Read lango Yaa 39 Bible Online

Yaa 39 - lango bible

Yaa 39

¹Gin te kwoyo daŋ boŋŋi me aruka abeco kun okwoo kede uci obedo bululu bululu, amaramar, kede arema, me tic i kabedo acil; okwoo boŋŋi acil pi Aron kite a rik Rwot ociko kede Muca.

²Otio daŋ epod kun tio i jabu kede uci ame obedo bululu bululu, amaramar kede arema, kede boŋo camanini ame owio uci mere abeco.

³Eka ote papado jabu arep kun odidino anyul, ote liro acalli tol me deyo boŋo karacel kede uci bululu bululu, amaramar, kede arema, me camanini owio uci mere abeco, kun daŋ otio i twon tic me diro.

⁴Ote daŋ kwoyo gin me wi gwok epod, kubo i doge ryoryo.

⁵Lati mere me tweyo ote cweyo i diro, kun okwoo i kit jami acellono, kede kodi tic acellono daŋ. Otio i jabu, uci obedo bululu bululu, amaramar, kede arema, kede boŋo camanini ame uci mere owio abeco, kite a rik Rwot ociko kede Muca.

⁶Gin dok te yiko gweŋe alilia me onik, ote mwomwono i kom jabu ame oŋweŋweko i diro kun doŋ onwoŋo ogogoro nyiŋ awobe Icrael i komgi kite ame adiro goro kede kom kidi.

⁷Eka ote mwomwonogi i kom gin me wi gwok epod, me bed kiddi me poyo awobe Icrael, kite a rik Rwot ociko kede Muca.

⁸Dok te tiyo icao me kor kun tio daŋ i tic me diro, acalli en a tye i kom epod. Otio kede jabu, uci bululu bululu, amaramar, kede en arema, kede boŋo camanini boŋo camanini ame uci mere owio aber.

⁹Twoke onwoŋo tye aŋwen arorom, kun odolo kor i cao-nono aryo; borrere kede laccere te bedo arommi lac ciŋ ame oryeo, ka doŋ odolo yie.

¹⁰Eka ote mwomwono iye gweŋe alilia ame oryeo i yore aŋwen. I yore me agege omwono iye cadiuc, topaj kede kabankel.

¹¹I yore me aryo mere ote mwono iye emeradi, capir kede dayaman.

¹²Eka i yore me adekkere, ote mwono iye jacint, agat kede ameticito.

¹³I yore me aŋwennere ote mwono iye berul, onik, kede jacipa. Gin luŋ omwomwonogi kede jabu ame oŋweŋweko kede diro.

¹⁴Gweŋe alilianono onwoŋo tye apar wie aryo, ame oporo nyiŋ awobe Icrael, ocalli i kidi ame ogoro me atem, kun kidi acel acel ogoro iye nyiŋ ame rom aroma atekere apar wie aryo.

¹⁵Dok ote tiyo nyor, kun otio i jabu ame olio aber, omino bala tol.

¹⁶Dok ote tiyo gi-kwako tere aryo, kun daŋ otio i jabu ame oŋweŋweko i diro, kede atem me jabu aryo, eka ote kwoyo atem aryo-nono i dog icao kor aryo daŋ.

¹⁷Eka dok ote rwako tol jabu aryo-nu donyo i atem aryo ame tye i dog icao kor.

¹⁸Dog tol aryo-nono ote mwono luŋ i kom akwak tere aryo ame oŋweŋweko i diro ca, ote tweyo kede i kom gin me wi gwok epod.

¹⁹Dok ote tiyo atem aryo me jabu, ote kwoyo i twok icao kor aryo ducu, i doge ame tye tuŋ yie ame ceggi kede epod.

²⁰Dok ote timo atem aryo me jabu, ote kubogi i gin me wi gwok epod aryo aryo i tergi tuŋ nyim, kan ame okubere malo i wi lati me epod ame ocweo i diro ca.

