Read lango Yaa 33 Bible Online

Yaa 33 - lango bible

Yaa 33

¹Rwot okobbi Muca ni, “Ya wunu oko i kan, yin karacel kede jo luŋ ame rik ikwanyogi i lobo Miciri me terogi i lobo ame rik akwoŋo pire baŋ Iburaim, Icaka, kede Yakobo, kun acikogi ni abino miyo baŋ ikwaegi.

²Dok daŋ abino cwayo amalaikana telo nyimi, cite bino ryemo jo Kanaan oko, kede jo Amor, jo Kitti, jo Periji, jo Kivi, kede jo Jebuc.

³Wot malo lobo opoŋ i cak kede moo kic; ento an mom abino wot kedwu kuno, me kur ami wiwu two oko iyo, pien wun ibedo wunu jo ame ŋutgi nwaŋ.”

⁴Kare ame lwak owinyo kop arac-ci gin okumo; dano moro mom orukere i ruk me kwogo,

⁵Pien Rwot onwoŋo okobbi Muca ni, “Kobbi jo Icrael ni, ‘Wun jo ame ŋutwu nwaŋ; ka abino wot kedwu kuno pi kare moro anonok keken, abino miyo wiwu two oko. Aman doŋ myero igony rukwu oko me kwogo i komwu, me anen gin ame abino timowu kede.’ ”

⁶Mannono en omio gin ogonyo rukgi oko me kwogo cakere i kom kidi me Koreb wot kede anyim.

⁷I kare-nono luŋ Muca obedo tero kema kun guro i ŋe gony kan ame bor i gony, eka te lwoŋo ni kema me rwatte. Doŋ ŋat ame mito ŋeyo kopporo I baŋ Rwot woto oko kan ame kema me rwatte tye iye, ame rik onwoŋo tye i ŋe gony.

⁸Kare luŋ ka Muca tye awot i kema me rwatte, jo luŋ ya malo, kun ŋat acel acel cuŋ i dog kema mere, me neno yo Muca tuno waŋ ame doŋ odonyo i kema me rwatte.

⁹Ka Muca doŋ odonyo i kema me rwatte, pagi pol dwogo piny te cuŋ i doggola kema me rwatte, eka Rwot te kop i Muca.

¹⁰Jo luŋ ka doŋ oneno pagi pol ogurre i dog kema, gin luŋ oya malo ote woro Obaŋa kun ŋat acel acel tye gire i dog kema mere.

¹¹Mannono en kit a rik Rwot okobo kede i Muca wan i waŋ, kite acalo dano kobo kede awottere. Kare ame Muca odok i gony, Yocwa wot a Nuni ame rik en awobi ame konye, doŋ i kema me rwatte.

¹²Muca te kobbi Rwot ni, “Nen ba, yin onwoŋo rik ikobba ni, ‘Kwany jo-ni oko,’ cite mom ite miya ŋat ame ibino cwayo woto keda. Ento yin ikobo ni ‘Anei kom i nyiŋi, dok daŋ yin iyomoro cunya.’

¹³Doŋ ka an onwoŋo ayomoro cunyi, tim ber inyutta yo meri, me aŋei, ate nwoŋo winyo i baŋi. Dok myero ine ni rok man obedo joni.”

¹⁴Rwot te gamo ni, “An i koma abino wot kedwu, ate bino miyi weo.”

¹⁵Muca dok te kobo ni, “Kace mom yin ikomi ame iwot kedwa, kur giri imiwa oya i kan.

¹⁶Kara doŋ obino ŋeyo niŋo ni an anwoŋo gum i baŋi, an karacel kede lwaki? Mom wot ame iwot kedwa-ni en ame miowa opokere i rok ocele? An karacel kede joni, wan opat apata i rok acele ame tye i wi lobo.”

¹⁷Rwot okobbi Muca ni, “An abino tiyo gin ame ikoko-nono ikome, pien iyomoro cunya, dok daŋ aŋei kom i nyiŋi.”

¹⁸Muca te gamo ni, “Tim ber inyutta kwogoni.”

¹⁹Rwot te gamo ni, “Abino miyo ineno berra luŋ i nyimi, dok abino tuco nyiŋa ni, ‘Rwot,’ i yiti. Abino nyuto berra baŋ ŋat ame abino nyuto berra baŋe, dok abino timo kica baŋ ŋat ame abino timo kica baŋe.”

²⁰Rwot dok te kobo ni, “Cite mom ibino neno waŋa, pien dano mom twero neno waŋa eka te dok bedo kwo.”

²¹Rwot dok te kobo ni, “Nen ba, kabedo moro tye i ŋeta kan i wi kidi, en ame yin ibino cuŋ iye.

²²Kare ame kwogona bino beo kato kannono, abino miyo yin ibedo i akina kidi obarre, eka ate wumi oko i ciŋa tuno ka doŋ atyeko kato oko;

²³ate doŋ kwanyo ciŋa oko, yin doŋ ite neno ka ŋea keken, cite mom ibino neno waŋa.”