Read lango Yaa 4 Bible Online

Yaa 4 - lango bible

Yaa 4

¹Muca ogamo ni, “Kara abino timo ŋo ka ce jo Icrael mom bino ye winyo kop akobbigi. Kare ocele gin twero kobo ni, ‘Rwot gire mom onyutte baŋi.’ ”

²Rwot okobo ni, “Mano ŋo imako i ciŋi-nue?” Muca ogamo ni, “Abiro ennono,”

³Rwot te kobbe ni, “Bol koŋ piny.” Kare ame en obolo piny olokere odoko twol, eka Muca te pye oko teŋe iceny.

⁴Cite Rwot okobbi Muca ni, “Koŋ dok irye badi imak yibe.” Muca oryeo ciŋe omako yibe, eka te ru lokere oko doko abiro.

⁵Rwot te kobbe ni, “Mano bino miyo gin ye in Rwot ame Obaŋa a kwarigi. Obaŋa Iburaim, Obaŋa kaka kede Obaŋa Yakobo, onyutte baŋi.”

⁶Rwot dok okobbe ni, “Koŋ dok irwak ciŋi i kori.” Muca daŋ te rwako ciŋe i kore; kare ame en okwanyo ciŋe i kore, nen, dobo onwoŋo orwatte i ciŋe luŋ atar bala pee.

⁷Rwot dok te kobbe ni, “Koŋ dok idwok ciŋi i kori.” Kare ame en odwoko ciŋe i kore te kwanyo oko, nen, ciŋe onwoŋo odoko gire aber kakare.

⁸Rwot te kobo ni, “Ka ce gin mom bino ye koppi, dok daŋ mom oye a doŋ inyuttigi anyut me agege oko, anyut me aryo bino miyogi oloko tamgi.

⁹Ka ce anyut aryo-ni luŋ mom omiogi oye, dok daŋ okwero winyo koppi, ibino twomo pii i kulo Nail, ionyo i lobo ka otwo; pii ame itwomo i kulo Nail-nono bino lokere doko remo i lobo.”

¹⁰Muca te kobbi Rwot ni, “Ama Rwotta, an gira leba oto oto anaka cene, kadi ame itye ikop keda-ni, pwod gire tye kite acellono. Atye ka omo kop aomo kun atelle kede atela.”

¹¹Rwot te penye ni, “Ŋa a mio dano kobo? Ŋa kara a dwalo leb dano onyo a mio dano bedo adiŋyit, a mio dano neno aber onyo bedo atowaŋ? Mom an Rwot?

¹²Yin myero iwoti, an abino konyi me kop aber, dok abino kobbi gin a myero ikob.”

¹³Cite en dok te gamo ni, “Ama Rwotta, tim ber icwa ŋat ocele.”

¹⁴Akemo a Rwot te tugere oko i kom Muca kun kobo ni “Ominni Aron ame jo Levi mom tye kuno? An aŋeo ni en kobo aber meicel. Nen ba, en daŋ doŋ tye abino me rwatte kedi, yie bino bedo yom meicel ka oneni.

¹⁵Yin ibino kop kede kun ititte gin a myero en kobi. An abino konyi me kop aber, dok daŋ abino konye. Wun luŋ, an abino kobbiwu gin a myero iti wunu.

¹⁶En bino kop i lwak kakari. Aron bino bedo ŋat a kobo piri, ento kop Obaŋa ame en bino kobo bino ya i baŋi.

¹⁷Ter abironi iwot kede, pien bino konyi kuno me tiyo taŋo.”

¹⁸Kare ame Muca odok baŋ Yecero, ame papa a dako mere, en okwae ni “Tim ber koŋ iwek adok baŋ omegona ame tye i Miciri, me awot anen ka ce gin pwod tye kwo.” Yecero te gamo ni, “Wot giri i kuc, atinna.”

¹⁹Kare ame Muca rik pwod tye i Midian Rwot okobbe ni, “Dok ceŋ i Miciri: Jo luŋ a rik mito neki doŋ ototoa oko.”

²⁰Muca te keto dako mere kede awobe mere i wi kana, te cako wottere me dok cen i Miciri kun omako abiro Obaŋa i ciŋe.

²¹Rwot okobbi Muca ni “Ka doŋ ityeko dok cen i Miciri, myero inen ni itio taŋo luŋ ame atyeko miyi twer me tiyo i nyim Parao; cite an abino miyo cunye bedo nwaŋ, mom bino ye jo woto.

²²Doŋ ba, yin myero ikobbi Parao ni, ‘Man en kop ame Rwot ikome okobo: Icrael obedo awobina me kao.

²³Atyeko kobbi ni, “Myero iye woda woti, me en wot cob ticcere a myero en ti baŋa”; ento yin ikwero oko; nen, aman an doŋ abino neko wodi me kao oko.’ ”

²⁴I kare ame gin tye i wotgi, Rwot orwatte kede Muca kan a gin obuto iye kun mito neke oko.

²⁵Jipola te kwanyo kidi abit, te liro i kom awobe mere, te gudo i tyen Muca kun kobo ni, “Aman doŋ yin i cwara pi remo!”

²⁶Rwot doŋ te weke. I kare ame dako okobo ni, “Yin i cwara meremo”, onwoŋo okobo pi kop me lirre.

²⁷Rwot okobbi Aron ni “Wot irwatte i Muca i tim.” En oya, te rwatte kede i wi kidi Obaŋa, te mote kun noto leme.

²⁸Muca te kobbi Aron kop luŋ a Rwot rik okobbe i kare ame oore kede taŋo luŋ ame Obaŋa ociko ni eti kede.

²⁹Muca kede Aron te wot i Miciri coko odoŋe a jo Icrael luŋ karacel.

³⁰Aron te kobbigi kopporo ducu ame Rwot okobo baŋ Muca, te daŋ nyuto taŋo luŋ i nyim lwak.

³¹Jo oye koppere; kare ame gin owinyo ni Rwot doŋ olimo jo Icrael, dok daŋ neno can luŋ ame Icrael tye ka neno, gin luŋ ote kulo wigi piny woro Obaŋa.