Read lango Yaa 37 Bible Online

Yaa 37 - lango bible

Yaa 37

¹Bejaleri te payo canduk i bao oku to alwi, kun borrere tye futi aŋwen, laccere futi aryo kede borrere malo futi aryo.

²Te mwono ŋec kede yie oko i jabu ame olio aber, eka te dolo doge oko i jabu.

³Te tiyo atem me jabu aŋwen me twoke aŋwen luŋ; atem aryo pi tuŋ cel kede aryo tuŋ ocele.

⁴Dok ote tiyo daŋ ludi aryo me okuto alwi, ote daŋ mwono komgi oko i jabu,

⁵ote rwako ludi iyi atem luŋ ame tye i ŋet canduk, me tiŋo canduk.

⁶Dok te tiyo kom-me-kica kun tio i jabu ame olio aber; borrere futi aŋwen kede laccere futi aryo.

⁷Te dok tiyo okerubi aryo kun tio i jabu ame oteto anyul, te ketogi i agikki kom-me-kica ryoryo luŋ.

⁸Okerubi acel i agikki tuŋ cel kede acel ocele i agik ki tuŋ cel kun gin luŋ okubere i kom-me-kica, i agikki mere ryoryo luŋ,

⁹kun okerubi oyaro bwomgi malo i wie, owumo kom-me-kica i bwomgi, dok daŋ wan acel acel neno me awottere. Gin luŋ oneno kom-me-kica.

¹⁰Dok te tiyo meja kede bao okuto alwi; meja ame borrere tye futi adek, laccere futi acel kede nucu, eka borrere me malo te bedo futi aryo.

¹¹Te mwono kome oko i jabu ame olio aber, eka te dolo daŋ laŋete luŋ kun mwono oko kede jabu.

¹²Eka te keto arii mere ame laccere rom aroma i cuny ciŋ, kun dolo daŋ lak arii luŋ i jabu.

¹³Te doŋ tiyo atem aŋwen me jabu pire, eka te mwono atem aŋwennono i twoke aŋwen luŋ i kom tyene aŋwen.

¹⁴Atem acel acel oketo ceggi arii me rwako lut tiŋo meja.

¹⁵Dok te tiyo ludi kede bao okuto alwi, te mwono komgi oko i jabu.

¹⁶Otio dok jami me aketa i wi meja kun tio i jabu ame olio aber; otio cani, tabbi me keto odok akur, weer, kede cupa me liyo mot amata.

¹⁷En dok te tiyo gi-cibo mac tara kun tio i jabu ame olio aber. Oteto tere kede bollere ateta kede nyonyo. Ikopo mere ame en wene kede ature luŋ okubere kede karacel.

¹⁸Otio jaŋe abicel kun oryeye i ŋete luŋ, adek tuŋ cel kede adek tuŋ cel.

¹⁹I kom jaŋe tuŋ cel otio iye ikopo adek ame calo tur yao, kun acel acel tye kede ature kede wene. I kom jaŋe tuŋ ocele daŋ otio iye ikopo adek ame calo tur yao, kun acel acel daŋ tye ature kede wene. Jaŋe abicel ame oryeye i ŋet gi-cibo maccono onwoŋo obedo kittono.

²⁰Eka i kom gi-cibo tara ikokome ote tiyo iye ikopo aŋwen ame calo tur yao, kun tye i wengi kede turgi,

²¹kede wene ame okubere i kom gi-cibo tara, i te jaŋe abicel ame oryeyo oromo ŋete tuŋi i tuŋi.

²²Wengi kede jaŋgi okubere karacel, kun kome luŋ me jabu olio aber eka ote teto kede anyul.

²³Icennere doŋ te tiyo tara kany wie aryo pire, kede makaccere, kede cani mere kun tiogi luŋ i jabu ame olio aber

²⁴Gi-cibo tara kede jami me ticcere luŋ en otio kede jabu ame olio aber ame pekkere romo ratili mia acel.

²⁵Dok te tiyo keno me waŋo odok akur kun tio i okuto alwi; borrere futi acel i nucu, laccere daŋ futi acel i nucu kun twoke aŋwen luŋ rorom. Borrere me malo tye futi adek kun tye i tuŋ aŋwen ame okubere kede karacel.

²⁶Kome ducu omwono oko i jabu ame olio aber; wie kede laŋete kede tuŋe luŋ odolo oko eka ote dolo doge oko i jabu.

²⁷Otio daŋ atem me jabu aryo, ote keto i te doge ame odolo-ni, kun atem acel acel otikere kede awottere, me rwako lut me tiŋo.

²⁸Eka ote tiyo ludi i bao okuto alwi, ote mwono komgi oko i jabu.

²⁹Eka ote tiyo moo acil me wir, kede odok a ŋwece kur ame olio daŋ aber, kun orubo kite ame orubo kede gin a ŋwece kur.