Read lango Yubu 19 Bible Online

Yubu 19 - lango bible

Yubu 19

¹Yubu dok te gamo kop, kun kobo ni,

²“Ibino bedo wuna wunu naka awene ba, kun ibedo olo wunu koma i kop atata?”

³Aman doŋ iŋala wunu odoko tyen apar twal, lewic mom makowu ce me bedo tima wunu rac?

⁴Kadi bed an arwenyo ateni, balla gire bino maka an kena.

⁵Ka ce ibedo dwore wunu kenwu i koma, kun ikobo wunu ni rem ame oketo i koma-ni cimo ni an abal,

⁶myero iŋe wunu ni Obaŋa en omio kop loa, en oburo koma oko kede boo mere.

⁷Nen ba, kadi bed akok ni oneka oko, mom ogamo doga, kadi ared areda i lwoŋo, ŋat a ŋolo kop atira bedo pe,

⁸En gire ocega yo oko ame mom aromo kato, en omio yoe luŋ akono abe iye odoko acol icuc.

⁹En otyeko kwanyo kwogona oko, te kwanyo tok kwogo daŋ oko i wic.

¹⁰En doŋ otura odoco, atum doŋ aber, oputo gen ame atye kede oko calo yat oputo,

¹¹Omio akemo omake meicel i koma, te tera acalo okworrere.

¹²Monnyere luŋ ociro karacel i koma, otoro lobo ogura kede dyere, ote guro gonygi guro kemana oko.

¹³“En omio omegona doŋ tye kannabor meicel, jo a yam ŋea doŋ opokere deka oko.

¹⁴Watina kede owotena a yam mara, gin luŋ doŋ obola oko;

¹⁵wele mogo a yam obedo i oda doŋ wigi owil oko i koma; aŋecana luŋ doŋ nena calo welo moro ata, onena doŋ acalo arokkoro,

¹⁶Ka alwoŋo amirona mom doŋ gamo doga, myero abak doga abaka baŋe.

¹⁷Dakona mom doŋ mito ŋweyo doga, omegona ame odonyo kedgi acel mom doŋ mito ŋweyo ŋwec koma.

¹⁸Naka itino atino doŋ caa acaa, ka aya malo, gin okobo kop arac i koma.

¹⁹Owotena a yam mara atek daŋ doŋ obola oko, jo mogo a yam an amaro doŋ olokere oko i koma.

²⁰Riŋo koma kede del koma doŋ omakere ipa i cogona, del doga keken en a doŋ odoŋ.

²¹Owotena, kica myero makwu i koma ba, pien Obaŋa doŋ omio ciŋe ogudo koma oko.

²²Piŋo itye ka lubo wunu yora calo Obaŋa? Piŋo riŋo koma mom romowu?

²³“Kop ame akobo-ni kono onwoŋo ocoo oko piny, do ber! Kono onwoŋo ocoo oko bukkoro!

²⁴Kono ogoro kom alam nyonyo kom kidi, ote mwono me bed iye atwal.

²⁵Pien aŋeo ni ŋat a lakoro an tye kwo, waŋŋoro bino cuŋŋa i wi lobo.

²⁶Kare ame del koma doŋ oballe oko, kit man-ni, abino gire neno Obaŋa aboŋo del koma-ni.

²⁷Abino nene en ikome kun en tye ocuŋ i ŋeta, Cunya dok opoto meicel!

²⁸Ka ce ikobo wunu ni, ‘Kara obino ryemo yore nino?’ kede ni, ‘Te kop ikokome nwoŋere baŋe;

²⁹myero ilwor wunu pala romo, pien akemo en a kela lweny pala romo, me iŋe wunu ni ŋolo kop tye.’ ”