Read lango Yaa 36 Bible Online

Yaa 36 - lango bible

Yaa 36

¹“Bejaleri kede Okoliab kede jo aryek i tic, ame Rwot omiogi ryeko me tic kede niaŋ atut, me ŋeyo kede tiyo tic luŋ me kabedo acil, gin bino tiyo kun olubo kite a rik Rwot ociko.”

²Muca te lwoŋo Bejaleri kede Okoab karacel kede jo luŋ ame ryek i tic, ame Rwot onwoŋo omio yigi opoŋ i ryeko me tic, jo luŋ ame cunygi omito bino i tic.

³Jo-nono te gamo mot luŋ ame jo Icrael omio me tic i kabedo acil, gin ogamo i baŋ Muca. Jo onwoŋo pwod tye amedde ameda me kelo motgi ame cunygi omito kun okelo didik odiko.

⁴Omio oryeko ame tiyo tic i kebado acil obino, kun ŋat acel acel oya i ticcere ame etio,

⁵Gin okobbi Muca ni, “Jo doŋ okelo mot adwoŋ meicel ame okato en onwoŋo mitte me tiyo tic a rik Rwot ocikowa ni oti,”

⁶Mannono omio Muca te miyo rabo kop romo gony luŋ ni, “Ico onyo dako moro kur doŋ medde timo ginnoro me amia pi kabedo acil.” Eka jo mom dok te kelo;

⁷pien ame onwoŋo okelo, onwoŋo doŋ oromo me tiyo tic luŋ te dok doŋ adoŋa.

⁸Oryeko me tic ame rik onwoŋo tye i akina otic te tiyo kema kede cuka tomon, kun otio i boŋo me camanini ame uci mere owio abeco, kede uci obedo bululu bululu, kede en amaramar, kede arema mere, kun daŋ odeo i cal okerubi ame oyiko i twon diro.

⁹Cuka acel acel borrere onwoŋo tye yadi apar wie aŋwen, eka laccere te bedo yadi aryo. Cuka-nono luŋ onwoŋo rorom.

¹⁰Oribo cuka abic karacel, kede abic ocele daŋ amannouo.

¹¹Eka ote kwoyo waŋ jarara ame bululu bululu i agikki cuka me acel, ote dok kwoyo daŋ i agikki cuka me dul me aryo ame rom aroma i maca ocele ca.

¹²Dok ote kwoyo waŋ jarara pyerabic i dog cuka acel, dok ote daŋ kwoyo i dog cuk a acel ame tye i dul me aryo, kun waŋ jarara acel acel tikere awottere.

¹³Dok ote riyo agod jarara me jabu pyerabic, eka gin te ribo dog cuka kede agod jarara-nono, kema doŋ te bedo ame okubere karacel.

¹⁴Dok ote tiyo cuka me yer dyegi me wumo wi kema; gin otio kodi cukanono apar wie acel.

¹⁵Cuka acel acel onwoŋo borrere tye yadi apar wie abic, laccere yadi aryo kun gin apar wie acel luŋ ororom.

¹⁶Eka gin te noto cuka abic kengi karacel, kun abicel ocele ca daŋ onoto kengi pat.

¹⁷Ote kwoyo waŋ jarara pyerabic i agikki cuka me dul me acel, ote dok kwoyo daŋ i agikki cuka me dul me aryo mere.

¹⁸Dok ote tiyo agod jarara me mola pyerabic me ribo dog kema karacel, me bed ame okubere karacel.

¹⁹Dok ote kwoyo lao me nyogi rommi ame onyoŋo, kede lao dyegi, me wumo wi kema.

²⁰Gin te dok tiyo bayi me okuto alwi ame ocuŋ atira me kema.

²¹Bao acel acel borrere onwoŋo tye futi apar wie abic, kun laccere tye futi aryo.

²²Bao acel acel Onwoŋo tye i tere aryo me kubogi karacel. Bayi me kema ocuŋ atira-nono rik gin te tiyo kittono.

²³Gin rik otiogi kit man: bayi me kema pyeraryo tuŋ cem.

²⁴Dok ote tiyo tergi me ryal pyeraŋwen me kubo bao kema pyeraryo ca, tere aryo aryo tye pi bao kema acel acel.

²⁵Dok ote tiyo me kema tuŋ ocele ca, me tuŋ cam, otio daŋ bao pyeraryo,

²⁶kede tergi me ryal pyeraŋwen, kun tyene aryo aryo daŋ tye pi bao kema acel acel.

²⁷Dok ote tiyo me kema, ame tye tuŋ to, otio bao kema abicel.

²⁸Ote dok tiyo aryo me twok kema ame tye tuŋ ŋeye.

²⁹Gin te poko akinagi i tuŋ pinnyere, cite ote noto doggi i tuŋ malo mere, kun onoto i kom atem me agege; gin otio aryo kittono pi twoke daŋ aryo.

³⁰Bao kema ocuŋ atira rik Onwoŋo tye aboro, kede acib tergi daŋ ame otio i ryal. Acib tergi rik onwoŋo tye apar wie aryo, kun bao kema acel acel tye iye acib tere aryo.

³¹Dok ote daŋ tiyo arii me bao abic pi bayi me kema tuŋ cel, kun otio kede okuto alwi,

³²kede arii bayi abic pi bayi me kema tuŋ ocele, kede dok arii bao abic me kema tuŋ neye, ame tye tuŋ to.

³³Te dok tiyo arii bao me dyere ame ya i agikki tuŋ cel tuno i agikki tuŋ ocele, kun ŋolle i kor arii bao ame ocuŋ atira,

³⁴Eka ote mwono kom bao kema tuŋ cel oko kede jabu, ote dok tiyo atem me jabu me rwako bao iye. Arii me bao daŋ omwono komgi oko i jabu.

³⁵Dok ote kwoyo boŋo me icika ame uci mere bululu bululu, amaraamar kede arema me boŋo camanini me uci mere owio aber, kun daŋ odeo kede cal okerubi ame oyiko i twon diro.

³⁶Eka ote tiyo pagi aŋwen me okuto alwi pire, ote mwono komgi oko i jabu, kun agodgi daŋ me jabu; ote liyo ryal tiyo acib tergi aŋwen.

³⁷Dok ote tiyo cuka boŋo me geŋo dog kema kun otio i cuka ame uci mere bululu bululu, amaramar kede arema, dok uci cukanono daŋ owio abeco, ote daŋ deyo aber meicel.

³⁸Dok ote tiyo pagi abic karacel kede agodgi, eka ote mwono wigi, kun otac wigi obedo me jabu, ento acib tergi abic obedo me mola.