Read lango Yaa 6 Bible Online

Yaa 6 - lango bible

Yaa 6

¹Rwot te kobbi Muca ni, “Tin doŋ ibino neno gin ame abino timo i kom Parao; ciŋ atek bino miyo en wekogi owoto oko, kun ryemogi aryema i lobo mere.”

²Obaŋa okobbi Muca ni, “An a Rwot.

³Rik anen baŋ Iburaim, baŋ Icaka kede baŋ Yakobo, kun gin ŋeo ni an Obaŋa Won Twer Ducu, cite rik mom amiogi oŋeo ni nyiŋa Rwot.

⁴Rik daŋ amoko cikerena kedgi kun acikere me miyogi lobo me Kanaan, ame en lobo a rik gin obedo iye acalo wele.

⁵Dok daŋ atyeko winyo ŋuŋura a jo Icrael ame jo Miciri doŋ olokogi odoko opii-ni, daŋ doŋ apo i cikerena.

⁶Pi mannono, kob baŋ jo Icrael ni, ‘An a Rwot, abino kwanyowu oko i peko ame jo Miciri oketo i komwu. Abino larowu oko i bedo me opii opii. Abino lakorowu i bada ame aryeo, kede cannogo adoŋo ame abino ŋolo i komgi.

⁷Abino terowu ibedo wunu jona, an abedo Obaŋawu. Ibino ŋeyo wunu ni an a Rwot Obaŋawu ame akwanyowu i peko ame jo Miciri oketo i komwu.

⁸Eka ate bino kelowu i lobo a rik akwoŋo pire ni abino miyo baŋ Iburaim, kede Icaka, kede Yakobo, abino miyowu me bedo lobowu; an a Rwot’.”

⁹Muca te kobo koppono baŋ jo Icrael; ento gin mom te winyo kop a Muca, pien cunygi onwoŋo oballe oko pi tic apek okato kare me opii opii.

¹⁰Rwot dok te kobbi Muca ni,

¹¹“Dony baŋ Parao abaka me Miciri, iwot ikobbe ewek jo Icrael ya oko i lobo mere.”

¹²Ento Muca okobbi Rwot ni, “Nen, jo Icrael okwero winyo koppa oko kara Parao bino winyo koppa nino, an a dano a doga mom cil-li?”

¹³Rwot okobo i Muca kede Aron, ocikogi baŋ jo Icrael kede baŋ Parao abaka me Miciri, pi kwanyo jo Icrael oko i lobo Miciri.

¹⁴Magi gin odoŋe me doggola a kwarigi: itino awobe a Reuben ame obedo atin kao Icrael, gin ene; Kanok, Pallu, Kejeron kede Karmi; jo me doggola a Reuben ennono.

¹⁵Itino a Cimeon awobe ene; Jemuel, Jamin, Okad, Jak in, Jokar, kede Caul, awobi a dako me Kanaan; jo doggola a Cimeon ennono,

¹⁶Magi gin nyiŋ itino a Levi awobe, kun lubere i lwakigi: Gercon, Kokat kede Merari; mwaka a Levi me dittere ame ori kede i lobo, rik oromo mia acel i pyeradek wie abiro,

¹⁷Itino a Gercon awobe ene: Libni kede Cimei, kit acalo doggolagi tye kede.

¹⁸Itino a Kokat awobe ene: Amuram, Ijar, Kebron, kede Ujiel; mwaka a Kokat me dittere ame ori kede i lobo oromo mia acel i pyeradek wie adek.

¹⁹Itino a Merari awobe ene: Makali kede Muci. Jo me doggola a Levi ennono kun lubere i lwakigi

²⁰Amuram onyomere i Yokobedi amin pappere, te nywalo Aron kede Muca; mwaka Amuram me dittere ame ori kede i lobo oromo mia acel i pyeradek wie abiro,

²¹Itino a Ijar awobe ene: Kora, Nepeg kede Jikri,

²²Itino a Ujiel awobe ene: Micael, Elijapan kede Citri.

²³Aron onyomo Eliceba nyaka Aminadab, amin a Nacon, te nywalo Nadab, Abiku, Eleajar kede Itamar.

²⁴Itino a Kora awobe ene: Acir, Erukana kede Abiacap; doggola a Kora ennono.

²⁵Eleajar wot a Aron, onyomo dako i akina anyira a Putiel, te nywalo Finekaci. Odoŋe me doggola a kwari a jo Levi ennono, kit a doggolagi tye kede.

²⁶Aron kede Muca ennono, ame Obaŋa okobbigi ni, “Kwany wunu jo Icrael oko i Miciri kun owoto atekere, atekere.

²⁷Gin en a rik okobo abaka me Miciri pi kwanyo jo Icrael oko i lobo Miciri; Muca kede Aron-nono, gin ennono.”

²⁸I nino ame Rwot okobo kede baŋ Muca i Miciri,

²⁹Rwot ociko Muca ni, “Ana a Rwot; kob abaka me Miciri kop ducu ame atitti.”

³⁰Muca te kobbi Rwot ni, “Nen, an gira doga mom cil; Parao bino winya niŋo?”