²¹Eka ote tweyo icao kor kede atemmere i kom atem ame tye i dog tol a bululu bululu, me but pyelle i kom lati me epod ame ocweo i diro ca, me wek icao kor kur gony oko i kom epod, kite a rik Rwot ociko kede Muca.

²²Dok ote tiyo jor me epod ame ocweo kome ducu kede uci a bululu bululu,

²³ote tuco bedo bala me ŋut boŋo me aruka, kun odolo ŋute luŋ me kur yeci.

²⁴Eka lak jor i piny ote luluŋo iye gin ame cal i okwer ame okwoo kede uci bululu bululu, amaramar, kede arema, kede boŋo camanini ame owio uci mere abeco,

²⁵Dok ote tiyo olaŋ jabu ame olio aber, ote kwoyo olan kun ocuculo i akina okwer, ame omano lak jor luŋ,

²⁶kun oculle acula i lak jor aruka me tic, kite a rik Rwot ociko kede Muca.

²⁷Dok ote tiyo kanyi ame ocweo i boŋo camanini aber, kede pali me boŋo camanini ame owio uci mere abeco pi Aron kede awobe mere,

²⁸kede itambara me adwala i wic me boŋo camanini aber, kede tok atitino mere me boŋo camanini, kede pali me boŋo camanini ame owio uci mere aber,

²⁹kede itambara me tweyo pyer me boŋe camanini owio uci mere abeco, kede uci bululu bululu, kede en amaramar kede arema, ame odeo aber meicel, kite a rik Rwot ociko kede Muca.

³⁰Dok ote tiyo akwaa jabu me tok kwogo acil, kun otio i jabu ame olio acil, eka ote goro kome agora kite ame ogoro kede i kom atem me ciŋ, ni, “Okwero obedo acil pi Rwot.”

³¹Eka ote tweyo tol a bululu bululu i kome me rid kede i kom itambara adwala i wic, kite a rik Rwot ociko kede Muca.

³²Rik gin doŋ onwoŋo otyeko tiyo kema oko, ame en kema me rwatte, gin rik otyeko ticcere kittono. Jo Icrael otyeko tic luŋ kite a Rwot ociko kede Muca; gin otio luŋ kittono.

³³Okelo kema baŋ Muca, kema kede jami me ticcere luŋ; okelo akod me bayi mere atira, kede arii mere, pagi mere, kede acib tergi;

³⁴lao nyogi rommi ame onyoŋo, kede lao dyegi ame okwoo me wumo wi kema, kede boŋo ici ka me geŋo kema;

³⁵kede canduk ame kop me caden bedo iye, kede ludi me tiŋo, kede kom-me-kica,

³⁶kede meja karacel i jami me ticcere luŋ, kede ogati me aketa i nyim Obaŋa,

³⁷kede gi-cibo tara me jabu olio aber, kede tara mere, kun oketo tara malo i wie karacel i jami tici g luŋ, kede moo tara;

³⁸kede keno lam me jabu, kede moo wir, kede odok a ŋwece kur, kede boŋo me wumo doggola kema;

³⁹kede keno lam me mola, kede keikei mere me mola, kede ludi me tiŋo, karacel i jami ticcere luŋ, kede tako lwok karacel akwak tere;

⁴⁰boŋo cuka ame oŋabo guro dyekal, pagi karacel acib tergi, kede boŋo geŋo dog dyekal, kede toli kede teke daŋ apipim me guro, karacel i jami me tic i kema me rwatte;

⁴¹boŋŋi aruka ame otio abeco me tic i kabedo acil, boŋŋi aruka acil me aruka alamdog Aron karacel kede boŋŋi aruka pi awobe mere, me ticgi me olamdog,

⁴²Kite a rik Rwot ociko i Muca, jo Icrael otio ticgi luŋ kittono ikome.

⁴³Muca te neno jami luŋ ame otio, nen, ticcere onwoŋo tic ikokome; kite a rik Rwot ociko ikome, tic luŋ otiye kakare. Muca doŋ te lamo winyo i komgi.