Read lango Yubu 10 Bible Online

Yubu 10 - lango bible

Yubu 10

¹“Adag gira doŋ kwona, mom abino weko koko kadi acel, abino gira kop, pien cunya kec meicel.

²Abino kobbi Obaŋa ni, Kur iŋol kop loa ba, kobba gin omio itye ka pyem keda,

³Nen aber baŋi ka itye ka wuna, kun icao kede tic ame yin komi itio, eka ite lunyo pwoyo tim otim areco?

⁴Waŋi rom i me a dano bo? Ineno kite ame dano neno kede jami?

⁵Kare me kwoni daŋ rom kede me a dano bo? Mwaka me rini i lobo rom kede me a dano,

⁶en omio yin itye ka yenyo bal i koma-ni me wek inwoŋ balla,

⁷Yin iŋeo ni balla moro mom, kun daŋ iŋeo ni mom dok tye ŋattoro ame twero lara i ciŋi.

⁸Yin en a yam icwea kede ciŋi, aman dok ilokere i koma me neka oko.

⁹Po ni yam icwea i lobo; aman dok idwoka iyi apua bo?

¹⁰Mom rik ionya oko calo cak, ite miya makere calo cak opoto?

¹¹Yin gire en iburo koma i del koma kede riŋo, ite kokubo koma i ler kede cogo.

¹²Imia kwo kede mar a mom lokere, ibedo gwoka, imia abedo kwo.

¹³Kadi bed ibedo gwoko kop magi i cunyi, aŋeo ni man obedo gin ame yin en iyiko.

¹⁴Ka ce an abalo, yin gire nwoŋo ineno oko, cite mom iye weko balla kadi acel.

¹⁵Can i wia ka ce atimo ginnoro arac! Ka ce balla moro mom, mom daŋ atwero tiŋo wia malo pien lewic ocira gira oko, pien atye ka neno can ame tye i koma.

¹⁶Ka ce aporo tiŋo wia malo, yin nwoŋo itye ikiya calo eŋatu, kun itio ticcogo me awura i koma.

¹⁷Nen itye ka medde ameda me lweny i koma, akemoni i koma daŋ tye medde kare luŋ, itye ka cwayo mony apapat i koma.

¹⁸“Piŋo kara imia adonyo oko iyi totta? Kono rik ato gira ame ŋattoro mom ru onena, do ber,

¹⁹Kono rik ikwanya iyi totta naka i lyel, ate bedo calo ŋat a mom obedo tye.

²⁰Kare me kwona i lobo mom gire aduno moro? Koŋ iweka ba, me abil yomcuny aduno moro ba,

²¹kun mom ru awoto kan ame mom dok abino dwogo iye cen, i lobo me mutu kede colpiny,

²²i lobo ame col icuc dok jami iye ojebere atata, kan ame lero ceŋ rom aroma i colpiny.”