbi ca; nen ba, amalaikana bino telo nyimi. Ento tye kare ame abino limogi, kare-nono en ame abino keto kede can i komgi pi balgi-ni.”

³⁵Rwot te miyo two apek gwaro jo luŋ pi atin twon ame gin omio Aron otio.