Read lango Yaa 5 Bible Online

Yaa 5 - lango bible

Yaa 5

¹Icennere Muca kede Aron te wot baŋ Parao, ote kobbe ni, “Rwot Obaŋa a jo Icrael okobo ni, ‘Wek jona woti, me gin wot kwer nino adwoŋ i tim me wora.’ ”

²Parao te gamo ni, “Rwot en ŋa-nono kara? Ŋo a mia awinyo gin a en okobo? Piŋo kara a mio aye Icrael iwot? An gira mom aŋeo Rwottono, daŋ mom abino ye Icrael woto.”

³Gin dok te kobbe ni, “Wan otyeko rwatte Obaŋa a jo Eburania. Tim ber iwekwa owoti, wot me nino adek i tim, me owot omi mot ame oŋolo me yalo Rwot Obaŋawa; pien ka wan mom owoto, en Rwot bino pwodowa kede two edeke onyo pala lweny.”

⁴Cite Parao abaka me Miciri te kobo ni, “Muca kede Aron, piŋo ikwanyo wunu jo oko i dog ticgi? Wun dok wunu i dog ticwu.”

⁵Dok te kobo ni, “Nen jo-in doŋ pol meicel, wun dok imito miyogi wunu we i dog ticgi?”

⁶I nino-nono Parao te ciko odoŋe a loo tic a lwak, kede onyamparagi, ni,

⁷“Kur dok imedde kelligi wunu ocwici me goyo matafali kit a yam itimo wunu con, gin ikomgi en a doŋ myero om-mi.

⁸Wel matafali bed kit a yam ogoo kede, kur idwok wunu wellere piny; pien komgi wac, en omio gin kok ni, ‘Wekwa owot omi mot oŋolo me yala Obaŋawa i tim.’

⁹Migi wunu tic atek me ololle kede, me owek winyo kop goba goba bedi.”

¹⁰Odoŋe a loo tic a lwak, kede onyamparagi, te wot kobbi jo ni, “Parao okobo ni, ‘An mom dok abino keliwu ocwici.

¹¹Wun doŋ myero iwot iyeny wunu ikomwu, kan ame itwero nwoŋo wunu iye; ento ticwu bino bedo kit acon aboŋo dwoko piny kadi acel.’ ”

¹²Mannono te miyo jo ket i Miciri luŋ pi coko reŋ kal me ocwici.

¹³Odoŋe a loo tic te bedo cunyogi ni, “Ru wunu tyeko ticwu me nino i nino kite a yam con ame itye wunu ocwici.”

¹⁴Odoŋe a loo tic a Parao te bedo pwodo onyampara a jo Icrael ame gin oketo kun openyogi ni “Piŋo tin mom ityeko ticwu me goyo matafali i kite a yam con?”

¹⁵Eka onyampara a jo Icrael te wot kok baŋ Parao ni “Piŋo kara itimo omironi amanne?

¹⁶Nen, ocwici mom doŋ okelligi, aco okobbiwa ni, ‘Go wunu matafali!’ Obedo pwodo-gu omironi apwoda, aco kono bal tye baŋ joni.”

¹⁷Cite Parao ogamo ni, “Wun komwu wac, wun komwu wac; en omio wun ikobo wunu ni, ‘Wekwa owot omi mot oŋolo me yalo Rwot.’

¹⁸Dok wunu i tic. Ocwici gire mom obino miyowu kadi acel, dok daŋ ibino goyo wunu matafali i wei a yam con aboŋo alokaloka moro.”

¹⁹Onyampara a jo Icrael oneno ni doŋ otye arac meicel i kare ame okobo ni, “Mom obino dwoko wel matafali me nino i nino piny kadi acel.”

²⁰Gin te rwatei Muca kede Aron a rik onwoŋo tye a kurogi i kare a gin dwogo i baŋ Parao.

²¹Gin te kobbigi ni, “Rwot myero nenwu, dok daŋ ŋolliwu kop, pien imio wunu nyiŋwa odoko aŋwe i nyim Parao kede omiro mere, dok imiogi wunu pala lweny me nekowa.”

²²Muca te lokere baŋ Rwot, te kobo ni, “Ama Rwot, itimo jo-ni arac aman piŋo kara ba? Icwaa kan piŋo?

²³Cakere ame abino baŋ Parao, me kop kede i nyiŋi, en te cako timo jo-ni arac meicel, yin mom ru ilaro joni.”