Read lango Yaa 7 Bible Online

Yaa 7 - lango bible

Yaa 7

¹Rwot te kobbi Muca ni, “Nen ba, an atyeko keti me bedo acalo Obaŋa baŋ Parao, aco ominni Aron bino bedo calo adwarpinnyi.

²Yin ibino kobo kop luŋ ame aciki iye, eka ominni Aron te kobo baŋ Parao me weko jo Icrael ya oko i lobo mere.

³Ento abino miyo cuny Parao bedo nwaŋ, abino medde tiyo anyut kede taŋo apopol i lobo Miciri.

⁴Ento Parao mom gire bino winyo koppi. Icennere abino keto ciŋa i kom jo Miciri ate kwanyo gira monnya oko, ame gin jona Icrael, abino miyogi ya oko i lobo Miciri kun nwoŋo koŋ cannogo adoŋo ame aŋolo i kom jo Miciri otimere.

⁵I kare ame abino ryeyo ciŋa i kom jo Miciri pi kwanyo jo Icrael oko i akinagi, gin bino ŋeyo ni an a Rwot.”

⁶Muca kede Aron te tiyo daŋ kite a Rwot ocikogi kede.

⁷Muca onwoŋo doŋ tye i mwaka a romo pyreraboro me dittere, aco me Aron onwoŋo tye pyreraboro wie adek i kare ame gin kobo i Parao.

⁸Rwot dok te kop i Muca kede Aron ni,

⁹“Ka ce Parao okobbiwu ni, ‘Koŋ inyuttiwa wunu taŋo moro me onen ka ikobo wunu kop ateni,’ yin ibino kobbi Aron ni, ‘Kwany abironi ibol piny i nyim Parao, me lokere dok twol.’ ”

¹⁰Muca kede Aron rik te wot baŋ Parao, ote daŋ wot tiyo kit a Rwot ocikogi kede. Aron obolo abiro piny i nyim Parao kede omiro mere, abiro te lokere doko twol.

¹¹Parao te lwoŋo oryeko ame obedo ojogi ojogi, ame gin rik emuroko me Miciri; gin daŋ ote timo amannono i ryekogi me jojok.

¹²Pien dano acel acel i akinagi obolo abiro mere piny te daŋ lokere doko twol, cite abiro Aron te mwonyo megi luŋ.

¹³Cuny Parao gire pwod omedde ameda bedo anwaŋ, mom oye winyo kopi, kite ame Rwot onwoŋo okobo.

¹⁴Rwot dok te kobbi Muca ni, “Cuny Parao pwod nwaŋ, okwero weko jo wot oko.

¹⁵Wot baŋe idiko con ame en pwod aya ayaa me wot i kulo; wot ikure i ŋet kulo, mak abironi a rik lokere dok twol ca i ciŋi.

¹⁶Eka ite bino kobbe ni, ‘Rwot ame Obaŋa a jo Eburania ocwaa baŋi kun kobo ni, wek jona woti me gin wot ti pira i tim, koŋ inen yin mom ru iwinyo koppa.

¹⁷Aman Rwot doŋ okobo ni mano. Man en a bino miyo iŋeo ni an a Rwot: abino goyo pii i kulo Nail kede abiro a tye i ciŋa-ni, pii bino lokere doko remo.

¹⁸Rec luŋ i kulo Nail bino to oko, kulo Nail bino doko acoo meicel, yi jo Miciri mom bino mito mato pii i kulo Nail.’ ”

¹⁹Rwot te kobbi Muca ni, “Kob baŋ Aron ni, ‘Kwany abironi ite ryeyo ciŋi i wi pii luŋ me Miciri; i wi kulli, i wi yo pii okukunyo, i wi atapara luŋ kede i wi kabedo luŋ ame pii poŋ iye, me gin luŋ aluŋa lokere dok remo; meremo rom lobo Miciri luŋ, naka i ginnoro luŋ otio i yat onyo i gweŋ ame jolo pii.’ ”

²⁰Muca kede Aron daŋ te tiyo kit a Rwot ocikogi kede. Aron otiŋo abiro mere malo i nyim Parao kede omiro mere, te goyo pii i kulo Nail, pii luŋ i kulo Nail te lokere doko remo.

²¹Kit rec luŋ i kulo Nail te cako to oko, ŋwec kulo daŋ te doko acoo meicel. Mannono te miyo jo Miciri doŋ mom dok romo mato pii i kulo Nail, dok remo daŋ doŋ te romo lobo Miciri luŋ.

²²Emuroko me Miciri daŋ ote timo amannon i ryekogi me jojok; te miyo cuny Parao bedo anwaŋ, mom te ye winyo kopgi, kit ame Rwot onwoŋo okobo.

²³Parao te dok gire tuŋe kun mom daŋ tye aparo gire kop man i cunye.

²⁴Jo Miciri luŋ te bedo kunyo pii amatagi i ŋet kulo Nail, pien onwoŋo mom doŋ oromo mato pii i kulo Nail.

²⁵I ŋe nino abiro a doŋ Rwot ogoo kulo Nail.