Read lango Yaa 9 Bible Online

Yaa 9 - lango bible

Yaa 9

¹Rwot dok te kobbi Muca ni, “Wot ikobbi Parao ni, ‘Rwot ame Obaŋa a jo Eburania okobo ni mano. Wek jona woti me wot ti pira.

²Ka ce ikwero ni gin kur woti, kun pwod imedde ameda geŋogi,

³nen ba, Rwot bino ryeyo ciŋe bedo i kom limwu luŋ a tye i bar kun kelo edeke apek i kom aguragura luŋ, inaga luŋ, kana luŋ kede dok, dyegi kede romi,

⁴Ento Rwot bino poko lim a jo Icrael kede meajo Miciri, lim ajo Icrael mom bino to kadi acelloro.’ ”

⁵Rwot te nyuto kare kun kobo ni, “Rwot bino timo man diki.”

⁶Orwo mere Rwot te tiyo kittono; lim a jo Miciri luŋ te to oko, ento lim a jo Icrael mom te to kadi acelloro.

⁷Parao te cwayo dano, nen, lim a jo Icrael moro mom oto kadi acelloro. Cite cuny Parao gire pwod omedde ameda ibedo nwaŋ, mom oye jo owoto.

⁸Rwot dok te kobbi Muca kede Aron ni, “Job wunu buru i ka waŋo matafali poŋ ciŋwu, mi wunu Muca cor malo tuŋ polo i nyim Parao.

⁹Bino lokere doko apuwa ame te duny romo lobo Miciri, luŋ, bino miyo odeke kwokwota atata i kom jo kede i kom leyi luŋ me Miciri.”

¹⁰Gin daŋ ote jobo buru i ka waŋo matafali, ote cuŋ kede i nyim Parao. Muca te coro malo, eka te lokere doko odeke, kom jo luŋ kede leyi te kwokwota atata i two odeke.

¹¹Emuroko mom doŋ romo cuŋ i nyim Muca, pien odeke onwoŋo okwokwota anaka i komgi kede i kom jo Miciri luŋ.

¹²Ento Rwot omio cuny Parao obedo nwaŋ, mom oye kopgi, kit ame Rwot onwoŋo okobo kede baŋ Muca.

¹³Rwot dok te kobbi Muca ni, “Dil idiko con iwot icuŋ i nyim Parao, ikobbe ni, ‘Rwot ame Obaŋa a jo Eburania okobo ni mano. Wek jona woti, me owot oti pira.

¹⁴Pien man doŋ abino miyo cunyi cwer atek pi kit can apapat ame abino pwodowu kede, yin kede joni luŋ, me ineni mano mom dok tye ŋattoro ocele i lobo luŋ ame rom keda.

¹⁵Pien kono nyo doŋ aryeo ciŋa agoi oko i too edeke agwa, karacel i lwakki luŋ, kono nyo doŋ i mom wunu i lobo;

¹⁶cite pi kop man omio aweki kwo, me anyutti te kona, nyiŋa te rwo i lobo luŋ.

¹⁷Yin giri pwod itye iyon i kom jona, ikwero wekogi wot oko.

¹⁸Nen ba, diki i kodi caa-ni, abino coro lwak pee apekkege i lobo, pee a yam mom ru onen i lobo Miciri, cakere a jo ocako bedo iye, tuno kede atot onyoni.

¹⁹Pi mannono, aman myero icwa kop me cok limmi luŋ kede jamini ducu ame tye i bar, me kelgi i ot; pien pee bino pwodo jo ducu kede leyi luŋ ame tye oko, bino neko jami ducu a tye i bar.’ ”

²⁰Jo mogo i akina omiro a Parao ame lworo kop a Rwot, omio opiigi kede limgi oriŋo olaro ot.

²¹Ento jo a mom winyo kop a Rwot oweko opiigi kede limgi i bar.

²²Rwot te kobbi Muca ni, “Rye ciŋi malo i polo, me pee corre i lobo me Miciri luŋ, i kom jo, leyi kede ginapita luŋ a tye i lobo Miciri.”

²³Muca te tiŋo abiro mere malo tuŋ polo. Rwot te miyo polo mor, pee te corre i lobo kun orubere kede mac; Rwot te miyo pee oony romo lobo Miciri luŋ.

²⁴Pee kede mac a meny teretere i dye pee obedo tye i lobo Miciri kit a yam mom ru onen, geye amejo i lobo Miciri odoko rok acel.

²⁵Pee te pwodo ginnoro duc ame onwoŋo tye i potti i lobo Miciri luŋ karacel i jo kede leyi. Pee te lwero jami luŋ ame opito i potti, te daŋ yeyeco yen i bar ducu.

²⁶Lobo me Gocen keken, kan ame jo Icrael bedo iye, en ame pee mom ogudo.

²⁷Parao dok te cwayo kwena lwoŋo Muca kede Aron, te kobbigi ni, “Man dok abalo, kop a Rwot gire tye kakare, ento an kedejona, wan otimo rac.

²⁸Kwa wunu doŋ Rwot, pien pee kede mor a kot doŋ oromo; abino wekowu iwoto wunu, pe dok ibino medde bedo wunu kan.”

²⁹Muca te kobo ni, “Amanni tekki abino kato i ŋe boma, abino ryeyo ciŋa malo baŋ Rwot, mor a kot kede pee bino gik oko, me iŋe wunu ni lobo luŋ obedo mea Rwot.

³⁰An kono aŋeo ni yin kede omironi mom ru ilworo wunu Rwot Obaŋa.”

³¹Pee obalo pamba kede cayiri oko, pien cayiri onwoŋo doŋ oŋokoko, pamba daŋ ocako turo oko.

³²Ento ŋano atar kede en arema, pee mom obalo, pien ocoogi icen.

³³Muca te ya oko i baŋ Parao kato oko i ŋe boma, eka te ryeyo ciŋe malo baŋ Rwot; mor a kot kede pee te gik oko, kot mom dok te medde cwe i lobo.

³⁴Cite ka Parao oneno ni kot kede pee kede mor a kot ogik oko, dok te medde poto oko i bal, en karacel kede omiro mere, cunygi te bedo anwaŋ oko.

³⁵Parao cunye te bedo anwaŋ kittono, mom oye jo Icrael owoto, kit ame Obaŋa rik omio Muca okobo.