Read lango Yaa 35 Bible Online

Yaa 35 - lango bible

Yaa 35

¹Muca ocoko jo Icrael luŋ, eka te kobbigi ni, “Man en gin ame Rwot ociko ni itim wunu.

²Ti wunu ticwu pi nino abicel, ento i nino me abiro mere, bed wunu kede cabit acil me weo mot baŋ Rwot. Dano ame bino tiyo ticcoro i nino-nono obino neko oko.

³Mom ibino wunu kuto mac i pacciwu luŋ i nino me cabit.”

⁴Muca dok te kobo baŋ lwak jo Icrael luŋ ni, “Gin ame Rwot ociko ene:

⁵Raa wunu mot me amia baŋ Rwot i akinawu kun ŋat acel acel tero mottere baŋ Rwot i cuny aler: jabu, ryal kede mola,

⁶uci bululu bululu kede en amaramar, kede arema mere, kede boŋo camanini ame owio uci mere aber; yer dyegi,

⁷kede lao nyogi rommi ame onyoŋo, lao dyegi; bao okuto alwi,

⁸moo me mac tara, gin a ŋwece kur me yiko moo wir kede pi odok a ŋwece kur me awaŋa;

⁹gweŋe alilia me onik kede gweŋe ocele mege me amwona i kom jabu pi epod kede me icao kor.

¹⁰“Dok jo luŋ i akinawu ame ryek i tic, gin myero bin ti jami ducu ame Rwot ociko ni gin ti: myero gin oti kema,

¹¹akemmere kede gi-wumo wie, akoddere, tere, ari mere, pagi mere kede acib tere;

¹²canduk me cik kede ludi me tiŋo, kom me kica kede boŋo me icika mere;

¹³meja kede ludi me tiŋo, kede jami ticcere luŋ kede ogati me aketa i nyim Rwot;

¹⁴gi-cibo mac kede jami ticcere kede tara mere kede moo mere;

¹⁵keno lam me odok kede ludi me tiŋo, kede moo wir, kede odok a ŋwece kur kede cuka me geno doggola kema;

¹⁶keno lam me yalo Obaŋa i mot awaŋa karacel kede keikei me mola kede ludi me tiŋo, kede jami me ticcere luŋ, kede tako lwok kede akwak tere;

¹⁷cuka me aŋaba i dyekal, kede pagi mege kede acib tergi kede cuka me geŋo doggola me dyekal,

¹⁸teke me guro kema kede teke me dyekal kede tollege;

¹⁹boŋŋi aruka me tic ame okwoo abeco me tic i kabedo acil kede boŋŋi aruka acil pi alamdog Aron kede me awobe mere me ticgi me olamdog.”

²⁰Jo Icrael luŋ te ya oko i nyim Muca.

²¹Ŋat acel acel te cako dwogo kede mottere ame en oyero kun daŋ ŋat acel acel bino ame cunye ler; gin te kelo motgi baŋ Rwot me tiyo kema me rwatte kede me ticcere luŋ, kede me boŋŋi aruka acil.

²²Jo-nono te ciro co kede mon; jo luŋ obino ame cunygi ler kun okelo jarara, atem me yit, atem me ciŋ, kede mola ŋut ciŋ, kede kit jabu luŋ kun dano acel acel mio mot me jabu baŋ Rwot.

²³Jo luŋ ame tye kede uci obedo bululu bululu onyo en amaramar onyo en arema, onyo boŋo camanini aber, onyo yer dyegi, onyo lao me nyogi rommi ame onyono, onyo lao dyegi, okelo luŋ baŋ Rwot.

²⁴Ŋat ame romo kelo mot me ryal, onyo me mola, gin okelo te miyo me mot baŋ Rwot, kede jo luŋ ame tye kede bao me yat okuto alwi ame romo tiyo ticcoro keken, gin daŋ okelo.

²⁵Mon ame ryek i tic ciŋ luŋ obedo wiyo uci i ciŋgi, ote kelo uci ame gin owio obedo bululu bululu, kede en amaramar, kede en arema, kede boŋo camanini ame owio uci mere aber.

²⁶Mon ame cunygi omito tic i ryekogi, owio yer dyegi.

²⁷Otel wi lwak daŋ te kelo gweŋe alilia me onik kede en ocele mege me amwona i jabu, pi epod kede pi icao kor,

²⁸kede gin a ŋwece kur, kede moo me mac tara, kede me moo wir, kede me odok a ŋwece kur.

²⁹Jo Icrael luŋ, co kede mon okelo ginnoro me tiyo gin a rik Rwot ociko iye Muca ni ti, kun ŋat acel acel kelo gin ame yie omito baŋ Rwot.

³⁰Muca te kobo baŋ jo Icrael ni, “Nen, Rwot otyeko lwoŋo nyiŋ Bejaleri wot a Uri, ame wot a Kur, me itekere a Juda.

³¹Dok daŋ otyeko miyo cuny Obaŋa opoŋ i yie, karacel kede ryeko me tic, kede niaŋ atut, kede ŋec, kede tic luŋ me diro,

³²me roto callogo anyen me tic diro ame kwongi papat, ame otio i jabu, kede ryal, kede mola;

³³karacel kede ŋoŋolo gweŋe alilia me amwona kom jabu, kede ryeko me payo bao kede tiyo kit tic ocele luŋ me diro.

³⁴Omie daŋ cuny me pwony, en karacel kede Okoliab wot a Akicamak, me itekere a Dan.

³⁵En doŋ otyeko miyogi ryeko me tiyo kwone tic luŋ me diro, kede me roto callogo anyen me diro, kede me liliŋo boŋo i uci ame bululu bululu, kede en amaramar, kede arema, kede boŋo camanini ame owio uci mere aber, kede me cweyo boŋo kede me tiyo kwone tic luŋ, kede roto callogo apapat ame otio i diro.