Read lango Yaa 34 Bible Online

Yaa 34 - lango bible

Yaa 34

¹Rwot okobbi Muca ni, “Tyeŋ kon kiddi apada aryo ame calli maca me agege ca, me aco iye kop a rik acoo i kiddi me agege ca, ame rik ibin ireto ite ŋiŋido oko.

²Yikere odiko, eka ite bino cuŋ i nyima i wi kidi me Cinai.

³Ŋattoro ocele kur bin kedi i wi kidi malo, ŋattoro daŋ myero kur nen kakannoro ducu i wi kidi; romi kede dok mom daŋ bino cam i ŋet kidi.”

⁴Muca daŋ te tyeŋo kiddi apada aryo ame calli maca me agege ca; en te ya malo idiko con, te yito i wi kidi malo kite a rik Rwot ocike kede; owoto daŋ i kiddi apada kun omako i ciŋe.

⁵Rwot te bino piny kede pol, te cuŋ karacel kede kuno, eka te tuco nyiŋ Rwot.

⁶Rwot te kato i nyime kun lwoŋo nyiŋe kene ni, “Rwot, Rwot, Obaŋa ame akica, dok a timo jo ber, ame akemo mom mako oyotoyot, Obaŋa ame marrere dwoŋ dok mom lokere, dok ame genne meicel.

⁷Obaŋa ame gwoko marrere a mom lokere pi jo tutumia kede tutumia, kun timogi kica i rocgi, i timgi me turo cik, kede i balgi. Ento en gire mom kwanyo kop i kom obalo, cite keto can i kom ikwae kede dok i kom ikwae ikwaegi, pi bal a kwarogi naka i lwagi me adekkere kede me aŋwennere.”

⁸Muca te ru kulo wie piny i lobo, te woro Obaŋa,

⁹Eka te kobo ni, “Ama Rwot, ka ce aman doŋ ayomoro cunyi, tim ber yin Rwot en iwot kedwa, kadi wan jo ame ŋutwa nwaŋ; itimwa kica i gin a wan oroco dok obalo, miwa obed joni.”

¹⁰Rwot dok te kobo ni, “Nen ba, aketo cikere. Abino tiyo gin me awura apol ata ame mom ru yam otimere i lobo ducu onyo i rokkoro, abino timo i nyim lwakki luŋ; eka jo luŋ ame ibedo wunu i akinagi bino neno tic a Rwot. Gin ame abino tiyo kedwu-nono, bino bedo a mio jo lworo.

¹¹“Kop ame aciki iye tin-ni myero igwok. Nen abino ryemo jo Amor oko i nyimi karacel kede jo Kanaan, jo Kitti, jo Periji, jo Kivi, kede jo Jebuc.

¹²Gwokere ba, kur icikere i jo ame bedo i lobo ame iwot wunu iye-nono, me gin kur dok kumma me cikowu i akinawu.

¹³Ento mumuko wunu kenogi me yalo jogi oko, ret wunu kiddigi ame ocibo me awora piny, toŋu Acerimgi oko,

¹⁴(pien mom myero dok iwor wunu obaŋa moro ocele, pien Rwot ame nyiŋe Nyeko, en Obaŋa ame nyek).

¹⁵Kur icikere wunu i jo ame bedo i lobo-nono, pien ka ce gin bino doko alaya pi lubo yo obanagi, eka ote daŋ miyo mot me yalo obaŋagi, mio ŋattoro bino lwoŋowu, ite camo wunu gin ame gin oŋolo oyalo obaŋagi.

¹⁶Dok ka inyommi wunu awobewu anyiragi, ka ce anyiragi odoko alaya pi lubo yo obaŋagi, bino miyo awobewu daŋ doko alaya i lubo yo obaŋagi.

¹⁷“Kur iti obaŋa moro me nyonyo ame itwako piri keni.

¹⁸“Ibino kwero wunu ecuban me Ogati a Tobi mom iye. Ibino camo wunu ogati a tobi mom iye pi nino kany wie aryo i kare a rik aciko, i dwe me Abib, kite a rik acikowu kede; pien rik iya wunu i lobo me Miciri i dwe me Abib.

¹⁹Itino kao luŋ mega, twonini luŋ me kao, mea dok kede me rommi.

²⁰Kao a kana ibino lakoro atin nyok romo, aco ka mom ilakoro, obino mojo ŋute oko. Itinoni me kao luŋ awobe mege, ibino lakorogi. Dano moro myero kur bin i nyima ciŋe nono.

²¹“Ibino tiyo tic meri pi nino abicel, ento i nino me abiro mere ibino weo iye; ibino wunu weo kadi i kare me pur onyo i kare me kac.

²²Ibino wunu daŋ kwero ecuban me cabit abiro, mannono en wi mwaka me kayo ŋano ame ogeo cek, kede dok nino adito me nyono cam i dero i agikki mwaka.

²³Joni ame co luŋ bino bino tyen adek i mwaka acel i nyim Rwot Obaŋa, ame Obaŋa Icrael.

²⁴Pien abino ryemo rok ocele oko i nyimwu, wan lobo abino miyo bedo alac. Ŋattoro daŋ mom gire bino bedo i mit i lobowu i kare ame ibino wunu wot i nyim Rwot Obaŋawu tyen adek i mwaka acel.

²⁵“Kur imi remo me gin oŋolo me yala karacel i tobi. Kur iwek gin oŋolo me yala me nino adoŋo me Kato bed naka tuno odiko.

²⁶Cam me wi mwaka ame ogeo cek i potowu myero ikel i ot a Rwot Obaŋani. Kur ited riŋo atin dyel i cak a tottere.”

²⁷Rwot dokokobbi Muca ni, “Co kop me cikere magi luŋ, pien doŋ acikere kedwu, yin karacel kede jo Icrael.”

²⁸Muca ori baŋ Rwot kuno nino pyeraŋwen, icen kede iwor kun mom daŋ camo kadi mato ginnoro. En te coyo kop ame ocike iye-nono i kom kiddi apada, gin cik tomon.

²⁹Icennere Muca doŋ te yitto oko piny i wi kidi kun omako kiddi ame apada aryo i ciŋe, ame ocoo iye kop me caden. I kare ame en yito piny i wi kidi, Muca onwoŋo mom ŋeo ni tur nyime tye apapara, pien onwoŋo obedo kop gin Obaŋa.

³⁰Kare ame Aron kede jo Icrael luŋ oneno Muca, nen ba, gin oneno nyime tye apapara apapar jo te lworo noke aceggi oko.

³¹Ento Muca te lwoŋogi. Aron karacel kede otel a lwak te cako wot baŋe, Muca te kop kedgi.

³²Icennere jo Icrael luŋ te wot baŋe ceggi. Muca te miyogi cik luŋ ame Rwot otitte i wi kidi me Cinai.

³³Kare ame Muca doŋ otyeko kop kedgi oko, owumo tur nyime kede boŋo.

³⁴Cite kare luŋ ka Muca woto i nyim Rwot me wot kop kede, en kwanyo boŋo oko i tur nyime, tuno waŋ ame en doŋ adwogo; ka en okato oko, titti jo Icrael kop ame Rwot ocike iye.

³⁵Jo Icrael ka oneno tur nyim Muca, gin oneno ni del me tur nyim Muca tye apapara apapar, omio Muca dok te wumo tur nyime oko kede boŋo, naka waŋ ame en dok awot kop i Rwot.