Read lango Yubu 15 Bible Online

Yubu 15 - lango bible

Yubu 15

¹Erifaji dano me Teman dok te gamo ru,

²“Dano aryek bedo gamo kop a tere mom, kun bedo kako ka yamo ame ya i tuŋ kide keken?

³Bedo pyem nono kop ame konnyere pe, onyo i kop ame en mom romo timo ginnoro iye?

⁴Nen imiyo jo akwero lworo Obaŋa oko, dok itye ka geno jo me lwodo kop i cunygi i nyim Obaŋa oko,

⁵Pien balli tye ka miyo dogi bedo alim, itye ka yero kop ame oryeko a bwolo jo tio kede,

⁶Koppi gire en ame tye ka ŋolli kop, mom an, kop ame ya i dogi en a tye acalo caden i komi.

⁷“Yin en ogeo nywali bo? Onyo ca onywali con, ame Obaŋa mom ru oketo kidi?

⁸Yam ibedo winyo gin Obaŋa tye ayiko ce? Onyo yin itamo ni yin keken iryek?

⁹Ŋo ame yin iŋeo ame wan mom oŋeo aber? Ŋo ame yin iniaŋ iye aber, wan mom oŋeo aber?

¹⁰Ŋat a wie obuko lwar kede ŋat oteggo, gin luŋ otye i akinawa, ame gin jo ame mwakagi bup kato me a pappi oko.

¹¹Kop ame Obaŋa kweo kede cunyi mom romi bo, onyo koppere ame en kobo mot amota-ni?

¹²Piŋo kara cunyi tye ka wayi teri teŋe? Piŋo waŋi oballe?

¹³Piŋo akemo tye ka maki i kom Obaŋa, kun imio kodikoppono donnyo i dogi?

¹⁴Dano kara obedo gin aŋo ame mio twero bedo acil? Onyo ŋat ame dako onywalo twero bedo ŋat a kite atira i yore aŋo?

¹⁵Nen ba, Obaŋa mom geno jo mere acil, akadi polo-gu mom cil nyime kadi acel.

¹⁶Kara doŋ dano kono, en ame dano oballe calo doŋ gin ame kwer-ri, dano ame bal mitte calo pii amata-ni?

¹⁷“Winy koppa me anyutti, gin ame aneno daŋ abino titti oko,

¹⁸karacel kede gin ame jo aryek kobo, gin ame kwarigi mom okano acalo gin me i muŋ,

¹⁹ame lobowu rik omio baŋgi gin kengi; ame arokkoro mom beo i akinagi.

²⁰Atim tim arac pwodde i rem kare luŋ me kwo mere, pi mwakki luŋ ame omio ŋat a mom i kica,

²¹En bedo winyoredo mogo ame winyo lik, kare me kuccere en ame ayak bino kede i kome,

²²En mom twero ye ni dok ebino ya i kan acol, pien en ŋeo ru otye ka libe i pala me neke,

²³En bedo rimo piny pi yenyo cam, kun penyo ni, ‘Tye kara kwene ba?’ En ŋeo ni to doŋ tye akure akura,

²⁴Peko kede can bedo myelo kome kare luŋ, oloc calo abaka ame oyikere me lweny.

²⁵Pien en oryeo ciŋe me lweny Obaŋa, oyiye ni eromo lweny i Won Twer Ducu,

²⁶kun riŋo apala apala me wot lweny kede, i twon kwottoro apek meicel.

²⁷Moo onwoŋo owumo kome oko, pyere daŋ onwoŋo moo keken.

²⁸En obedo bedo i boma mogo ame oweko i wi obur, kun bedo i udi ame dano mom opore bedo iye, udi ame doŋ tye ka pi wi obur.

²⁹En mom bino bedo alonyo kadi acel, lim atye i ciŋe mom bino perakino, dok mom bino cuŋ atek acalo yat ame lwite odonyo piny lobo,

³⁰En mom bino bwot kadi acel colpiny, en bino rom aroma i yat ame lyeto mac otwo pote oko, kede yat ame yamo oonyo ture oko.

³¹En myero kur gen bwo ŋor, kun bwole kenekene, pien bwo ŋor en ame obino cule kede.

³²Obino cule oko, kun kare me culle mom ru oromo, bino bedo calo yat ame pote mom olot.

³³Dok bino bedo calo olok ame nyige oony oko, onyo jeituni ame ture oony oko kun mom ru ocek,

³⁴Pien jo a mom ŋeo Obaŋa rom aroma i dako oraŋa, mac waŋo kema a ŋat ogamo lim owile kede i mun oko,

³⁵Gin oyaco tim me bal ote nywalo can, obedo yiko kop goba i cunygi.”