Read lango Yaa 40 Bible Online

Yaa 40 - lango bible

Yaa 40

¹Rwot te kobbi Muca ni,

²“Cak guro kema i dwe me agege ame en kema me rwatte,

³Ket canduk ame kop me caden bedo iye i yie, eka ite ŋabo boŋo me icika me wumo canduk.

⁴Ter doŋ meja iye, ite cano jami luŋ iye yore i yore, dok ite kelo gicibo tara, cibo tara i wie.

⁵Ket dok keno me lam me waŋo odok akur, ame otio i jabu, ket i nyim canduk ame kop me caden bedo iye, eka ite nabo boŋo me geŋ dog kema.

⁶Ibino keto keno lam me waŋo mot oŋolo me yalo Obaŋa i nyim kema, ame en kema me rwatte.

⁷Ket tako me lwok cuŋ i akina kema me rwatte kede keno me lam, eka ite onyo pii i yie.

⁸Ŋab dok cuka me dyekal malo ogur dyekal dyere, eka ite ŋabo cuka me geŋo dog dyekal.

⁹Kwany moo wir, wir meja kede jami luŋ ame tye iye kun ikwero meja-nono kede jami mere luŋ me bed acil.

¹⁰Wir daŋ dok keno me lam me mot awaŋa, wir kede moo, karacel kede jami me ticcere luŋ. Kwer keno me lam oko, bino doko acil meicel.

¹¹Wir moo daŋ i kom tako lwok kede akwak tere, eka ite kwerogi.

¹²Kel doŋ Aron kede awobe mere i doggola me kema me rwatte, eka ite lwokogi kede pii.

¹³Ruk Aron kede rukkere acil, eka ite wire kede moo me kwere me tiyo ticca me alamdog.

¹⁴Kel dok awobe mere, rukgi kede kanyigi,

¹⁵wirgi kede moo kite ame iwiro kede papagi me gin ti ticca me olamdog. Wirogi kede moo bino miyo gin bedo olamdog atwal naka i kare ikwaegi luŋ.”

¹⁶Muca te timo kite a rik Rwot ocike kede-nono, otimo jami luŋ kittono ikome.

¹⁷I dwe me agege, me mwaka me aryo, i nino dwe acel, en ame oguro iye kema.

¹⁸Muca oguro kema, oryeo acib tere, te cibo iye yen, eka te rwako arii iye, te tiŋo malo,

¹⁹Eka te dok peto boŋo i wi kema, te keto awum kema i wie, kite a rik Rwot ocike kede.

²⁰Dok te tero kop me caden keto iyi canduk, te rwako ludi i kor canduk, te keto kom-me-kica i wi canduk,

²¹te tero canduk doŋ i kema. Oŋabo boŋo me icika malo te geŋo kede kom canduk ame kop caden bedo iye oko, kite a rik Rwot ociko kede Muca.

²²Dok te keto meja i kema me rwatte tuŋ cem, kun mio bedo i oko i ŋe boŋo icika ame ogeŋo canduk.

²³Te doŋ cano ogati i nyim Rwot kite a rik Rwot ociko kede Muca.

²⁴Dok te keto gi-cibo tara i kema me rwatte tuŋ cam, kun otikere i meja,

²⁵te cibo tara i wie malo i nyim Rwot, kite a rik Rwot ociko kede Muca.

²⁶Dok te keto keno lam me jabu i kema me rwatte, i nyim boŋo me icika,

²⁷te waŋo odok a ŋwece kur i wie, kite a rik Rwot ociko kede Muca.

²⁸Dok te ŋabo boŋo me geŋo dog kema.

²⁹Eka dok te keto keno lam me waŋo mot awaŋa aceggi i doggola me kema me rwatte, te cako miyo iye mot awaŋa kede me moko kwon, kite a rik Rwot ociko kede Muca.

³⁰Dok te keto tako lwok i akina kema me rwatte kede keno me lam, te onyo iye pii me lwok;

³¹kannono en ame Muca kede Aron kede awobe mere olwoko iye tyengi.

³²Gin doŋ te wot i kema me rwatte, ote daŋ noko doŋ keno me lam, ote lwokere i kite a rik Rwot ociko kede Muca,

³³Oguro dyekal me kema kede keno me lam, te ŋabo boŋo me geŋo dog dyekal. Muca te tyeko ticcere kakare kittono.

³⁴Icennere pol te bino wumo wi kema me rwatte oko, kwogo a Rwot te poŋ oko i kema.

³⁵Muca onwoŋo doŋ mom romo donyo i kema me rwatte, pien pol onwoŋo owumo oko, dok kwogo a Rwot onwoŋo opoŋ yi kema oko.

³⁶I kare me wotgi luŋ, ka pol owarre oko i wi kema, eka jo Icrael te cako wotgi anyim.

³⁷Aco ka pol mom owarre oko, gin daŋ mom medde i wotgi anyim; gin kuro naka i nino ame pol owarre iye i wi kema.

³⁸I kare me wotgi luŋ, pol a Rwot wumo wi kema dyeceŋ kede mac bedo iye dyewor. Man luŋ obedo timere kun jo Icrael luŋ neno.