Read lango Yubu 12 Bible Online

Yubu 12 - lango bible

Yubu 12

¹Yubu dok te gamo koppere ni,

²“Ateteni, wun gire itye wunu kede ŋec, ryeko luŋ aluŋa bino to kedwu,

³Cite an daŋ atye kede ŋec atut calo wun, wun gire mom iloa wunu. Kara ŋa a mom ŋeo kodi jaminie?

⁴An doŋ adoko gi-anyera owotena, an ame yam alwoŋo Obaŋa eka te gamo koppa, an ŋat a kitena atira, a balla-gu mom, adoko gi-anyera a jo.

⁵Jo ame komgi i gum cao jo ame komgi kec, ocoro jo ame tyengi ocer acera.

⁶Kuc gire tye i kema oyak, dok jo ame mio akemo mako Obaŋa tye gigi aber, jo ame obaŋagi obedo tekogi.

⁷“Koŋ ipeny leyi, gin bino pwonyi, peny daŋ winy me polo, gin bino titti.

⁸Jami ame lak alaka i lobo bino pwonyi, rec me nam bino tucci.

⁹Gin luŋ oŋeo aber ni Rwot en otio man,

¹⁰En loo jami luŋ, en daŋ a mio dano acel acel wee

¹¹Yit dano mom ŋeo poko kop ame okobo, kite ame dano bilo cam kede doge.

¹²Dano ka oteggo ryek, perakino i lobo mio dano bedo kede ŋec atut.

¹³“Obaŋa tye kede ryeko kede twer daŋ, tye daŋ i ŋec atut kede tam atut.

¹⁴Ot ame en oreto piny, ŋattoro mom dok romo gero, ŋat ame en ocego i ot, ŋattoro mom yabo,

¹⁵Ka en mom omio kot ocwe, pii i lobo dwono oko, aco ka omio ocwe, pii poŋ lapakino atata i lobo.

¹⁶En tek dok daŋ ryek, abwol jo kede jo obwolo daŋ obedo mege.

¹⁷Omi-tam adoŋo en tero oko onoro, en mio oŋolkop doko omiŋo.

¹⁸En gonyo jo ame obakki otweo i buc, en lunyo tweyo boŋŋi i pyer obakki,

¹⁹En tero olamdog daŋ onoro, kun reto wegi twer piny.

²⁰En two dog jo ame ogeno oko, kun rwenyo ŋec atut ame odoŋe tye kede oko.

²¹En mio jo cao rwode, dok mio jo atek doko agoro,

²²En mio muŋ i kan acol nen oko kannaler, dok mio kan acol icuc doko aler oko,

²³Twero miyo rokkoro-ni doko twon rok adwoŋ meicel, dok twero daŋ jwero oko, twero miyo rokkoro-ni doko rok atek dok twero wekogi ata,

²⁴En kwanyo ŋec otel a lwak oko, miogi owoto i tim ata, kan ame yo pe iye,

²⁵Miogi oboŋo yo aboŋa aboŋo lero moro, kun ogatte calo jo omer koŋo.”