Read lango Yubu 1 Bible Online

Yubu 1 - lango bible

Yubu 1

¹Rik tye lo moro i lobo me Uji ame nyiŋe Yubu; en rik obedo dano ame mom i balloro, dok cunye atira. En rik onwoŋo lworo Obaŋa, dok kwero tim luŋ areco.

²En onwoŋo tye awobe abiro kede anyira adek.

³Rommi mere onwoŋo tye tutumia abiro, kane tutumia adek, twoni pur tutumia acel, megi kane mia abic, kun daŋ tye omiro mere apipim. En onwoŋo twon lo moro adwoŋ meicel ame kato jo luŋ ame rik onwoŋo tye tutuŋ kide i kare-naca.

⁴A wobe mere rik onwoŋo tedo arama i udigi kun oleo alea, ŋat acel acel onwoŋo tye kede nino ame en tedo iye arama te lwoŋo omego mere luŋ iye, kun olwoŋo amegogi adek ca iye.

⁵Kare i kare ka nino me camo aramagi doŋ otum oko. Yubu cwao kwena lwoŋogi, eka te tiyo tic me lonyogi. En ya malo ibai, te yalo Obaŋa i mot awaŋa kun timo man pi ŋat acel acel i akinagi, pien Yubu rik onwoŋo tamo ni onyo ca awobe mere obalo balloro i kom Obaŋa i cunygi, Yubu rik bedo timo man kare ducu.

⁶Doŋ i nino moro acel omalaika Obaŋa obino i nyim Rwot, kun Catan daŋ tye i akinagi.

⁷Rwot te penyo Catan ni, “Yin kono iya i kwene?” Catan te gamo ni, “An aya rimo piny i wi lobo, kun awiwira gira iye kuno, adok tuŋŋi kede tuŋŋi.”

⁸Rwot dok te kobbi Catan ni, “Tye ginnoro ame itamo i kom amirona Yubu? Mom tye dano moro ame cal kede i wi lobo. En obedo dano ame mom i balloro dok cunye atira. Lworo Obaŋa, dok daŋ kwero tim luŋ areco.”

⁹Catan te gamo koppere ni, “Yubu lworo Obaŋa nononono ateni?

¹⁰Mom yin imio cel oguro kome oko tuŋŋi i tuŋŋi karacel kede jo luŋ me ode kede jami luŋ ame en tye kede? Yin ibedo miyo gum omake i kom jami luŋ ame en tio, limmere akwo-gu nya medde ameda i wi lobo.

¹¹Koŋ irye ciŋi aman igud jami luŋ ame en tye kede-nono, me inen kite ame ico bino ceni kede!”

¹²Rwot te kobbi Catan ni, “Aco doŋ koŋ, an doŋ atyeko jalo jami luŋ ame en tye kede i te twerri cite kur igude en ikome.” Catan doŋ te ya oko i nyim Rwot.

¹³I nino moro acel onwoŋo awobe mere kede anyira mere tye acem i ot, awobi adwoŋ, kun daŋ otye omato koŋo olok kuno

¹⁴Akwena moro te bino baŋ Yubu, te kobbe ni, “Twonini onwoŋo woki tye apur kun kane daŋ tye acem i ŋetgi kuno;

¹⁵jo moro me Caba te bino mako omironi neko oko i pala lweny ote kolo twoni kede kane tero oko. An kena en ame abwot me bino titti koppere.”

¹⁶Ame en onwoŋo pwod akop, dano ocele dok te pello te kobbi Yubu ni, “Obaŋa ocwao lutkot ocelo rommi kede omironi oneko oko luŋ, an kena en ame abwot me bino titti koppere.”

¹⁷Ame en pwod akop ŋat ocele dok te pelo, te kobo ni, “Jo mogo me Kaldaya obino i dul adek ote mako omironi neko oko luŋ i pala lweny, ote yako inaga luŋ tero gigi oko, an kena en abwot me bino titti koppere.”

¹⁸Ame en pwod tye akop, dano ocele dok te pelo, te kobo ni, “Awobeni kede anyirani woki tye acem i ot omingi adwoŋ, kun daŋ omato koŋo olok;

¹⁹twon yamo moro adwoŋ meicel te bukoro i kom ot luŋ, kun oya i tuŋ tim, ot te rette oko i kom itinoni, aman gin luŋ oto oko, an kena en ame abwot me bino titti koppere.”

²⁰Yubu oya malo te yeco boŋŋi mere i kome oko, te lyelo daŋ yer wie oko, orette piny te woro Obaŋa,

²¹kun kobo ni, “Rik adonyo nono iyi totta, abino daŋ dok i lobo nono. Rwot en omia dok en a daŋ okwanyo. Nyiŋ Rwot myero gire pak.”

²²I kom gin otimere-ni luŋ, Yubu naka mom obalo kadi acel, akadi ŋolli obaŋa kop ni otimo ginoro arac.