Read lango Yubu 18 Bible Online

Yubu 18 - lango bible

Yubu 18

¹Bildad dano me Cua te gamo dok kun kobo ni,

²“Ibino yenyo kop me akoba naka awene? koŋ itam ba, eka ote cako dok kop kedi,

³Piŋo itye ka terowa calo leyi? Piŋo itye ka nenowa calo jo amiŋ?

⁴Yin ame akemo mio ikikilo komi calo eŋatu-ni, myero wek lobo doŋ nono piri bo? Onyo myero kob kidi oko i kakare?

⁵“Nen ba, tara a jo areco obino neko oko, acara maccere mom bino menyo piny.

⁶Mac iyi kema mere bino nen ribiribi, tara ame oŋabo i wie malo bino to oko.

⁷Bayo awottere bino jwik oko gin ame en ikome eyiko en a bino rete piny.

⁸Owic bino mako tyene, onyo bino poto i bur ame ociko me mako lee,

⁹Boo bino mako opuny tyene, en bino moko i owic,

¹⁰Obino cike kede tol i lobo piny, obino cike owic i waŋayo.

¹¹Lworo bino make tuŋŋi kede tuŋŋi, bino lubo yore i kabedo luŋ.

¹²Kec bino nuye oko, can-gu nwoŋo tye akure akura tekki agatte.

¹³Two bino babalo del kome oko, too arac meicel bino ŋuŋuno del kome oko.

¹⁴Obino waye oko i kema mere ame yam egeno, ote tere baŋ abaka ame jo luŋ lworo.

¹⁵Jami a mom mege en ame bino bedo i kema mere, obino onyo gwen calufa paco mere.

¹⁶En bino bedo calo yat ame lwite otwo oko, kun jaŋe daŋ oner oko.

¹⁷Mom dok obino po pire i lobo, mom daŋ obino kobo nyiŋe dye yo,

¹⁸Obino core i kannaler, ocwae kannacol, kun oryeme oko i wi podo.

¹⁹Atinnere onyo akware mom bino bedo tye i akina jo mere, ŋattoro mom bino doŋ akwo kan a yam en bedo iye.

²⁰Gin otimere i kome bino miyo lworo mako jo i tuŋ to, lworo bino mako jo i tuŋ kide daŋ.

²¹Paco a jo a mom ŋeo Obaŋa gire bedo amannono, ŋat a kwia Obaŋa gire bedo kodi kabedo-nono.”