Read lango Yubu 17 Bible Online

Yubu 17 - lango bible

Yubu 17

¹“Cunya doŋ goro meicel, kwona doŋ ceggi tum, lyel doŋ tye akura akura.

²Ateni, wegi anywar doŋ ogura oko dyere, waŋa tye ka neno kite ame akemogi lyetto kede i koma.

³“Yin ikorui myero icuŋŋa, kara ŋa i kuno ame romo cuŋŋa?

⁴Kite acalo yin mom iyabo tamgi me oniaŋ, pi mannono mom ibino miyogi oloa,

⁵Ŋat ame kobo kop me erupe i kom owote mere, me enwoŋ ginnoro i kom jamigi, waŋ itino mere bino rwobere oko.

⁶“En omio nyiŋa doŋ odoko me aceka a jo, an doŋ adoko dano a jo ŋulo lao i nyime.

⁷Kumo omio waŋa doŋ ocido oko, dul koma luŋ doŋ calo tipo.

⁸Man omio jo ame cunygi atira owuro meicel, ŋat a mom i balloro cako mwomere i kom jo a mom ŋeo Obaŋa.

⁹Cite ŋat a kite atira medde mere i kite mere, ŋat a balloro mom i cunye teko mere medde ameda.

¹⁰Ento wun luŋ, koŋ ibin wunu, mom gire abino nwoŋo dano moro aryek.

¹¹“Karena doŋ okato oko, gin ame cunya mito, a yam ayiko doŋ oturo oko,

¹²Gin loko dyewor doko dyeceŋ, kun okobo ni, ‘Lero ceŋ ceggi i piny acol.’

¹³Ka ce aneno lyel me Ceol acalo oda, ka ce apeto kabutona i colpiny,

¹⁴ka akobbi i lyel ni. ‘Yin ibedo pappa’, kede kudi ni, ‘Yin i totta onyo aminna’,

¹⁵kara doŋ gen ame atye kede-nono tye kwene? Ŋa ame bino neno gin ame atye i gen iye-nono?

¹⁶Bino wot keda naka i lyel piny bo? Obino yito piny iyi apua karacel bo?”