Read lango Yubu 11 Bible Online

Yubu 11 - lango bible

Yubu 11

¹Jopar dano me Namat te gamo ni,

²“Twon kop apol ame iduro-nono mom ogamo? Kop apol apola en a nyuto ni dano tye atira bo?

³Itamo ni koppi-nono twero miyo jo liŋ aliŋa? Koppi ame inywaro i jo anywaranono mom romo miyo omi lewic?

⁴Pien yin ikobo ni, ‘Pwonnya gire ber odoco, Obaŋa gire neno ni an acil.’

⁵Cite kono Obaŋa onwoŋo twero kop kedi, kono oŋamo doge te kobbi kop i cunye!

⁶Kono onwoŋo oyabbi i muŋ apol me ryeko! Pien ŋeccere tut meicel. Myero iŋe ni can ame Obaŋa oketo i komi mom oromo poro kede bal ame yin ibalo.

⁷“Yin iromo ŋeyo ginnoro luŋ i kom Obaŋa? Iromo ŋeyo twerroro luŋ ame Won Twer Ducu tye kede?

⁸Tye malo meicel calo polo, kara yin itwero timo ŋo iye? Tut kato lyel me Ceol oko, yin iromo ŋeyo ŋo iye?

⁹Borrere kato lobo oko, laccere te kato nam oko.

¹⁰Ŋa ame twero geŋo Obaŋa ka ce en obino te mako dano? Ka ce olwoŋo dano i ka ŋolo kop, ŋa ame romo juke?

¹¹Pien en ŋeo jo ame konygi mom, ka ce en oneno bal myero en kur tam pire?

¹²Dano amiŋ twero doko dano aryek ka kana me tim onywalo dano?

¹³“Ka ce iyiko cunyi obedo atira, ibino taŋo ciŋi baŋ ikwae;

¹⁴ka ce bal tye i ciŋi, bol doŋ oko teŋe kannabor, timmoro arac luŋ myero kur doŋ bed i udini.

¹⁵Ibino gire doŋ tiŋo wi malo aboŋo balloro i komi, mom doŋ ibino bedo kede lworo moro, dok daŋ ibino bedo kede tekcuny.

¹⁶Wii bino wil oko i kom peko ame ibeo iye, ibino po iye calo pii ame doŋ omol oko.

¹⁷Ibino doŋ bedo i kwo acil calo ceŋ aryeny i cuny dyeceŋ, kadi bed iwinyo ni itye i piny acol, cite pwod bino nen calo ka ibai.

¹⁸Ibino bedo ame cunyi opye, pien nwoŋo itye kede gen, Obaŋa bino gwoki, ibino we giri mot i kuc.

¹⁹Ibino buto piny aboŋo ŋattoro ame mi lworo, jo apol bino mito ni kono obedo calo yino

²⁰Ento wan jo areco bino balle meicel, yo me bwot bino loyogi oko, obino doŋ paro to keken.”