Read lango Yubu 13 Bible Online

Yubu 13 - lango bible

Yubu 13

¹“Nen ba, an atyeko neno magi luŋ, awinyo dok daŋ aniaŋ.

²Gin ame wun iŋeo wunu, an daŋ aŋeo, wun gire mom iloa wunu.

³Cite amito ni kono akobo koppa baŋ Won Twer Ducu, amito akob koppa-ni wan Obaŋa.

⁴Aco wun iwumo wunu kop ateni kede goba, wun luŋ ibedo wunu daktal ame konywu mom,

⁵Onwoŋo myero iliŋ wunu aliŋa, mannono bino miyo inen wunu calo jo aryek.

⁶Koŋ doŋ iwiny wunu gin ame an akobo, cik yitwu i pidona.

⁷Ibino kobo wunu kop goba pi Obaŋa, kun ibedo bwolo wunu jo abwola?

⁸Wun ibino dworo wunu Obaŋa, kun ipido wunu pire?

⁹Itamo ni ibino bedo wunu aber ka ce en ocako ŋiyowu? Itamo ni itwero bwole wunu kite ame ibwolo wunu kede dano?

¹⁰En gire bino jukowu, ka ce itye wunu kede apokapoka i cunywu,

¹¹Kwogo mere mom myelo komwu, mom mio lworo makowu ce?

¹²Carokop ame ikobo wunu calo buru, kop ame ipido wunu goro calo lobo ame ŋidde oko-ni.

¹³“Koŋ iliŋ wunu, me ate kop, me gin ame mito bino i koma bin,

¹⁴Abino camo tona i doga, ate jalo kwona oko,

¹⁵An mom doŋ atye kede gennoro, en gire bino neka, kadi bed amannono, pwod abino kobo kop.

¹⁶Tekcunya en ame bino miya aloo kop i kom kitena i nyime, pien dano a mom ŋeo Obaŋa mom tuno i nyime.

¹⁷Ter yitwu iwiny wunu koppa aber meicel, me gin akobo dony i cunywu,

¹⁸Nen, atyeko doŋ yiko pidona oko, aŋeo ni abino loyo kop,

¹⁹Ŋa ce ame bino pyem keda kuno? Ka ce tye, abino liŋ gira aliŋa naka ka ato.

²⁰“Ama Obaŋa, tim ber itim pira jami aryo keken, me kur daŋ arweny i nyimi;

²¹kwany doŋ ciŋi oko i koma ba, dok kur imi koma bed myel pi lwori,

²²ne mannono, ite doŋ lwoŋa me agam dogi, onyo iye an akob kedi, yin ite gamo koppa,

²³Rocca kede balla tye ce adi? Tim ber inyutta balla kede cikki ame aturo.

²⁴Piŋo kara doŋ iponna oko? Piŋo itye ka tera calo akworri?

²⁵Imito miyo lworo mako pot boke ame yamo akolo, onyo ryemo yo cuŋ kal otwo?

²⁶Pien ityeko coyo kop akec meicel i koma, kun ipidda pi bal luŋ ame atimo i kare me tinona.

²⁷Irwako tyena oko iyi kol, itye ka nena i kabedo luŋ ame awoto iye, itye ka pimo kan a tyena onyono ducu.

²⁸Imio doŋ arom aroma kede gin otop, onyo boŋo ame nyenye otutuco.”