Read lango Yaa 8 Bible Online

Yaa 8 - lango bible

Yaa 8

¹Rwot dok te kobbi Muca ni, “Dony baŋ Parao iwot ikobbe ni, ‘Rwot okobo ni, Wek jona woti, me owot oti pira.

²Aco ka ce ikwero wekogi wot, nen ba, abino coro ogwalogwal i loboni luŋ.

³Ogwalogwal bino corre apipim i kulo Nail, te bino naka i udini, naka atot iyi icikani kede i wi tandani; bino wot daŋ atot i udi omironi kede meajoni, naka atot i keno tedogi, kede i tako kwon.

⁴Ogwalogwal bino pye-gu anaka i komi kede i kom joni kede omironi.’ ”

⁵Rwot te kobbi Muca ni, “Kob baŋ Aron ni, ‘Rye doŋ ciŋi kede abironi i ciŋi i wi kulli, yo pii okukunyo, kede atapara luŋ, me ogwalogwal corre i lobo Miciri apipim!’ ”

⁶Aron te daŋ reyeyo ciŋe i wi pii luŋ a tye i lobo Miciri, ogwalogwal te corre apipim wumo lobo Miciri oko,

⁷Emuroko me Miciri daŋ ote timo amannono i ryekogi me jojok, gin daŋ te miyo ogwalogwal apipim corre i Miciri.

⁸Icennere Parao te lwoŋo Muca kede Aron, te kobo ni, “Kwa wunu Rwot me kwany ogwalogwal oko i koma kede i kom jona, me awek jo wot mi mot oŋolo me yalo Rwot.”

⁹Muca te dokki Parao ni, “Mano gire ber; aco yin doŋ myero imia kare ame imito ni akwa iye Rwot piri, kede pi omironi kede joni, me ogwalogwal to oko ducu i komi kede i udini, me doŋ en i kulo Nail keken.”

¹⁰Parao te gamo ni, “Kom diki adika-ni.” Muca te kobo ni “Aco doŋ bed kit ikobo-nono, me yin ine ni mom dok tye ŋattoro ocel a calli Rwot Obaŋawa.

¹¹Ogwalogwal bino ya oko i komi, kede i udini, kede i kom omironi kede joni; obino weko ka en i kulo Nail keken.”

¹²Muca kede Aron te doŋ ya oko i nyim Parao; Muca te kok baŋ Rwot pi ogwalogwal kit acalo onwoŋo eye kede baŋ Parao.

¹³Rwot daŋ te timo kit ame Muca okobo kede, ogwalogwal daŋ te totoa oko i udi kede i dyekal kede i potti ducu.

¹⁴Ote cokogi luŋ karacel awu awu, ŋwece te kuto aŋwe i kabedo ducu.

¹⁵Cite Parao ka oneno ni pwod dok cwe, cunye te doko anwaŋ oko, mom oye winyo kopgi, kit ame Rwot onwoŋo okobo.

¹⁶Rwot te dok kobbi Muca ni “Kob Aron ni, ‘Tir abironi malo me igo kede apuwa me lokere dok ober ame bino lal romo lobo Miciri luŋ.’ ”

¹⁷Gin daŋ te timo amannono, Aron te tiro ciŋe malo kun abiro mere tye i ciŋe, te goyo apuwa, ober te wukere bino i kom jo kede i kom leyi ducu.

¹⁸Emuroko daŋ i ryekogi me jojok ote temo ni ober myero bin, cite te loyogi oko. Pi mannono, ober rik te bedo i kom jo kede i kom leyi luŋ.

¹⁹Emuroko te kobbi Parao ni, “Man gire ciŋ Obaŋa.” Cite cuny Parao pwod omedde ameda ibedo nwaŋ, mom oye winyo kopgi, kit ame Rwot onwoŋo okobo.

²⁰Rwot dok te kobbi Muca ni, “Dil idiko con iwot ikur Parao i kare ame en awot i kulo, i te kobbe ni, ‘Rwot okobo ni mano, Wek jona woti, owot oti pira.

²¹Ka ce mom ibino weko jona wot, nen ba, abino coro lwak lwaŋi apipim i komi, i kom omironi kede i kom joni luŋ, bino wot atot i udini; lwak lwaŋi bino ŋinne apipim i udi a jo Miciri daŋ, anaka i lobo ame gin ocuŋ iye.

²²I ninonono abino poko lobo Gocen pat, kan ame jona bedo iye, me lwaŋi kur corre kuno, me iŋe wunu ni an a Rwot a tye i dye lobo luŋ,

²³Abino poko akina jona kede joni kittono. Anyut man bino timere diki.’ ”

²⁴Rwot daŋ te tiyo kittono; omio lwak lwaŋi apipim ocorre i udi a Parao kede me omiro mere, anaka i lobo Miciri luŋ; lwaŋi apipim-mi te balo gire lobo oko.

²⁵Icennere Parao te lwoŋo Muca kede Aron, te kobbigi ni, “Wot imi wunu mot oŋolo me yalo Obaŋawu i lobowa kan.”

²⁶Cite Muca te gamo ni, “Mom gire otwero timo kittono; pien leyi a waŋ obino ŋolo me yalo Obaŋawa obedo me kwer baŋ jo Miciri. Ka ce wan obino ŋolo leyi me yalo Obaŋawa ame obedo me kwer baŋ jo Miciri kun gin aneno i waŋgi, gin mom bino napowa oko i gweŋe?

²⁷Wan myero owot giwa i tim wot me nino adek, me owot omi mot oŋolo me yalo Rwot Obaŋawa kit a en ocikowa kede.”

²⁸Omio Parao te kobo ni, “Abino wekowu iwoto wunu i tim me iwot imi wunu mot oŋolo me yalo Obaŋawu, ento mom ibino wot wunu kannabor. Kwa koŋ doŋ pira.”

²⁹Muca te kobo ni, “Nen an doŋ aya oko i nyimi, awot kwayo Rwot me lwaŋi diki ya oko i komi, kede i kom omironi kede joni, cite Parao myero kur dok bwolwa te kwero ye jo wot miyo mot oŋolo me yalo Rwot.”

³⁰Muca te ya oko i nyim Parao, te wot kwayo Rwot.

³¹Rwot daŋ te tiyo kite a Muca okwao kede, te miyo lwaŋi ya oko i kom Parao kede i kom omiro mere kede jo mere; acelloro mom odoŋ.

³²Cite cuny Parao pwod dok omedde ameda ibedo nwaŋ, mom gire oye jo owoto.